ອົງການອະນາໄມໂລກລະດົມທຶນ 135 ລ້ານໂດລາ ສະກັດການລະບາດຮອບໃໝ່ຂອງພະຍາດໝາກສຸກລີງ
ອົງການອະນາໄມໂລກປະກາດລະດົມທຶນຢ່າງໜ້ອຍ 135 ລ້ານໂດລາສະຫະລັດ ເພື່ອສະໜັບສະໜູນພາລະກິດຮັບມືການແຜ່ລະບາດຄັ້ງໃໝ່ຂອງເຊື້ອໄວຣັສໝາກສຸກລີງ.
ວັນທີ 24 ສິງຫາ, ສໍານັກຂ່າວຕ່າງປະເທດລາຍງານວ່າ: ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການອົງການອະນາໄມໂລກ (WHO) ກ່າວເຖິງສະຖານະການການແຜ່ລະບາດຂອງພະຍາດໝາກສຸກລີງ ຫລື Mpox ຮອບໃໝ່ ຈາກກຸ່ມເຊື້ອໄວຣັສສາຍພັນ 1ບີ ຫລື ເຄລດ 1ບີ ທີ່ມີການກາຍພັນ ແລະ ມີຄວາມຮຸນແຮງຂຶ້ນ ຈົນ WHO ປະກາດໃຫ້ເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດ ເປັນຄັ້ງທໍາອິດໃນຮອບ 2 ປີວ່າ: ຍັງສາມາດປ້ອງກັນ ແລະ ຢັບຢັ້ງການແຜ່ລະບາດໄດ້ ຖ້າທຸກພາກສ່ວນຮ່ວມມືກັນ.
ທັງນີ້, WHO ປະກາດລະດົມທຶນຢ່າງໜ້ອຍ 135 ລ້ານໂດລາສະຫະລັດ ເພື່ອພາລະກິດຄວບຄຸມພະຍາດໝາກສຸກລີງພາຍໃນໄລຍະເວລາ 6 ເດືອນຕໍ່ໜ້າ.
ໃນເວລາດຽວກັນ, ກາບອງ ເຊິ່ງເປັນປະເທດທີ່ຕັ້ງຢູ່ທາງຕອນກາງຂອງທະວີບອາຟຣິກາ ລາຍງານການພົບຜູ້ຕິດເຊື້ອພະຍາດໝາກສຸກລີງຄົນທໍາອິດ ເປັນຜູ້ຊາຍຊາວກາບອງ ອາຍຸ 30 ປີ ເຊິ່ງເດີນທາງກັບປະເທດ ພາຍຫລັງໄປຢູ່ຢູກັນດາເປັນເວລາ 2 ອາທິດ.
ເຖິງວ່າຍັງບໍ່ມີການລະບຸສາຍພັນເຊື້ອໄວຣັສຂອງຜູ້ຕິດເຊື້ອຢູ່ກາບອງ, ແຕ່ຢູກັນດາເປັນໜຶ່ງໃນປະເທດທີ່ກໍາລັງຜະເຊີນການແຜ່ລະບາດຂອງເຊື້ອພະຍາດໝາກສຸກລີງ ເຄລດ 1ບີ ເຊິ່ງອັດຕາການເສຍຊີວິດຕອນນີ້ຢູ່ລະດັບ 3.6% ແລະ ອາການມີທ່າອ່ຽງຮຸນແຮງຂຶ້ນ ຖ້າຜູ້ຕິດເຊື້ອເປັນເດັກນ້ອຍ.
