ກໍລະນີທໍາອິດໃນອາເມລິກາ ພົບຜູ້ຕິດເຊື້ອໄຂ້ຫວັດສັດປີກ ທັງທີ່ບໍ່ເຄີຍສໍາຜັດສັດຕິດເຊື້ອ

     ເຈົ້າໜ້າທີ່ສາທາລະນະສຸກລັດມິສຊູຣີຂອງອາເມລິກາ ເປີດເຜີຍວ່າ: ພົບຜູ້ຕິດເຊື້ອໄຂ້ຫວັດສັດປີກຄົນໜຶ່ງ ທີ່ບໍ່ເຄີຍສໍາຜັດສັດທີ່ຕິດເຊື້ອມາກ່ອນ. ເຖິງຢ່າງໃດກໍຕາມ, ຍັງບໍ່ມີການຢືນຢັນການແຜ່ເຊື້ອຈາກຄົນສູ່ຄົນ.

     ວັນທີ 7 ກັນຍາ, ສູນຄວບຄຸມ ແລະ ປ້ອງກັນພະຍາດ ແລະ ກົມອະນາໄມ ແລະ ບໍລິການຜູ້ສູງອາຍຸຂອງລັດມິສຊູຣີ ລາຍງານວ່າ: ຄົນເຈັບໄວຜູ້ໃຫຍ່ທີ່ຕິດເຊື້ອໄຂ້ຫວັດສັດປີກເຂົ້າຮັບການປິ່ນປົວຢູ່ໂຮງໝໍໃນວັນທີ 22 ສິງຫາຜ່ານມາ ແລະ ໄດ້ຮັບຢາຕ້ານໄວຣັສໄຂ້ຫວັດໃຫຍ່ ກ່ອນຫາຍດີ ແລະ ກັບບ້ານໄດ້ໃນເວລາຕໍ່ມາ.

     ເຖິງຢ່າງໃດກໍຕາມ, ເນື່ອງຈາກອາການຂອງໄຂ້ຫວັດໃຫຍ່ຂອງລາວໜ້າສົງໄສ ແພດຈຶ່ງສົ່ງຄົນເຈັບໄປເຂົ້າຮັບການກວດເພີ່ມຕື່ມ ເຊິ່ງຜົນປາກົດວ່າເປັນເຊື້ອໄວຣັສໄຂ້ຫວັດສັດປີກຊະນິດ H5 ເຮັດໃຫ້ລາວກາຍເປັນຜູ້ຕິດເຊື້ອໄຂ້ຫວັດສັດປີກຄົນທີ 14 ຂອງອາເມລິກາໃນປີນີ້ ແລະ ເປັນຄົນທໍາອິດທີ່ມີການຢືນຢັນວ່າບໍ່ເຄີຍສໍາຜັດກັບສັດທີ່ຕິດເຊື້ອ.

     ທັງນີ້, ຍັງບໍ່ມີລາຍງານງົວນົມທີ່ຕິດເຊື້ອໄວຣັສໄຂ້ຫວັດສັດປີກພາຍໃນລັດມິສຊູຣີ ເຖິງວ່າພົບການຕິດເຊື້ອໃນຝູງຟາມໄກ່ພັນ, ໄກ່ບ້ານ ແລະ ນົກປ່າກໍຕາມ. ຂະນະທີ່ຜູ້ຕິດເຊື້ອໄຂ້ຫວັດສັດປີກໃນປະເທດທັງໝົດເປັນກໍາມະກອນໃນຟາມ ລວມທັງຜູ້ຕິດເຊື້ອຄົນທໍາອິດ ໃນປີ 2022.

     ໄຂ້ຫວັດສັດປີກມັກພົບໃນນົກ ຫລື ສັດປີກໃນປ່າ, ແຕ່ເມື່ອບໍ່ດົນມານີ້ ຖືກພົບໃນສັດລ້ຽງລູກດ້ວຍນົມ ແລະ ໃນປີີນີ້ ພົບການລະບາດໃນງົວທົ່ວປະເທດ ແລະ ສາມາດແຜ່ເຊື້ອສູ່ຄົນໄດ້ເປັນບາງຄັ້ງຄາວ ຜ່ານການສໍາຜັດໃກ້ຊິດ ຫລື ສະພາບແວດລ້ອມທີ່ມີການປົນເປື້ອນ.

     ເຖິງວ່າສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ປະເມີນແລ້ວວ່າ: ຄວາມສ່ຽງຂອງເຊື້ອໄວຣັສໄຂ້ຫວັດສັດປີກຕໍ່ປະຊາຊົນຍັງຢູ່ໃນລະດັບຕໍ່າ, ແຕ່ສະຖານະການອາດປ່ຽນແປງໄດ້ຢ່າງວ່ອງໄວ.

     ຢ້ອນກັບໄປເມື່ອຫລາຍທົດສະວັດຜ່ານມາ, ມີຜູ້ຕິດເຊື້ອໄວຣັສໄຂ້ຫວັດບາງກໍລະນີ ເຊິ່ງບໍ່ສາມາດລະບຸແຫລ່ງທີ່ມາຈາກສັດໄດ້, ແຕ່ມາຮອດປັດຈຸບັນ ຍັງບໍ່ມີຫລັກບົ່ງບອກຊັດເຈນວ່າ: ພະຍາດດັ່ງກ່າວສາມາດແຜ່ເຊື້ອຈາກຄົນສູ່ຄົນໄດ້, ແຕ່ຖ້າເກີດຂຶ້ນຈິງ ຈະເພີ່ມລະດັບຮຸນແຮງຂອງພະຍາດ.