ໂຮງໝໍສູນກາງ 103 ກອງທັບປະຊາຊົນລາວ ແລະ ຫວຽດນາມ ສຳເລັດການຮ່ວມມືຜ່າຕັດປູກຖ່າຍໄຂ່ຫລັງ

ພິທີສະຫລຸບຜົນສຳເລັດການຮ່ວມມືຜ່າຕັດປູກຖ່າຍໄຂ່ຫລັງ ລະຫວ່າງ ໂຮງໝໍສູນກາງ 103 ກອງທັບປະຊາຊົນລາວ ກັບ ໂຮງໝໍ 103 ວິທະຍາຄານການແພດ ກອງທັບປະຊາຊົນຫວຽດນາມ ໄດ້ຈັດຂຶ້ນວັນທີ 23 ສິງຫາ 2024, ທີ່ໂຮງໝໍສູນກາງ 103 ກອງທັບປະຊາຊົນລາວ, ມີພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ເປັນປະທານ.

ພັນເອກ ຮຈ ດຣ ສະແຫວງໄຊ ດາລາສາດ ອຳນວຍການຫົວໜ້າການທະຫານໂຮງໝໍສູນກາງ 103 ກອງທັບປະຊາຊົນລາວ ລາຍງານວ່າ: ການຮ່ວມມືໃນວຽກງານ ປູກຖ່າຍໄຂ່ຫລັງຂອງ ສອງໂຮງໝໍສູນກາງ 103 ກອງທັບປະຊາຊົນລາວ ກັບ ໂຮງໝໍ 103 ວິທະຍາຄານການແພດ ກອງທັບປະຊາຊົນຫວຽດນາມ ໃນໄລຍະຜ່ານມາ ໄດ້ນຳເອົາຜົນປະໂຫຍດອັນໃຫຍ່ຫລວງມາໃຫ້ມວນມະນຸດ ໂດຍສະເພາະ ຄົນເຈັບໄຂ່ຫລັງຊຸດໂຊມໄລຍະທ້າຍ ເຮັດໃຫ້ຄົນເຈັບໄດ້ມີສຸຂະພາບແຂງແຮງ, ສາມາດປະຕິບັດໜ້າ ທີ່ວຽກງານ ຫລື ອາຊີບໄດ້, ຖ້າຄິດໄລ່ໄລຍະຍາວ ຈະປະຢັດກວ່າການປິ່ນປົວດ້ວຍວີທີອື່ນໆ. ຜ່ານມາສາມາດຜ່າຕັດໄດ້ ທັງໝົດ 15 ກໍລະນີ ປັດຈຸບັນ ມີສຸຂະພາບແຂງແຮງດີ, ຜົນກວດ ຢູ່ໃນຂອບເຂດປົກກະຕິ, ຫລາຍຄົນໄດ້ກັບຄືນເຮັດໜ້າທີ່ວຽກງານຂອງຕົນໄດ້ຕາມປົກກະຕິ.

ໂອກາດນີ້, ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ໄດ້ມອບຫລຽນໄຊແຮງງານ ແລະ ຫລຽນໄຊພິລະອາດຫານ ໃຫ້ແກ່ບຸກຄົນ ແລະ ກົມກອງ ລວມໝູ່ ຂອງວິທະຍາຄານການແພດກອງທັບ ກະຊວງປ້ອງກັນປະເທດ ຫວຽດນາມທີ່ມີຜົນງານດີເດັ່ນ.