ກະຊວງສຶກສາຈະສຸມທຸກກຳລັງແຮງເຮັດໃຫ້ ສົກຮຽນໃໝ່ 2024-2025 ມີການຫັນປ່ຽນທີ່ດີຂຶ້ນ
ວັນທີ 2 ກັນຍາ 2024 ນີ້, ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີໄຂສົກຮຽນໃໝ່ ສົກຮຽນ 2024-2025 ເອກະພາບທົ່ວປະເທດ ດ້ວຍບັນຍາກາດຟົດຟື້ນ, ໂດຍການ ເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີຄະນະລັດຖະມົນຕີ, ອະດີດການນຳຂັ້ນສູງ ແລະ ຂະແໜງສຶກສາເຂົ້າຮ່ວມ.
ທ່ານ ພຸດ ສິມມາລາວົງ ກ່າວວ່າ: ສົກຮຽນໃໝ່ 2024-2025 ແມ່ນເປັນອີກສົກຮຽນໜຶ່ງທີ່ມີຄວາມສໍາຄັນຫລາຍ ເພາະເປັນສົກຮຽນສຸດທ້າຍໃນການປະຕິບັດແຜນພັດທະນາການສຶກສາ, ວິທະຍາສາດ ແລະ ກິລາ ໄລຍະ 5 ປີ ຄັ້ງທີ IX ແລະ ຈະດໍາເນີນຢູ່ໃນເງື່ອນໄຂທີ່ມີທັງຂໍ້ສະດວກ ແລະ ສິ່ງທ້າທາຍຫລາຍຢ່າງເປັນຕົ້ນແມ່ນ ການຂາດແຄນຄູ, ອັດຕາການເຂົ້າຮຽນຂອງນັກຮຽນອາດຈະຍັງຕໍ່າ, ອັດຕາການປະລະອາດຈະຍັງສູງ ແລະ ຄວາມຫຍຸ້ງຍາກທາງດ້ານຊີວິດການເປັນຢູ່ກໍຄືເງື່ອນໄຂໃນການປະຕິ ບັດໜ້າທີ່ຂອງຄູອາຈານ ແລະ ຜູ້ບໍລິຫານອາດຈະຍັງມີຄວາມຫຍຸ້ງຍາກ. ຕໍ່ໜ້າສະພາບ ແລະ ສິ່ງທ້າທາຍດັ່ງກ່າວ, ພັກ ແລະ ລັດຖະບານ ຍາມໃດກໍໄດ້ເອົາໃຈໃສ່ ແລະ ເປັນຫ່ວງເປັນໄຍຕໍ່ວຽກງານການສຶກສາ, ວິທະຍາສາດ ແລະ ກິລາ ແລະ ມອບໝາຍວຽກງານດັ່ງກ່າວໃຫ້ພວກເຮົາເພື່ອເຮັດໃຫ້ມີການຫັນປ່ຽນທີ່ດີຂຶ້ນໃນສົກຮຽນໃໝ່ນີ້.
ດັ່ງນັ້ນ ກະຊວງສຶກສາທິການ ແລະ ກິລາ ຈະໄດ້ສຸມທຸກກຳລັງແຮງ, ນໍາໃຊ້ຊັບພະຍາກອນທີ່ມີ ພ້ອມທັງເພີ່ມຄວາມຮັບຜິດຊອບຂອງບຸກຄະລາກອນ ພາຍໃນຂົງເຂດຂອງຕົນ ແລະ ປະສານສົມທົບກັບ ຂະແໜງການ ແລະ ພາກສ່ວນທີ່ກ່ຽວຂ້ອງອື່ນໆ ເພື່ອເຮັດໃຫ້ການດຳເນີນການຮຽນການສອນ ໃນສົກຮຽນນີ້ເປັນຂະບວນຝົດຟຶ້ນກວ່າເກົ່າ, ເຮັດໃຫ້ຕົວເລກຄາດໝາຍຂອງຂະແໜງການສຶກສາ, ວິທະຍາສາດ ແລະ ກິລາ ບັນລຸຕາມຄາດໝາຍໃຫ້ຫລາຍຂຶ້ນກວ່າເກົ່າ.
