ສປປ ລາວ ເປັນເຈົ້າພາບ ຈັດກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18
ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ຈັດຂື້ນໃນວັນທີ 28 ສິງຫາ 2024, ທີ່ນະຄອນຫຼວງວຽງຈັນມີ ໂດຍການເປັນປະ ທານ ຂອງ ພົນເອກ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ. ເພື່ອປຶກສາຫາລື ແລະ ຮັບຮອງເອົາຫລາຍບັນຫາທີ່ສໍາຄັນ ສໍາລັບການຕ້ານອາຊະຍາກຳຂ້າມຊາດ ໃຫ້ມີໝາກຜົນດີ, ເຮັດໃຫ້ພາກພື້ນມີຄວາມສະຫງົບປອດໄພດີກວ່າເກົ່າ.
ພົນເອກ ວິໄລ ຫລ້າຄໍາຟອງ ກ່າວວ່າ: ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແມ່ນກົນໄກ ປຶກສາຫາລືລະດັບສູງທີ່ມີບົດບາດສໍາຄັນໃນການສົ່ງເສີມການຮ່ວມມື ເພື່ອສະກັດກັ້ນ ແລະ ຕ້ານອາຊະຍາກຳຂ້າມຊາດ. ເຊິ່ງບັນຫາອາຊະຍາກຳຂ້າມຊາດເປັນບັນຫາລວມຂອງວົງຄະນາຍາດສາກົນ, ມີຄວາມສະຫລັບສັບຊ້ອນ ສາມາດເກີດຂຶ້ນໄດ້ຢູ່ທຸກພາກພື້ນ ແລະ ບໍ່ມີປະເທດໃດຈະສາມາດແກ້ໄຂບັນຫາດັ່ງກ່າວໄດ້ດ້ວຍຕົນເອງ. ສປປ ລາວ ກໍເຫັນວ່າຄວາມພະຍາຍາມຮ່ວມກັນ, ຄວາມເຊື່ອໝັ້ນ, ຄວາມເຂົ້າອົກເຂົ້າໃຈ ແລະ ການຮ່ວມມືທີ່ຈິງໃຈ ລະຫວ່າງ ບັນດາປະເທດໃນພາກພື້ນ ແລະ ສາກົນ ເປັນສິ່ງທີ່ສໍາຄັນ ແລະ ຈໍາເປັນທີ່ສຸດ ສໍາລັບການແກ້ໄຂບັນຫາອາຊະຍາກຳຂ້າມຊາດ.
ໃນປັດຈຸບັນ, ພາກພື້ນຂອງພວກເຮົາ ຍັງຜະເຊີນກັບໄພຂົ່ມຂູ່ຈາກອາຊະຍາກຳຂ້າມຊາດຫລາຍປະເພດ ເປັນຕົ້ນ ການຄ້າຂາຍຢາເສບຕິດ ໂດຍສະເພາະແມ່ນຢາເສບຕິດປະເພດສັງເຄາະ ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ເຊິ່ງເຫັນໄດ້ຈາກປະລິມານຢາເສບຕິດທີ່ຢຶດໄດ້ໃນພາກພື້ນ ໃນແຕ່ລະປີແມ່ນມີຈໍານວນເພີ່ມຂຶ້ນ. ນອກນັ້ນ, ການກໍ່ການຮ້າຍ, ການລັກລອບຄ້າອາວຸດເສິກ, ການລັກລອບນໍາຄົນເຂົ້າ-ອອກເມືອງ, ການຟອກເງິນ ແລະ ອື່ນໆ ຍັງເປັນໄພຂົ່ມຂູ່ຕໍ່ຄວາມໝັ້ນຄົງ, ຄວາມສະຫງົບປອດໄພ ໃນພາກພື້ນ, ມີຜົນກະທົບຕໍ່ການພັດທະນາເສດຖະກິດ-ສັງ ຄົມ ແລະ ການດໍາລົງຊີວິດຂອງປະຊາຊົນ; ກົນໄກກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກຳຂ້າມຊາດ ຈະສືບຕໍ່ເປັນໃຈກາງໃນການກຳນົດນະໂຍບາຍ ແລະ ມາດຕະການຕ່າງໆ ເພື່ອ ຕ້ານອາຊະຍາກຳຂ້າມຊາດໃນພາກພື້ນ.
