ປກສ ແຂວງຫົວພັນ ຈັບຜູ້ຄ້າຂາຍຢາເສບຕິດ ພ້ອມຢຶດຢາບ້າ ມາດຳເນີນຄະດີ

ຂ່າວ ປກສ ແຂວງຫົວພັນ ລາຍງານ ວ່າ: ວັນທີ 20 ສິງຫາ 2024 ເຈົ້າໜ້າທີ່ຕຳຫລວດ ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຫົວພັນໄດ້ຮັບແຫລ່ງຂ່າວວ່າມີການມົ້ວສຸມຄ້າ-ຂາຍຢາເສບຕິດ ຢູ່ຈຸດບ້ານນາລີວ ເມືອງຊຳເໜືອ ແຂວງຫົວພັນ. ເຈົ້າໜ້າທີ່ຈຶ່ງລົງຕິດຕາມກວດກາ ພົບເຫັນເປົ້າໝາຍຈຶ່ງໄດ້ເຂົ້າກັກຕົວ ພ້ອມທັງກວດຄົ້ນເຄຫາສະຖານ ພົບຢາບ້າ 22 ຖົງກັບ 119 ເມັດ ລວມທັງໝົດ 4.519 ເມັດ, ເຮໂຣອິນ 1 ຫໍ່ນ້ອຍ, ເງິນ 13 ລ້ານກີບ, ໂທລະສັບ 3 ເຄື່ອງ, ເລົາປືນແກັບ 2 ເລົາ ແລະ ອຸປະກອນຍິງປືນແກັບ 1 ຊຸດ.

 ເຈົ້າໜ້າທີ່ ຈຶ່ງໄດ້ນໍາຕົວຜູ້ກ່ຽວມາສືບສວນ ຮູ້ວ່າ: ຜູ້ກ່ຽວຊື່ ທ້າວ ເລັ່ງເຮີ ອາຍຸ 51 ປີ, ຢູ່ບ້ານນາລີວ ເມືອງຊຳເໜືອ ແຂວງຫົວພັນ. ປັດຈຸບັນ, ຄະດີດັ່ງກ່າວແມ່ນຢູ່ໃນຂັ້ນຕອນການສືບສວນ-ສອບສວນ ຂອງເຈົ້າໜ້າທີ່ວິຊາສະເພາະ ເພື່ອຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີ ຕາມຂັ້ນຕອນຂອງກົດໝາຍ.