ຜູ້ແທນສໍານັກງານກວດສອບແຫ່ງຊາດ ສປ ຈີນ ຢ້ຽມຢາມ ແລະ ເຮັດວຽກຢູ່ ສປປ ລາວ

ວັນທີ 5 ກັນຍາ 2024 ທີ່ ອົງການກວດສອບແຫ່ງລັດ ສປປ ລາວ, ສະຫາຍ ວຽງທະວີສອນ ເທບພະຈັນ ກຳມະການສໍາຮອງສູນກາງພັກ ປະທານອົງການກວດສອບແຫ່ງລັດ ສປປ ລາວ ໄດ້ໃຫ້ກຽດຕອນຮັບການເຂົ້າຢ້ຽມຂ່ຳນັບ ຂອງ ສະຫາຍ ມ່າ ເຫວີນຮຸຍ ຮອງປະທານສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 5-8 ກັນຍາ 2024.

ໃນໂອກາດດັ່ງກ່າວ, ສະຫາຍ ວຽງທະວີສອນ ເທບພະຈັນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ສະຫາຍ ມ່າ ເຫວີນຮຸ່ຍ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄືສອງອົງການກວດສອບແຫ່ງລັດ, ໂດຍສະເພາະການພົວພັນຮ່ວມມືດ້ານວຽກງານກວດສອບແຫ່ງລັດໃຫ້ນັບມື້ແໜ້ນແຟ້ນຍິ່ງໆຂຶ້ນ. ພ້ອມທັງຕີລາຄາຕໍ່ໝາກຜົນຂອງການຮ່ວມມືລະຫວ່າງສອງອົງການກວດສອບແຫ່ງລັດ ໃນໄລຍະປີຜ່ານມາ ເປັນຕົ້ນ: ໄດ້ມີການແລກປ່ຽນພົບປະຢ້ຽມຢາມການນໍາຂັ້ນສູງ ລະຫວ່າງ ສອງອົງການກວດສອບແຫ່ງລັດ ຢ່າງເປັນປົກກະຕິ; ສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບແຫ່ງລັດ ສປປ ລາວ ດ້ວຍການຝຶກອົບຮົມ, ການສໍາມະນາ, ການໄປທັດສະນະສຶກສາ ທັງຢູ່ສຳນັກງານກວດສອບແຫ່ງຊາດ ສປ ຈີນ ແລະ ຢູ່ບັນດາສໍານັກງານກວດສອບປະຈຳພາກ; ໄດ້ໃຫ້ທຶນຍົກລະດັບການສຶກສາລະດັບປະລິນຍາໂທ ແກ່ພະນັກງານອົງການກວດສອບແຫ່ງລັດຢ່າງເປັນປົກກະຕິ ແລະ ໃຫ້ການສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ, ແລະ ສາກົນ, ໝາກຜົນທີ່ເກີດຂຶ້ນໄດ້ ກໍຍ້ອນການຮ່ວມມືທີ່ດີ ການສະໜັບສະໜູນ ແລະ ການຊ່ວຍເຫລືອ ຂອງສຳນັກງານກວດສອບແຫ່ງຊາດ ສປ ຈີນ ຊຶ່ງໄດ້ປະກອບສ່ວນອັນສໍາຄັນ ໃຫ້ແກ່ການພັດທະນາ ແລະ ສ້າງຄວາມເຂັ້ມແຂງໃຫ້ແກ່ວຽກງານກວດສອບແຫ່ງລັດ ຂອງ ສປປ ລາວ ຕາມແນວທາງການເປັນ ຄູ່ຮ່ວມຊາຕາກຳລາວ-ຈີນ.

ພ້ອມນີ້ກໍໄດ້ມີກອງປະຊຸມປຶກສາຫາລືກັນ ເພີ່ມທະວີຮ່ວມມືວຽກງານກວດສອບແຫ່ງລັດ, ແລກປ່ຽນບົດຮຽນ ແລະ ຂໍ້ມູນຂ່າວສານ, ສ້າງຄວາມເຂັ້ມແຂງໃຫ້ພະນັກງານ ແລະ ອື່ນໆອີກ.