ອາຟຣິກາໃຕ້ມີຜູ້ຕິດເຊື້ອພະຍາດໝາກສຸກລີງເພີ່ມຂຶ້ນເກືອບ 4,000 ຄົນໃນອາທິດດຽວ ແຕ່ຍັງລໍຖ້າວັກຊີນ
ໜ່ວຍງານສາທາລະນະສຸກຂອງທະວີບອາຟຣິກາຢືນຢັນ ການພົບຜູ້ຕິດເຊື້ອພະຍາດໝາກສຸກລີງເພີ່ມຂຶ້ນເກືອບ 4,000 ຄົນໃນອາທິດດຽວ, ແຕ່ການຊ່ວຍເຫລືອຈາກນາໆຊາດເລື່ອງວັກຊີນເປັນໄປຢ່າງຊັກຊ້າ.
ວັນທີ 2 ກັນຍາ, ສໍານັກຂ່າວຕ່າງປະເທດລາຍງານວ່າ: ສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາ ຊີດີຊີ) ລາຍງານວ່າ: ໃນອາທິດຫລ້າສຸດ ຈົນຮອດວັນທີ 28 ສິງຫາຜ່ານມາ ມີການຢືນຢັນຜູ້ຕິດເຊື້ອພະຍາດໝາກສຸກລີງຢູ່ພາກພື້ນເພີ່ມຂຶ້ນອີກເກືອບ 4,000 ຄົນ ເຊິ່ງເປັນສະຖິຕິເພີ່ມຂຶ້ນຫລາຍ ເມື່ອທຽບໃສ່ການຢືນຢັນຜູ້ຕິດເຊື້ອທີ່ເພີ່ມຂຶ້ນປະມານ 1,200 ຄົນ ໃນອາທິດກ່ອນໜ້ານັ້ນ.
ຂະນະທີ່ຈໍານວນຜູ້ເສຍຊີວິດຈາກພະຍາດໝາກສຸກລີງໃນອາທິດຫລ້າສຸດ ມີການຢືນຢັນເພີ່ມອີກ 81 ຄົນ ເຮັດໃຫ້ສະຖິຕິຜູ້ຕິດເຊື້ອສະສົມຈາກພະຍາດໝາກສຸກລີງຢູ່ອາຟຣິກາມີຢ່າງໜ້ອຍ 22,863 ຄົນ ນັບແຕ່ຕົ້ນປີນີ້ ແລະ ເສຍຊີວິດແລ້ວ 622 ຄົນ ໂດຍຄອງໂກຍັງເປັນປະເທດມີຜູ້ຕິດເຊື້ອ ແລະ ຜູ້ເສຍຊີວິດສະສົມຫລາຍທີ່ສຸດ.
ເຖິງຢ່າງໃດກໍຕາມ, ເກືອບທຸກປະເທດຢູ່ທະວີບອາຟຣິກາຍັງລໍຖ້າວັກຊີນ ໂດຍສະເພາະຄອງໂກ ເຊິ່ງເປັນສູນກາງຂອງການແຜ່ລະບາດຮອບນີ້ ແລະ ເຮັດໃຫ້ອົງການອະນາໄມໂລກ (WHO) ປະກາດສະຖານະການສຸກເສີນດ້ານສາທາລະນະສຸກລະຫວ່າງປະເທດຈາກພະຍາດໝາກສຸກລີງ ເປັນຄັ້ງທີສອງໃນຮອບ 2 ປີ ໃນເດືອນສິງຫາຜ່ານມາ.
ເຖິງວ່າກຸ່ມປະເທດຕາເວັນຕົກຫລາຍແຫ່ງໃຫ້ຄໍາໝັ້ນການບໍລິຈາກວັກຊີນປ້ອງກັນພະຍາດໝາກສຸກລີງໃຫ້ຄອງໂກ ລວມກັນປະມານ 380,000 ໂດສ, ແຕ່ຈໍານວນດັ່ງກ່າວຍັງບໍ່ຮອດ 15% ຂອງໜ່ວຍງານຫລາຍແຫ່ງປະເມີນວ່າ: ຈະພຽງພໍຄວບຄຸມການແຜ່ລະບາດຂອງພະຍາດໃນປະເທດແຫ່ງນີ້.
ໄນຈີເຣຍເປັນປະເທດທໍາອິດໃນທະວີບອາຟຣິກາ ທີ່ໄດ້ຮັບບໍລິຈາກວັກຊີນປ້ອງກັນພະຍາດໝາກສຸກລີງຈາກອາເມລິກາ ຈໍານວນ 10,000 ໂດສ ໃນອາທິດຜ່ານມາ.
