ມາເລເຊຍເດີນໜ້າຄົ້ນຫານັກທ່ອງທ່ຽວອິນເດຍສູນຫາຍຈາກເຫດດິນຍຸບຢູ່ກົວລາລໍາເປີມື້ທີ 7

      ທາງການມາເລເຊຍເດີນໜ້າຄົ້ນຫານັກທ່ອງທ່ຽວເພດຍິງຊາວອິນເດຍອາຍຸ 48 ປີ ທີ່ສູນຫາຍເປັນມື້ທີ 7 ພາຍຫລັງຕົກລົງໄປໃນດິນຍຸບເລິກ 8 ແມັດ ລະຫວ່າງຍ່າງຢູ່ເຂດ Jalan Masjid India ເຊິ່ງເປັນເຂດການຄ້າຢູ່ນະຄອນຫລວງກົວລາລໍາເປີ ໃນວັນທີ 23 ສິງຫາຜ່ານມາ.

      ໂດຍໜ່ວຍກູ້ໄພ ພ້ອມທີມເຈົ້າໜ້າທີ່ຄວາມໝັ້ນຄົງ, ຕໍາຫລວດ ແລະ ໝາດົມກິ່ນ ໄດ້ຮ່ວມມືຄົ້ນຫາຢ່າງຕໍ່ເນື່ອງ ແລະ ກວດພົບສິ່ງກີດຂວາງໃນທໍ່ລະບາຍນໍ້າທີ່ຢູ່ຫ່າງຈາກຈຸດເກີດດິນຍຸບປະມານ 80 ແມັດ.

      ຫລ້າສຸດຕອນເຊົ້າວັນທີ 30 ສິງຫານີ້, ໜ່ວຍກູ້ໄພໄດ້ສົ່ງນັກດໍານໍ້າ 2 ຄົນ ລົງຄົ້ນຫາໃນທໍ່ລະບາຍນໍ້າແລ້ວ, ແຕ່ເນື່ອງຈາກກະແສນໍ້າໄຫລແຮງໃນອຸໂມງລະບາຍນໍ້າເຮັດໃຫ້ຕ້ອງຢຸດຄົ້ນຫາ ເພາະບໍ່ສາມາດໄປເຖິງຈຸດທີ່ສົງໄສວ່າມີສິ່ງກີດຂວາງທີ່ອາດເປັນຮ່າງຂອງນັກທ່ອງທ່ຽວອິນເດຍໄດ້ ໂດຍທີມນັກດໍານໍ້າຈະມີການລົງຄົ້ນຫາອີກພາຍຫລັງລະດັບນໍ້າຫລຸດລົງ.

     ທັງນີ້, ນອກຈາກດິນຍຸບດັ່ງກ່າວ ຍັງເກີດຂຸມຍຸບຈຸດທີ 2 ຫ່າງຈາກຈຸດທໍາອິດປະມານ 50 ແມັດ ໂດຍທາງການໄດ້ສັ່ງປິດຖະໜົນໃນເຂດດັ່ງກ່າວໄລຍະທາງ 400 ແມັດແລ້ວ, ແຕ່ຍັງເປີດໃຫ້ໃຊ້ທາງຍ່າງ. ຂະນະທີ່ກວດສອບພື້ນທີ່ ລວມທັງລະບົບທໍ່ລະບາຍນໍ້າອ້ອມຮອບຢ່າງລະອຽດ ແລະ ສັ່ງຢຸດການດໍາເນີນໂຄງການກໍ່ສ້າງໃໝ່ຕ່າງໆ ພາຍໃນເມືອງຈົນກວ່າຈະໝັ້ນໃຈໃນຄວາມປອດໄພ.

ອ້າງອີງ:

• https://www.thevibes.com/articles/news/103237/search-for-sinkhole-victim-enters-day-7
• https://www.channelnewsasia.com/asia/kl-sinkhole-jalan-masjid-india-day-6-missing-tourist-integrity-audit-4572186