ຄອງໂກ ສູນກາງການລະບາດຂອງພະຍາດໝາກສຸກລີງ ໄດ້ຮັບວັກຊີນຊຸດທໍາອິດແລ້ວ

     ຄອງໂກ ເຊິ່ງເປັນສູນກາງການແຜ່ລະບາດຂອງພະຍາດໝາກສຸກລີງ ໄດ້ຮັບວັກຊີນຊຸດທໍາອິດແລ້ວ ເຊິ່ງຈໍານວນເກືອບເຄິ່ງໜຶ່ງຂອງວັກຊີນ 200,000 ໂດສ ມາຈາກການບໍລິຈາກຂອງສະຫະພາບເອີຣົບ (EU) ແລະ ວັກຊີນທີ່ເຫລືອມີກໍານົດມາເຖິງປະເທດໃນທ້າຍອາທິດນີ້.

     ວັນທີ 6 ກັນຍາ, ສໍານັກຂ່າວຕ່າງປະເທດລາຍງານວ່າ: ຄອງໂກ ມີຜູ້ຕິດເຊື້ອພະຍາດໝາກສຸກລີງຫລາຍກວ່າ 19,000 ຄົນ ແລະ ມີຜູ້ເສຍຊີວິດຫລາຍກວ່າ 650 ຄົນ ຕາມຕົວເລກຫລ້າສຸດຈາກກະຊວງສາທາລະນະສຸກຂອງປະເທດ.

     “ວັກຊີນມາເຖິງຄອງໂກແລ້ວ ເຊິ່ງປັດຈຸບັນພວມຂົນສົ່ງໄປພື້ນທີ່ຈັດເກັບ ແລະ ໂຄງການສັກວັກຊີນອາດຈະເລີ່ມຂຶ້ນໃນທ້າຍເດືອນນີ້” ທ່ານ ລໍເຣນ ມູເຊລ ຫົວໜ້າສໍານັກງານການກຽມພ້ອມ ແລະ ການຕອບສະໜອງເຫດສຸກເສີນດ້ານສາທາລະນະສຸກ (ເຮຣາ) ຂອງ EU ກ່າວ.

     ທັງນີ້, ທ່ານ ຊາມູເອລ-ໂຣເຈີ ຄໍາບາ ລັດຖະມົນຕີກະຊວງສາທາລະນະສຸກຄອງໂກ ແລະ ທ່ານ ມູເຊລ ຢູ່ສະໜາມບິນສາກົນກິນຊາຊາ ຕອນເຮືອບິນຈາກນະຄອນຫລວງໂກເປັນເຮເກນ ປະເທດດານມາກ ເຊິ່ງບັນທຸກວັກຊີນປ້ອງກັນພະຍາດໝາກສຸກລີງຈໍານວນ 99,100 ໂດສ ລົງຈອດຕອນແລງວັນທີ 4 ກັນຍາ, ສ່ວນວັກຊີນທີ່ເຫລືອຈາກທັງໝົດ 200,000 ໂດສ ຈະມາເຖິງນະຄອນຫລວງກິນຊາຊາ ໃນວັນທີ 7 ກັນຍານີ້.

      ທ່ານ ມູເຊລ ກ່າວວ່າ: EU ແລະ ປະເທດສະມາຊິກບາງປະເທດ ຈະສົ່ງມອບວັກຊີນ 560,000 ໂດສ ໃຫ້ຄອງໂກ ແລະ ປະເທດອື່ນໆທີ່ໄດ້ຮັບຜົນກະທົບ. ຂະນະທີ່ສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາ ຊີດີຊີ) ລະບຸວ່າ: ມີການຈັດຫາວັກຊີນປ້ອງກັນພະຍາດໝາກສຸກລີງໃຫ້ປະເທດຕ່າງໆໃນອາຟຣິກາແລ້ວປະມານ 3.6 ລ້ານໂດສ ເຊິ່ງຄອງໂກ ຖືເປັນປະເທດທີ່ມີຄວາມສໍາຄັນສູງສຸດ ເນື່ອງຈາກເປັນສູນກາງຂອງການແຜ່ລະບາດຄັ້ງນີ້.

      ໜ່ວຍງານສາທາລະນະສຸກລະຫວ່າງປະເທດລະບຸວ່າ: ລັດຖະບານກິນຊາຊາມີແຜນຈະເລີ່ມໂຄງການສັກວັກຊີນໃນຕົ້ນເດືອນຕຸລານີ້ ເຊິ່ງທ່ານ ຄໍາບາ ຢືນຢັນວ່າ: ກະຊວງສາທາລະນະສຸກຂອງຄອງໂກມີປະສົບການພຽງພໍໃນການເກັບຮັກສາວັກຊີນຢ່າງຖືກຕ້ອງ ແລະ ມີວິທີດໍາເນີນງານດ້ານໂລຈິສຕິກເຊັ່ນກັນ.