ລັດຖະມົນຕີກະຊວງການເງິນ ເນັ້ນໃຫ້ແຂວງຈໍາປາສັກ ເອົາໃຈໃສ່ຈັດເກັບລາຍຮັບເຂົ້າງົບປະມານໃຫ້ບັນລຸຕາມແຜນການ

ວັນທີ 2 ກັນຍາ 2024, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານການເງິນຮອບດ້ານ ຢູ່ແຂວງຈໍາປາສັກ, ເພື່ອຊີ້ນຳການຈັດຕັ້ງປະຕິບັດວຽກງານຂະຫຍາຍຖານລາຍຮັບ, ການຄຸ້ມຄອງລາຍຈ່າຍ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ – ການເງິນ ແລະ ວ່າດ້ວຍການແກ້ໄຂບັນຫາຢາເສບຕິດ, ການຈັດຕັ້ງຜັນຂະຫຍາຍມະຕິ ຂອງກົມການເມືອງສູນກາງພັກ ເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່.

ໂອກາດນີ້, ທ່ານ ສັນຕິພາບ ພົມວິຫານ ໄດ້ເນັ້ນໃຫ້ຄະນະພັກ – ຄະນະນໍາພະແນກການເງິນແຂວງ ແລະ ການນໍາຂະແໜງການ 3 ສາຍຕັ້ງ ເອົາໃຈໃສ່ນໍາພາ – ຊີ້ນໍາ ການຈັດເກັບລາຍຮັບເຂົ້າງົບປະມານ ໃຫ້ບັນລຸຕາມແຜນການ ແລະ ລື່ນແຜນການທີ່ວາງໄວ້, ຮັບປະກັນໄດ້ລາຍຈ່າຍທີ່ເປັນບຸລິມະສິດຂອງລັດຖະບານ ກໍຄືຂອງແຂວງ ເປັນຕົ້ນເງິນເດືອນ, ເງິນນະໂຍບາຍ, ເງິນອຸດໜູນຕ່າງງໃນແຕ່ລະເດືອນ, ຈັດສັນເບີກຈ່າຍເງິນບໍລິຫານ, ດັດສົມ ແລະ ສົ່ງເສີມວິຊາການ ເພື່ອໃຫ້ກົງຈັກຂອງລັດໄດ້ເຄື່ອນໄຫວຢ່າງເປັນປົກະຕິ ເຮັດໃຫ້ສະພາບເສດຖະກິດເຂົ້າສູ່ສະພາບປົກກະຕິໂດຍໄວ.

ໃນໄລຍະ 8 ເດືອນຜ່ານມາຂອງປີນີ້  ແຂວງຈໍາປາສັກ ຈັດເກັບລາຍຮັບແຜນງົບປະມານໄດ້ແລ້ວຫຼາຍກວ່າ 1.969 ຕື້ກີບ ຫລື ປະຕິບັດໄດ້ 82,79% ຂອງແຜນການປີ,  ທຽບໃສ່ໄລຍະດຽວກັນຂອງປີກ່ອນ ເພີ່ມຂຶ້ນ 49,91%.  ສ່ວນລາຍຈ່າຍງົບປະມານໃນທົ່ວແຂວງປະຕິບັດໄດ້ 554,19 ຕື້ກີບ, ທຽບໃສ່ແຜນການປີ ປະຕິບັດໄດ້ 68,13%  ແລະ ມີຍອດເຫລືອງົບປະມານ 345,25 ຕື້ກີບ.