ຮັບປະກັນເຮັດໃຫ້ສົກຮຽນໃໝ່ເປັນສົກຮຽນທີ່ມີຄຸນນະພາບສູງ ຕ້ອງປັບປຸງຫລາຍດ້ານ
ໂດຍ: ຜາຕຸງ
ມື້ນີ້ ວັນທີ 1 ກັນຍາ ແມ່ນວັນໜຶ່ງ ທີ່ມີຄວາມໝາຍສໍາຄັນຂອງຂະແໜງການສຶກສາ, ຊຶ່ງນັກຮຽນນັກສຶກສາ, ຄູອາຈານ ແລະ ພໍ່ແມ່ຜູ້ປົກຄອງ ໃນຂອບເຂດທົ່ວປະເທດ ກໍາລັງກຽມຈິດໃຈ ເພື່ອເຂົ້າຮ່ວມມື້ທໍາອິດຂອງການໄຂສົກຮຽນໃໝ່ ສົກຮຽນ 2024-2025 ໂດຍປະຕິບັດຕາມແຜນພັດທະນາການສຶກສາ ແລະ ກິລາ 5 ປີຄັ້ງທີ IX (2021 2025) ໂດຍສະເພາະເສີມຂະຫຍາຍສິ່ງທີ່ເຮັດໄດ້ດີ ແລະ ແກ້ໄຂຂໍ້ຄົງຄ້າງໃນສົກຮຽນຜ່ານມາ ເປັນຕົ້ນແມ່ນອັດຕາການເຂົ້າຮຽນ, ຄຸນນະ ພາບການຮຽນ-ການສອນ ແລະ ຄຸນນະພາບຂອງຜູ້ຮຽນ.
ແຕ່ແນວໃດກໍຕາມ, ໃນສົກຮຽນໃໝ່ 2024-2025 ນີ້ ຖືກວັນອາທິດ ຈຶ່ງຈະໄດ້ມີການເປີດຢ່າງເປັນທາງການໃນວັນຈັນ ວັນທີ 2 ກັນຍາ 2024 ກໍຄືມື້ອື່ນນີ້ ເຊິ່ງປີນີ້ພວກເຮົາພົບກັບຄວາມຫຍຸ້ງຍາກ, ສິ່ງທ້າທາຍ ແລະ ອຸປະສັກຫລາຍຢ່າງ ຍັງສືບຕໍ່ທົດສອບຕໍ່ວຽກງານການສຶກສາຂອງພວກເຮົາ ໂດຍສ ເພາະດ້າານເສດຖະກິດ, ໄວໜຸ່ມຍິງໜຸ່ມເລີ່ມຫັນຫຼັງໃສ່ການສຶກສາຫຼາຍຂຶ້ນ ຫັນໄປອອກແຮງງານສ້າງລາຍຮັບຈູນເຈືອຄອບຄົວ ເຮັດໃຫ້ຜູ້ປົກຄອງຫຼາຍຄອບຄົວຕ້ອງປວດຫົວກັບຄ່າຮຽນຂອງລູກຫຼານ ແຕ່ກໍຕ້ອງໄດ້ຕັດສິນໃຈສົ່ງເສີມໃຫ້ລູກຫຼານໄດ້ຮຽນ ເພາະການສຶກສາຮຽນຮູ້ບໍ່ເຄີຍຢຸດຕິ ບໍ່ວ່າຈະຢູ່ໃນພາວະທີ່ສັງຄົມມີຄວາມສະດວກ ຫລື ຫຍຸ້ງຍາກ, ນັກຮຽນ-ນັກສຶກສາ ກໍຕ້ອງໄດ້ຮັບການສຶກສາຢ່າງຕໍ່ເນື່ອງ.
ເພື່ອຮັບປະກັນໃຫ້ການຮຽນ-ການສອນ ໃນສົກຮຽນ 2024-2025 ດຳເນີນໄປຢ່າງມີປະສິດທິຜົນ ແລະ ຮັບປະກັນຄຸນນະພາບຂັ້ນພື້ນຖານ, ສືບຕໍ່ແກ້ໄຂບັນຫາທີ່ພົບພໍ້ໃນສົກຮຽນຜ່ານມາ ເປັນຕົ້ນ ອັດຕາການປະລະການຮຽນ, ການຂາດຄູສອນ ແລະ ການ ເຂົ້າຮຽນສາຍອາຊີວະ ແລະ ການສຶກສາຊັ້ນສູງ; ເພື່ອສ້າງພື້ນຖານທີ່ໜັກແໜ້ນໃຫ້ແກ່ການພັດທະນາເສດຖະກິດ ແລະ ສັງຄົມ ຈຶ່ງຮຽກຮ້ອງເຖິງຜູ້ບໍລິ ຫານການສຶກສາ-ຄູອາຈານ ສືບຕໍ່ປັບປຸງສະພາບແວດລ້ອມ ຂອງສະຖານການສຶກສາໃຫ້ເອື້ອອຳນວຍ ແລະ ສ້າງແຮງຈູງໃຈ ໃຫ້ນັກ ຮຽນກັບມາຮຽນຄືນ ແລະ ຮຽນຢ່າງມີຄວາມສຸກ; ພ້ອມທັງເນັ້ນ ໃຫ້ຄູອາຈານ ເອົາໃຈໃສ່ສິດ ສອນຢ່າງໝົດຈິດໝົດໃຈ, ຈິງໃຈແລກປ່ຽນຄວາມຮູ້ ປະສົບການກັບຜູ້ຮຽນ ດ້ວຍຄວາມຮັບ ຜິດຊອບສູງກວ່າເກົ່າ ໃຫ້ຜູ້ປົກຄອງເພີ່ມທະວີບົດບາດຂອງຕົນ ຕໍ່ການຮຽນຂອງລູກຫລານຕົນໃຫ້ຫລາຍຂຶ້ນ, ຕິດ ຕາມການຮຽນຂອງລູກຫລານ ແລະ ຊຸກຍູ້ໃຫ້ເຂົາເຈົ້າຮຽນເປັນປົກກະຕິ, ພ້ອມທັງຊ່ວຍອຳນວຍຄວາມສະດວກໃຫ້ບັນດາສື່ ແລະ ອຸປະກອນ ທີ່ໃຊ້ໃນການຮຽນ-ການສອນ, ພ້ອມທັງຕິດຕາມພຶດຕິກໍາຂອງລູກຫລານຕົນຢ່າງໃກ້ຊິດ.
ສິ່ງສຳຄັນ ແມ່ນໃຫ້ນັກຮຽນ-ນັກສຶກສາ ເອົາໃຈໃສ່ຄົ້ນຄວ້າຮ່ຳຮຽນ ແລະ ຝຶກ ຝົນຫລໍ່ຫລອມຕົນເອງໃຫ້ຄຸນສົມບັດທີ່ດີ, ປະຕິບັດລະບຽບໂຮງຮຽນຢ່າງເຄັ່ງຄັດ, ແຂ່ງຂັນກັນຮຽນດີ-ຮຽນເກັ່ງ, ໃຊ້ເວລາຫວ່າງໃຫ້ເປັນປະໂຫຍດ, ບໍ່ຫຍຸ້ງກ່ຽວກັບຢາເສບຕິດ ແລະ ສິ່ງມຶນເມົາຕ່າງໆ ເພາະການສຶກສາ ແມ່ນການສ້າງຊັບພະຍາກອນມະນຸດຊັບພະຍາກອນບຸກຄົນ, ເປັນກໍາລັງແຮງ, ເປັນປັດໃຈສໍາຄັນຍິ່ງ ທີ່ມີລັກສະນະຕັດສິນກວ່າໝູ່ ໃນການພັດທະນາປະເທດຊາດ ຂອງທຸກຍຸກທຸກສະໄໝ.
ພັກເຮົາຍາມໃດກໍ່ໃຫ້ທິດທາງ,ນະໂຍບາຍ ທີ່ໜັກແໜ້ນຕະຫຼອດມາວ່າ : ການສຶກສາຕ້ອງໄປກ່ອນກ້າວໜຶ່ງ, ຕະຫຼອດໄລຍະທີ່ຜ່ານມາ ລັດຖະບານທຸກຍຸກ ທຸກສະໄໝ ໄດ້ເອົາໃຈໃສ່ວຽກງານການພັດທະນາການສຶກສາ ຢ່າງບໍ່ຢຸດຢັ້ງ ແລະ ໄດ້ມີການພັດທະນາ ເປັນຮູບປະທຳຕະຫຼອດມາ ແລະ ຈະສືບຕໍ່ໃຫ້ຄວາມເອົາໃຈໃສ່ວຽກງານພັດທະນາການສຶກສາ ຂອງຊາດເຮົາຕໍ່ໄປ ເພື່ອສ້າງຄົນລາວ ໃຫ້ມີຄວາມຮູ້, ຄວາມສາມາດສູງຂຶ້ນ, ມີຄຸນສົມບັດສິນທໍາປະຕິວັດ ແລະ ມີຄ່ານິຍົມທີ່ຖືກຕ້ອງ, ມີສຸຂະ ພາບແຂງແຮງທາງ ດ້ານຮ່າງກາຍ ແລະ ຈິດໃຈ, ຮັກຄວາມກ້າວໜ້າ ແລະ ມີວິທະຍາສາດ ສາມາດຕອບສະໜອງຄວາມຮຽກຮ້ອງຕ້ອງການ ຂອງການພັດທະນາປະເທດຊາດ ໃນໄລຍະ ໃນການປົກປັກຮັກສາ ແລະ ສ້າງສາປະເທດຊາດ ໃຫ້ຈະເລີນກ້າວໜ້າ ສືບຕໍ່ໄປ ຢ່າງບໍ່ຢຸດຢັ້ງ ດັ່ງນັ້ນ, ພາລະໜ້າທີ່ຂອງຜູ້ບໍລິຫານການສຶກສາ, ຄູອາຈານ ຈຶ່ງເປັນຜູ້ທີ່ມີຄວາມຮັບຜິດຊອບພິເສດ ຕໍ່ພາລະກິດການສຶກສາຂອງຊາດ ຂອງພວກເຮົາ ໃນປະຈຸບັນ ແລະ ອະນາຄົດ
