ອາຟຣິກາມີຜູ້ຕິດເຊື້ອພະຍາດໝາກສຸກລີງສະສົມເກີນ 21,000 ຄົນ ເສຍຊີວິດແລ້ວ 591 ຄົນໃນປີນີ້
ຈໍານວນຜູ້ຕິດເຊື້ອພະຍາດໝາກສຸກລີງຢູ່ທະວີບອາຟຣິກາສະສົມຫລາຍກວ່າ 21,000 ຄົນແລ້ວໃນປີນີ້ ແລະ ມີຜູ້ເສຍຊີວິດຢ່າງໜ້ອຍ 591 ຄົນ.
ວັນທີ 25 ສິງຫາ, ສໍານັກຂ່າວຕ່າງປະເທດລາຍງານວ່າ: ສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາ ຊີດີຊີ) ລາຍງານສະຖານະການພະຍາດໝາກສຸກລີງ ຫລື Mpox ຢູ່ພາກພື້ນວ່າ: ຈໍານວນຜູ້ຕິດເຊື້ອສະສົມນັບແຕ່ຕົ້ນປີນີ້ຈົນຮອດວັນທີ 23 ສິງຫາຜ່ານມາ ມີຢ່າງໜ້ອຍ 21,466 ຄົນ ແລະ ມີຜູ້ເສຍຊີວິດສະສົມຢ່າງໜ້ອຍ 591 ຄົນ.
ຕອນນີ້ມີຢ່າງໜ້ອຍ 13 ປະເທດໃນອາຟຣິກາທີ່ຢືນຢັນຜູ້ຕິດເຊື້ອພະຍາດໝາກສຸກລີງ ໄດ້ແກ່ ບຸຣຸນດີ, ແຄເມີຣູນ, ອາຟຣິກາກາງ, ຄອງໂກ, ໄອວໍຣີໂຄດ, ກາບອງ, ໄລບີເຣຍ, ເຄນຢາ, ໄນຈີເຣຍ, ຣາວັນດາ, ອາຟຣິກາໃຕ້ ແລະ ອູກັນດາ.
ລາຍງານຂອງອາຟຣິກາ ຊີດີຊີ ລະບຸວ່າ: ຜູ້ຕິດເຊື້ອສ່ວນຫລາຍມີອາການປານກາງ ແລະ ຮຽກຮ້ອງທຸກປະເທດໃນພາກພື້ນຮ່ວມກັນຍົກລະດັບການຄວບຄຸມພະຍາດ ເພື່ອໃຫ້ການຄວບຄຸມພະຍາດມີປະສິດທິພາບຫລາຍຂຶ້ນ.
ຂະນະດຽວກັນ, ອາຟຣິກາ ຊີດີຊີ ກ່າວໃນຖະແຫລງການວ່າ: ຈະໄດ້ຮັບການສະໜັບສະໜູນເປັນວັກຊີນປ້ອງກັນພະຍາດໝາກສຸກລີງ 200,000 ໂດສ ຕາມຂໍ້ຕົກລົງກັບສະຫະພາບເອີຣົບ (EU) ແລະ ບໍລິສັດບາວາຣຽນ ນໍດິກ ຂອງດານມາກ ເປັນຜູ້ຜະລິດວັກຊີນທີ່ມີຊື່ສຽງທາງການຄ້າວ່າ: ອິມວາເນກ (Imvanex) ຫລື ຈີນນີໂອສ (JYNNEOS) ສໍາລັບພະຍາດໝາກສຸກລີງ ເຊິ່ງອົງການອະນາໄມໂລກ (WHO) ປະເມີນປະສິດທິພາບຕໍ່ພະຍາດໝາກສຸກລີງໄວ້ໃນລະດັບ 85%.
WHO ປະກາດລະດົມທຶນຢ່າງໜ້ອຍ 135 ລ້ານໂດລາສະຫະລັດ ເພື່ອພາລະກິດຄວບຄຸມພະຍາດໝາກສຸກລີງພາຍໃນໄລຍະເວລາອີກ 6 ເດືອນຕໍ່ໜ້າ.
