ມີຜູ້ເສຍຊີວິດຫລາຍກວ່າ 40 ຄົນ ຈາກນໍ້າຖ້ວມຄັ້ງໃຫຍ່ຢູ່ອິນເດຍ-ບັງກະລາເທດ
ວັນທີ 24 ສິງຫາ 2024, ສຳນັກຂ່າວຕ່າງປະເທດລາຍງານວ່າ: ຍ້ອນຝົນຕົກໜັກ ແລະ ຕໍ່ເນື່ອງໃນອາທິດນີ້ ເຮັດໃຫ້ເກີດນ້ຳຖ້ວມຢູ່ພາກຕາເວັນອອກຂອງບັງກະລາເທດ ແລະ ມີຈຳນວນຜູ້ເສຍຊີວິດເພີ່ມອີກຢ່າງໜ້ອຍ 18 ຄົນ ແລະ ອີກ 4.5 ລ້ານຄົນໄດ້ຮັບຜົນກະທົບ, ເມືອງ ເຟນີ ໄດ້ຮັບຄວາມເດືອດຮ້ອນຫລາຍທີ່ສຸດ.
ປັດຈຸບັນມີ 11 ເຂດ ຈາກ 64 ເຂດຂອງ ບັງກະລາເທດ ຖືກນ້ຳຖ້ວມຢ່າງໜັກ, ລັດຖະບານ ແລະ ກອງທັບ ໄດ້ສົ່ງທະຫານລົງຊ່ວຍເຫລືອ ໃນການຍົກຍ້າຍປະຊາຊົນຫລາຍກວ່າ 285,000 ຄົນ ໄປຢູ່ເຂດປອດໄພແລ້ວ. ຂະນະທີ່ກົມອຸຕຸນິຍົມວະທະຍາຂອງ ບັງກະລາເທດ ເຕືອນວ່າ: ລະດັບນ້ຳໃນແມ່ນ້ຳຫລາຍສາຍທີ່ໄຫລຜ່ານ ພາກຕາເວັນອອກຂອງປະເທດຍັງເພີ່ມສູງຂຶ້ນຢ່າງຕໍ່ເນື່ອງຈົນໜ້າເປັນຫ່ວງ.
ໃນເວລາດຽວກັນຢູ່ລັດຕຣີປຸລະ ຂອງອິນເດຍເຊິ່ງຕັ້ງຢູ່ທາງດ້ານຕາເວັນອອກສ່ຽງເໝືອຂອງ ບັງກະລາເທດ ກໍປະສົບກັບນ້ຳຖ້ວມເຊັ່ນດຽວກັນ ໂດຍມີລາຍງານຈຳນວນຜູ້ເສຍຊີວິດແລ້ວຢ່າງໜ້ອຍ 24 ຄົນ.
ດັດສະນີຄວາມສ່ຽງດ້ານສະພາບອາກາດໂລກຈັດອັນດັບໃຫ້ບັງກາເທດ ທີ່ມີປະຊາກອນ 170 ລ້ານຄົນ ຢູ່ໃນກຸ່ມສ່ຽງສສຸດຈາກສະພາບອາກາດປ່ຽນແປງ.
