ຮອງເຈົ້າແຂວງບໍ່ແກ້ວ ລົງຢ້ຽມຢາມ ແລະ ຊ່ວຍເຫລືອ ປະຊາຊົນທີ່ຖືກຜົນກະທົບນໍ້າຖ້ວມ ຢູ່ເມືອງປາກທາ

ວັນທີ 25 ສິງຫາ 2024, ທ່ານ ຄໍາຜະຫຍາ ພົມປັນຍາ, ຮອງເຈົ້າແຂວງໆບໍ່ແກ້ວ, ປະທານຄະກໍາມະການຄຸ້ມຄອງໄພພິບັດຂັ້ນແຂວງ ພ້ອມດ້ວຍຄະນະກໍາມະການຄຸ້ມຄອງໄພພິບັດ ຂັ້ນແຂວງ ແລະ ເມືອງປາກທາ ລົງຢ້ຽມຢາມໃຫ້ກໍາລັງໃຈປະຊາຊົນທີ່ຖືຜົນກະທົບ ນ້ໍາຖ້ວມເນື້ອທີ່ນາ ພ້ອມທັງລົງກວດກາເບິ່ງຄວາມເສຍຫາຍຕົວຈິງ ຢູ່ບ້ານກ້ອນຕື່ນ, ບ້ານປາກໂຊະ, ບ້ານປາງສາ ແລະ ບ້ານດົງ ເມືອງປາກທາ ແຂວງບໍ່ແກ້ວ.

ໂອກາດນີ້ ທ່ານ ຮອງເຈົ້າແຂວງບໍ່ແກ້ວ ໄດ້ຢື້ຢາມຖາມຂ່າວ ພໍ່ແມ່ປະຊາຊົນ ພ້ອມທັງສະແດງຄວາມເສຍໃຈຕໍ່ກັບຜົນເສຍຫານທີ່ເກີດໃນຄັ້ງນີ້, ພ້ອມທັງຮຽກຮ້ອງມາຍັງພໍ່ແມ່ປະຊາຊົນຈົ່ງເປັນເຈົ້າການຊ່ວຍກັນໃນເບື້ອງຕົ້ນເພື່ອຟື້ນຟູແລະປູກທົດແທນເນື້ອທີ່ນາທີ່ໄດ້ຮັບຄວາມເສຍຫາຍເລັກນ້ອຍ ແລະ ເອົາໃຈໃສ່ບົວລະບັດຮັກສາເຂົ້າທີ່ຍັງເຫລືອ, ພ້ອມທັງເນັ້ນໜັກໃຫ້ ຄະນະຮັບຜິດຊອບຂະແໜງການທີ່ກ່ຽວຂ້ອງໃຫ້ເອົາໃຈໃສ່ ສົມທົບກັບຄະນະບ້ານແລະພໍ່ແມ່ປະຊາຊົນ ເພື່ອເກັບກໍາຂໍ້ມູນຜົນເສຍຫາຍລະອຽດ ແລະ ສະຫລຸບລາຍງານໃຫ້ຖືກຕ້ອງແລະວ່ອງໄວແລະຊ່ວຍເຫລືອປະຊາຊົນໃນທຸກດ້ານ, ໂອກາດດັ່ງກ່າວ ກໍໄດ້ມອບເຄື່ອງບັນເທົາທຸກໃຫ້ປະຊົນທີ່ໄດ້ຮັບຜົນກະທົບ. ຈາກນັ້ນກໍໄດ້ເດີນທາງ ໄປເບິ່ງເນື້ອທີ່ນາ ທີ່ໄດ້ຮັບຄວາມເສຍຫາ ຢູ່ບ້ານກ້ອນຕື່ນ, ບ້ານປາກໂຊະ,  ບ້ານ ປາງສາ ແລະ ບ້ານດົງ, ຕອນເດີນທາງກັບ ຍັງໄດ້ເຂົ້າກວດກາເບິ່ງຜົນເສຍຫາຍ ເນື້ອທີ່ນາຂອງປະຊາຊົນບ້ານຫາດສະຕື່ມອີກ.

ເມືອງປາກທາ ໄດ້ຮັບຜົນກະທົບໃນ ລະຫວ່າງວັນທີ 21-22 ສິງຫານີ້ ການສໍາຫລວດເບື້ອງຕົ້ນ ນໍ້າຫ້ວຍໄຫລຊຸຖ້ວມເນື້ອທີ່ນາ ແລະ ຊົນລະປະທານ ເສຍຫາຍ 22 ບ້ານ, ສະເພາະກຸ່ມບ້ານກ້ອນຕື່ນ ຄື: ບ້ານ ກ້ອນຕື່ນ ເສຍຫາຍ 147 ຄອບຄົວ, ບ້ານປາກໂຊະ 24 ຄອບຄົວ, ບ້ານ ບ້ານປາງສາ 27 ຄອບຄົວ, ບ້ານດົງ 33 ຄອບຄົວ, ສ່ວນບ້ານຈຽງຕອງ ຍັງບໍ່ສາມາດເຂົ້າເຖິງໄດ້ ເສັ້ນທາງຖືກຕັດຂາດຫລາຍຈຸດ, ສ່ວນນໍ້າລິນແມ່ນເສຍຫາຍ, ປະຊາຊົນບໍ່ມີນໍ້າລິນໃຊ້, ສ່ວນການສໍາຫລວດ ຜົນເສຍຫາຍລະອຽດ ພາກສ່ວນທີ່ກ່ຽວຂອງຍັງເລັ່ງລົງພື້ນທີ່ເກັບກໍາຂໍ້ມູນລະອຽດ, ພ້ອມທັງຂໍ້ສະເໜີ ໃຫ້ຊ່ວຍເຫລືອ ຟື້ນຟູເນື້ອທີ່ນາ, ສ້ອມແປງລະບົບຊົນລະປະທານ,ລະບົບນໍ້າລິນ ແລະສະໜອງແນວພັນພືດ ເພື່ອປູກທົດແທນ ແລະຊ່ວຍເຫລືອບັນເທົາທຸກໃຫ້ຄອບຄົວທີ່ໄດ້ຮັບຜົນກະທົບຕາມຄວາມເໝາະສົມ.

ຂ່າວ: ແຂວງບໍ່ແກ້ວ