ນໍ້າຖ້ວມໃຫຍ່ຢູ່ບັງກະລາເທດມີຜູ້ເສຍຊີວິດເພີ່ມເປັນ 23 ຄົນ ປະຊາຊົນໂທດອິນເດຍຕົ້ນຕໍ ປ່ອຍນໍ້າຈາກເຂື່ອນບໍ່ແຈ້ງລ່ວງໜ້າ
ທາງການບັງກະລາເທດລາຍງານວ່າມີຜູ້ເສຍຊີວິດເພີ່ມເປັນ 23 ຄົນ ຈາກນໍ້າຖ້ວມໃຫຍ່ຢູ່ຫລາຍພື້ນທີ່ ເນື່ອງຈາກມໍລະສຸມລະດູຝົນ ແລະ ລະດັບນໍ້າຢູ່ແມ່ນໍ້າເພີ່ມສູງຂຶ້ນ ໂດຍຫລ້າສຸດລະດັບນໍ້າຖ້ວມຢູ່ບາງພື້ນທີ່ເລີ່ມຫລຸດລົງ. ຂະນະທີ່ຄາດວ່າມີປະຊາຊົນໄດ້ຮັບຜົນກະທົບຫລາຍກວ່າ 5.7 ລ້ານຄົນ ໃນ 11 ເຂດຈາກທັງໝົດ 64 ເຂດຂອງປະເທດ ແລະ ຫລາຍກວ່າ 1.2 ລ້ານຄົນຍັງຕົກຄ້າງຢູ່ໃນພື້ນທີ່ປະສົບໄພ ແລະ ເລີ່ມຜະເຊີນສະພາບຂາດເຂີນອາຫານ, ນໍ້າດື່ມ ແລະ ຢາ ເຊິ່ງທາງການກໍາລັງເລັ່ງໃຫ້ການຊ່ວຍເຫລືອ.
ໜຶ່ງໃນເມືອງທີ່ໄດ້ຮັບຄວາມເສຍຫາຍໜັກທີ່ສຸດຄືເມືອງເຟນີ ເຊິ່ງຖະໜົນເສັ້ນສໍາຄັນທັງໝົດຈົມຢູ່ໃຕ້ນໍ້າ. ຂະນະທີ່ລະບົບໄຟຟ້າ ແລະ ໂທລະສັບໃຊ້ບໍ່ໄດ້ ສົ່ງຜົນເຮັດໃຫ້ສົ່ງມອບການຊ່ວຍເຫລືອເປັນໄປຢ່າງຍາກລໍາບາກ ໂດຍທາງການລະດົມກໍາລັງທະຫານ ແລະ ອາສາສະໝັກເຂົ້າຊ່ວຍເຫລືອຜູ້ປະສົບໄພໃນພື້ນທີ່ຕ່າງໆ.
ທັງນີ້, ສໍານັກຂ່າວ CNN ເຊິ່ງລົງພື້ນທີ່ພາຍໃນເມືອງລາຍງານວ່າ: ປະຊາຊົນຈໍານວນຫລາຍສະແດງທ່າທີໂກດແຄ້ນ ແລະ ກ່າວຫາອິນເດຍວ່າເປັນຕົ້ນເຫດຂອງນໍ້າຖ້ວມໃຫຍ່ທີ່ເກີດຂຶ້ນ ຈາກການປ່ອຍນໍ້າຢູ່ເຂື່ອນດໍາບູ (Dumbur) ໃນລັດຕຣິປຸຣະ (Tripura) ທີ່ຢູ່ໃກ້ຄຽງຊາຍແດນບັງກະລາເທດ ໂດຍບໍ່ມີການແຈ້ງເຕືອນລ່ວງໜ້າ.
ຂະນະທີ່ລັດຖະບານອິນເດຍປະຕິເສດວ່າ: ການປ່ອຍນໍ້າຈາກເຂື່ອນເປັນໄປຢ່າງຕັ້ງໃຈ ແລະ ຊີ້ແຈງວ່າ: ຝົນທີ່ຕົກໜັກເປັນໜຶ່ງໃນປັດໄຈທີ່ເຮັດໃຫ້ເກີດນໍ້າຖ້ວມ, ແຕ່ຍອມຮັບວ່າຜົນກະທົບຈາກໄຟຟ້າມອດ ແລະ ລະບົບສື່ສານຂັດຂ້ອງ ສົ່ງຜົນເຮັດໃຫ້ບໍ່ສາມາດອອກປະກາດເຕືອນຕາມປົກກະຕິໃຫ້ບັງກະລາເທດທີ່ຢູ່ປາຍແມ່ນໍ້າ.
ໂດຍຢູ່ອິນເດຍມີລາຍງານສະຖານະການນໍ້າຖ້ວມໜັກຢູ່ລັດຕຣິປຸຣະ ເຊິ່ງສົ່ງຜົນເຮັດໃຫ້ມີຜູ້ເສຍຊີວິດແລ້ວ 26 ຄົນ ແລະ ປະຊາຊົນ 64,000 ກວ່າຄົນ ຕ້ອງອົບພະຍົບໄປຢູ່ສູນຊົ່ວຄາວ.
ອ້າງອີງ:
- https://www.reuters.com/business/environment/bangladesh-floods-leave-23-dead-57-million-people-affected-2024-08-26/
- https://edition.cnn.com/2024/08/26/asia/bangladesh-flood-disaster-india-intl-hnk-dst/index.html
