ກໍາປູເຈຍເຝົ້າລະວັງຢ່າງເຂັ້ມງວດພະຍາດໝາກສຸກລີງ-ພະຍາດຕິດເຊື້ອຕາມດ່ານຊາຍແດນ

 ວັນທີ 25 ສິງຫາ 2024, ສໍານັກຂ່າວຊິນຮົວລາຍງານວ່າ: ທ່ານ ຊຽງ ຣາ ລັດຖະມົນຕີກະຊວງສາທາລະນະສຸກຂອງກໍາປູເຈຍ ກ່າວຜ່ານຈົດໝາຍສົ່ງເຖິງເຈົ້າແຂວງຕິດຊາຍແດນຂອງປະເທດວ່າ: ອົງການອະນາໄມໂລກ (WHO) ປະກາດໃຫ້ພະຍາດໝາກສຸກລີງ ຫລື Mpox ເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດ ໃນວັນທີ 14 ສິງຫາຜ່ານມາ ເນື່ອງຈາກການແຜ່ລະບາດຢ່າງວ່ອງໄວໃນຫລາຍປະເທດຂອງທະວີບອາຟຣິກາ.

ຂະນະດຽວກັນ, ມີການກວດພົບກໍລະນີຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ຈາກສັດປີກສູ່ມະນຸດ ແລະ ການຕິດເຊື້ອແບັກທີເຣຍແອນແທຣກ ໃນຫລາຍພາກພື້ນຂອງກໍາປູເຈຍ ແລະ ປະເທດໃກ້ຄຽງ.

ປັດຈຸບັນ, ກໍາປູເຈຍກວດພົບຜູ້ຕິດເຊື້ອພະຍາດໝາກສຸກລີງສະສົມໃນປະເທດຢ່າງໜ້ອຍ 20 ຄົນ ນັບແຕ່ການແຜ່ລະບາດຮອບທໍາອິດ ໂດຍຍັງບໍ່ມີຜູ້ເສຍຊີວິດ ແລະ ຜູ້ຕິດເຊື້ອໄວຣັສໄຂ້ຫວັດສັດປີກ ສາຍພັນ H5N1 ສະສົມຢ່າງໜ້ອຍ 72 ຄົນ ແລະ ເສຍຊີວິດແລ້ວ 43 ຄົນ.

ທັງນີ້, ທ່ານ ຊຽງ ຣາ ກະຕຸ້ນເຕືອນທຸກຝ່າຍເຝົ້າຕິດຕາມ ແລະ ປ້ອງກັນພະຍາດຕິດເຊື້ອເຫລົ່ານີ້ ທີ່ອາດແຜ່ເຂົ້າສູ່ກໍາປູເຈຍ ໂດຍການເພີ່ມມາດຕະການກັກກັນພະຍາດ ເພື່ອປ້ອງກັນສຸຂະພາບຂອງປະຊາຊົນໃນປະເທດ. ພ້ອມແນະນໍາເຈົ້າແຂວງຕ່າງໆຈັດສັນເຈົ້າໜ້າທີ່ດ້ານການກັກກັນພະຍາດໃຫ້ຍົກລະດັບການປະຕິບັດງານຕາມດ່ານຊາຍແດນຂອງປະເທດ.