ພາຍຸໄຕ້ຝຸ່ນຢາງິຖະຫລົ່ມພາກເໜືອຫວຽດນາມ ຝົນຕົກ ລົມແຮງ ນໍ້າຖ້ວມເປັນວົງກວ້າງ

     ພາຍຸໄຕ້ຝຸ່ນຢາງິພັດຂຶ້ນຝັ່ງບໍລິເວນພາກເໜືອຂອງຫວຽດນາມ ສົ່ງຜົນເຮັດໃຫ້ເກີດຝົນຕົກໜັກ, ລົມພັດແຮງ ແລະ ນໍ້າຖ້ວມກະທັນຫັນໃນຫລາຍພື້ນທີ່.

     ວັນທີ 7 ກັນຍາ, ກົມອຸຕຸນິຍົມວິທະຍາແຫ່ງຊາດຫວຽດນາມລາຍງານວ່າ: ພາຍຸໄຕ້ຝຸ່ນຢາງິພັດຂຶ້ນຝັ່ງລະຫວ່າງເມືອງຮາຍຟອງກັບແຂວງກວາງນິນ ທາງພາກເໜືອຂອງຫວຽດນາມ ໃນຕອນທ່ຽງວັນທີ 7 ກັນຍາ ຕາມເວລາທ້ອງຖິ່ນ ດ້ວຍຄວາມໄວລົມສູງສຸດໃກ້ສູນກາງ 149 ກິໂລແມັດຕໍ່ຊົ່ວໂມງ ສົ່ງຜົນເຮັດໃຫ້ເກີດຝົນຕົກໜັກ, ລົມພັດແຮງ ແລະ ມີລາຍງານນໍ້າຖ້ວມກະທັນຫັນໃນຫລາຍພື້ນທີ່.

    ກົມການບິນພົນລະເຮືອນແຫ່ງຊາດ ຢຸດໃຫ້ບໍລິການສະໜາມບິນຢ່າງໜ້ອຍ 4 ແຫ່ງໃນປະເທດ ໄດ້ແກ່ ສະໜາມສາກົນໂນຍບາຍ ໃນນະຄອນຫລວງຮ່າໂນ້ຍ ແລະ ສະໜາມບິນອີກ 3 ແຫ່ງ ຢູ່ເມືອງຕາມແຄມຝັ່ງຄື: ເມືອງຮາຍຟອງ ແຂວງກວາງນິນ ແລະ ແຂວງທັນຮວາ ໃນວັນທີ 7 ກັນຍານີ້ ເຊິ່ງຈະສົ່ງຜົນກະທົບຕໍ່ຖ້ຽວບິນພາຍໃນປະເທດປະມານ 240 ຖ້ຽວບິນ ແລະ ຖ້ຽວບິນລະຫວ່າງປະເທດອີກປະມານ 70 ຖ້ຽວບິນ.

     ກ່ອນພາຍຸໄຕ້ຝຸ່ນຢາງິ ເຊິ່ງເປັນພາສີຍີ່ປຸ່ນ ໝາຍຄວາມວ່າ: ແບ້ ເຄື່ອນທີ່ມາຫວຽດນາມ ພາຍຸພັດຜ່ານມົນທົນໄຫ່ໜານ ທາງພາກໃຕ້ຂອງຈີນ ດ້ວຍຄວາມໄວລົມສູງສຸດໃກ້ສູນກາງຫລາຍກວ່າ 230 ກິໂລແມັດຕໍ່ຊົ່ວໂມງ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 2 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 92 ຄົນ.