ຫົວໜ້າຄະນະຈັດຕັ້ງສູນກາງພັກ ເນັ້ນໃຫ້ພະແນກສຶກສາທິການ ແລະ ກິລາແຂວງອັດຕະປື ເອົາໃຈໃສ່ຊອກຫາວິທີແກ້ໄຂບັນຫາປະລະການຮຽນ

ວັນທີ 2 ກັນຍາ 2024, ທ່ານ ນາງ ສີໃສ ລືເດດມູນສອນ ຫົວໜ້າຄະນະຈັດຕັ້ງສູນກາງພັກ ໄດ້ເຄື່ອນໄຫວເຮັດວຽກຢູ່ແຂວງອັດຕະປື ແລະ ພົບປະໂອ້ລົມພະນັກຫລັກແຫລ່ງພະແນກສຶກສາທິການ ແລະ ກິລາແຂວງ, ພ້ອມທັງໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດຕົວຊີ້ບອກຂອງການສຶກສາໃນແຕ່ລະຊັ້ນຮຽນ ເຊິ່ງວຽກງານການສຶກສາເປັນວຽກງານປາຍແຫລມສຳຄັນໃນການພັດທະນາ ການຈັດການຮຽນ-ການສອນ ຕາມຫລັກສູດໂຄງການ ທີ່ກະຊວງສຶກສາ-ກິລາໄດ້ກຳນົດໄວ້.

ໂອກາດນີ້, ທ່ານ ຫົວໜ້າຄະນະຈັດຕັ້ງສູນກາງພັກ ໄດ້ເນັ້ນພະແນກສຶກສາທິການ ແລະ ກິລາແຂວງ ສືບຕໍ່ຊີ້ນຳ ນຳພາ, ຊຸກຍູ້ຕິດຕາມ ແລະ ກວດກາໜ້າວຽກຮອບດ້ານຕິດພັນ ກັບຄວາມຮັບຜິດຊອບຂອງຕົນໃຫ້ທັນກັບສະພາບການໃນແຕ່ລະໄລຍະ, ຈົ່ງພ້ອມກັນສືບຕໍ່ເປັນເຈົ້າການເອົາໃຈໃສ່ສຸມທຸກສະຕິປັນຍາ ເພື່ອຊອກຫາວິທີແກ້ໄຂບັນຫາການປະລະການຮຽນຂອງນັກຮຽນໃນແຕ່ລະຊັ້ນຮຽນ ເຊິ່ງບັນຫາດັ່ງກ່າວນີ້ແມ່ນເປັນສິ່ງທ້າທາຍຕໍ່ຂະແໜງການສຶກສາ ແລະ ເປັນຄວາມຮັບຜິດຊອບຂອງທຸກພາກສ່ວນທີ່ຈະຕ້ອງໄດ້ເອົາໃຈໃສ່ໃນການແກ້ໄຂຮ່ວມກັນ, ໃນນັ້ນຂະແໜງການສຶກສາຈະຕ້ອງໄດ້ສືບຕໍ່ປະສານສົມທົບກັບອຳນາດການປົກຄອງໃນແຕ່ລະຂັ້ນ ເພື່ອເຮັດໃຫ້ບັນຫາດັ່ງກ່າວໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ.