ຕໍາຫລວດຖະແຫລງຜົນການມ້າງຂະບວນສໍ້ໂກງຊັບພົນລະເມືອງຕົວອັນຕະລາຍ

ໃນວັນທີ 3 ມີນານີ້, ທ່ານພັນເອກ ຄຳຜອງ ວິຈິດ ຫົວໜ້າກົມຕຳຫລວດສືບສວນ-ສອບສວນໄດ້ຖະແຫລງຜົນການມ້າງຂະບວນການສໍ້ໂກງຊັບພົນລະເມືອງຕົວອັນຕະລາຍ, ໂດຍແອບອ້າງວ່າສາມາດວິ້ງເຕັນເອົາລູກຫລານຂອງປະຊາຊົນເຂົ້າຮຽນຕຳຫລວດ ຫລື ເປັນຕຳຫລວດ, ເຊິ່ງມີຜູ້ຕົກເປັນເຫຍື່ອແລ້ວເປັນຈໍານວນຫລາຍ.

ຫົວໜ້າກົມຕໍາຫລວດສືບສວນ-ສອບສວນ ກ່າວວ່າ: ພາຍຫລັງໄດ້ຮັບແຈ້ງ ວ່າມີກຸ່ມຄົນຈຳນວນໜຶ່ງເຄື່ອນໄຫວຕົວະຍົວະຫລອກລວງປະຊາຊົນວ່າສາມາດແລ່ນເອົາລູກຫລານຂອງເຂົາເຈົ້າເຂົ້າເປັນຕຳຫລວດ ແລະ ຮຽນຕຳຫລວດ, ໂດຍມີການຈ້າງເງິນເປັນຈຳນວນຫລາຍ. ຈຶ່ງໄດ້ແຕ່ງຕັ້ງກໍາລັງຕິດຕາມກວດກາຂະບວນການດັ່ງກ່າວ ແລະ ສາມາດຈັບຜູ້ກະທຳຜິດມາດໍາເນີນຄະດີໄດ້ 4 ຄົນຄື: ທ້າວ ວົງສະຫວັນ ອາຍຸ 55 ປີຢູ່ບ້ານທາດຫລວງເມືອງໄຊເສດຖາ, ນາງ ເຂັມເພັດ ອາຍຸ 56 ປີຢູ່ບ້ານດອນນົກຂຸມເມືອງສີສັດຕະນາກ, ນາງ ແສງມະນີ ອາຍຸ 23 ປີຢູ່ບ້ານສີວິໄລເມືອງໄຊທານີ ແລະ ນາງ ທອງໄພ່ ອາຍຸ 25 ປີຢູ່ບ້ານຄຳສະຫວາດເມືອງໄຊເສດຖາ, ນະຄອນຫລວງວຽງຈັນ.

ຜ່ານການສືບສວນ-ສອບສວນພວກກ່ຽວຮັບສາລະພາບວ່າ: ພວກຕົນໄດ້ເຄື່ອນໄຫວຕົວະຍົວະຫລອກລວງປະຊາຊົນຢູ່ນະຄອນຫລວງວຽງຈັນ ແລະ ທ້ອງຖິ່ນຕ່າງໆ, ໂດຍອ້າງວ່າຮູ້ຈັກຜູ້ໃຫຍ່ທີ່ເປັນການນຳໃນກະຊວງປ້ອງກັນຄວາມສະຫງົບທີ່ສາມາດແລ່ນເຂົ້າຮຽນຕຳຫລວດໄດ້, ໂດຍມີການປອມແປງເອກະສານທາງລັດຖະການ ເຊັ່ນ: ຂໍ້ຕົກລົງຂອງລັດຖະມົນຕີກະຊວງ ປກສ ວ່າດ້ວຍການຮັບຮອງເອົານັກຮຽນ ມ.7 ເຂົ້າຮຽນນາຍສິບຢູ່ໂຮງຮຽນປ້ອງກັນເຄື່ອນທີ່ເພື່ອຢັ້ງຢືນໃຫ້ຜູ້ເປັນເຫຍື່ອຫລົງເຊື່ອ ແລະ ຍອມຈ່າຍເງິນກ່ອນທຸກຄັ້ງໃນລາຄາເລີ່ມຕົ້ນແຕ່ 4-5 ພັນບາດ (ສະກຸນເງິນໄທ) ຕໍ່ຄົນ, ຖ້າບໍ່ໄດ້ແມ່ນສົ່ງເງິນຄືນ ແລະ ພາຍຫລັງໄດ້ເງິນມາກໍແບ່ງປັນກັນ, ໂດຍມີຜູ້ຕົກເປັນເຫຍື່ອພວກເຂົາທັງໝົດ 52 ລາຍ, ລວມມີມູນຄ່າເສຍຫາຍຫລາຍກວ່າ 464 ລ້ານກີບ ແລະ 7 ລ້ານກວ່າບາດ. ຈາກກໍລະນີດັ່ງກ່າວ, ຈຶ່ງຂໍຝາກເຕືອນປະຊາຊົນຈົ່ງມີສະຕິລະວັງຕົວຫລາຍຂຶ້ນເພື່ອບໍ່ໃຫ້ຕົກເປັນເຫຍື່ອຂອງຂະບວນການສໍ້ໂກງຊັບພົນລະເມືອງໃນຮູບແບບຕ່າງໆ ແລະ ຖ້າຫາກພົບເຫັນກຸ່ມຄົນທີ່ມີການເຄື່ອນໄຫວລັກສະນະທີ່ບໍ່ດີຂໍໃຫ້ແຈ້ງເຈົ້າໜ້າທີ່ໂດຍໄວເພື່ອຈະໄດ້ກວດກາ, ແກ້ໄຂໃຫ້ທັນການ ສະກັດກັ້ນບໍ່ໃຫ້ກຸ່ມຄົນບໍ່ດີເຫລົ່ານັ້ນເຄື່ອນໄຫວຕົວະຍົວະຫລອກລວງເອົາຊັບສີນເງິນຄໍາຂອງປະຊາຊົນຕໍ່ໄປອີກ.