ສະມາຊິກສະພາເປັນຫ່ວງໜີ້ສິນສາທາລະນະ
ສະມາຊິກສະພາແຫ່ງຊາດ (ສສຊ) ເວົ້າຢູ່ກອງປະຊຸມສະພາຄັ້ງນີ້ວ່າ: ໄລຍະຜ່ານມາ, ວຽກງານຄຸ້ມຄອງໜີ້ສາທາລະນະຂອງລາວເຮົາທີ່ເກີດຈາກການກູ້ຢືມ, ການອອກພັນທະບັດ, ການຄ້ຳປະກັນການກູ້ຢືມ ແລະ ການຄ້ຳປະກັນການຊຳລະຂອງລັດຖະບານ, ແມ່ນຍັງບໍ່ທັນມີນິຕິກຳສະເພາະຄຸ້ມຄອງໄດ້ ອີງໃສ່ພຽງແຕ່ບາງມາດຕາຂອງກົດໝາຍວ່າດ້ວຍງົບປະມານແຫ່ງລັດ, ກົດໝາຍວ່າດ້ວຍການລົງທຶນຂອງລັດ ແລະ ດໍາລັດເລກທີ 75/ນຍ ລົງວັນທີ 20 ມີນາ 2009 ວ່າດ້ວຍການຄຸ້ມຄອງນຳໃຊ້ທຶນຊ່ວຍເຫລືອທາງການເພື່ອການພັດທະນາ ເຫັນວ່າຍັງບໍ່ທັນພຽງພໍໃນການຮັບປະກັນການຄຸ້ມຄອງໜີ້ສິນດັ່ງກ່າວໃຫ້ມີຄວາມປອດໄພໃນໄລຍະຍາວໄດ້.
ຕໍ່ບັນຫາດັ່ງກ່າວ, ທ່ານນາງ ວັນເພັງ ແກ້ວນະຄອນ ສະມາຊິກສະພາແຫ່ງຊາດເຂດເລືອກຕັ້ງທີ 8 ແຂວງຊຽງຂວາງ ໄດ້ມີຄໍາເຫັນວ່າ: ສສຊ ແມ່ນມີຄວາມເປັນຫ່ວງຫລາຍວ່າໜີ້ສິນສາທາລະນະຕ່າງໆ ຈະເປັນພາລະອັນໜັກໜ່ວງໃຫ້ລັດເກີນໄປ. ສະນັ້ນ, ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ນີ້, ໄດ້ນຳສະເໜີ ຮ່າງກົດໝາຍວ່າດ້ວຍການຄຸ້ມໜີ້ສິນສາທາລະນະ, ເຊິ່ງສະມາຊິກສະພາແຫ່ງຊາດຊຸດນີ້ ຈະຕ້ອງໄດ້ເອົາໃຈໃສ່ຄົ້ນຄວ້າວ່າເຮັດແນວໃດໃຫ້ຮ່າງກົດໝາຍດັ່ງກ່າວມີຄວາມຮັດກຸມ ເພື່ອໃຫ້ລັດຖະບານ ບໍ່ໄດ້ຮັບພາລະເລື່ອງບັນຫາໜີ້ສິນສາທາລະນະນີ້ຫລາຍ, ໝາຍວ່າ ຜູ້ທີ່ກູ້ຢືມຕ້ອງເປັນເຈົ້າການເພື່ອຊຳລະໜີ້ສິນ, ຕ້ອງປະຕິບັດຢ່າງເຂັ້ມງວດ, ຕ້ອງມີຄວາມຮັບຜິດຊອບດ້ວຍຕົນເອງ ບໍ່ແມ່ນວ່າທຸກຢ່າງຈະໂຍນໃຫ້ລັດ, ແຕ່ກໍບໍ່ປະຕິເສດເລື່ອງການມີສ່ວນຮ່ວມຂອງລັດຖະບານ ເຊິ່ງຈະມີສ່ວນຮ່ວມຢູ່ໃນການຮ່າງເອກະສານການກຳນົດກົດໝາຍ, ຄ້ຳປະກັນດ້ວຍລາຍລັກອັກສອນ ແຕ່ວ່າກ້ອນເງິນຕ່າງໆຕ້ອງແມ່ນຜູ້ລົງທຶນເປັນຜູ້ຮັບຜິດຊອບເປັນຕົ້ນຕໍ.
ເມື່ອຮ່າງກົດໝາຍສະບັບນີ້ຖືກຮັບຮອງ ແລະ ປະກາດໃຊ້ແລ້ວຈະເປັນເຄື່ອງມືສຳຄັນອັນໜຶ່ງໃຫ້ແກ່ລັດຖະບານ ໃນການຈັດຕັ້ງປະຕິບັດຕົວຈິງ, ຈະເປັນລະບຽບການອັນໜຶ່ງໃນການຄຸ້ມຄອງບັນຫາໜີ້ສິນ, ການກູຍືມຕ່າງໆ, ການນຳໃຊ້ແຫລ່ງທຶນຈາກການກູ້ຢືມ, ການຄ້ຳ ປະກັນການກູ້ຢືມ, ການຄ້ຳປະກັນການຊຳລະ ແລະ ການໃຫ້ກູ້ຢືມຈະມີວິໄນຫລາຍຂຶ້ນກວ່າເກົ່າ ແລະ ເຊິ່ງຈະຊ່ວຍໃຫ້ການຄຸ້ມຄອງວຽກງານໜີ້ສິນມີຄວາມໂປ່ງໃສ, ເປັນລະບົບ ແລະ ມີປະສິດທິຜົນຂຶ້ນກວ່າເກົ່າ ແລະ ທີ່ສຳຄັນແມ່ນໃຫ້ສາກົນມີຄວາມເຊື້ອໝັ້ນຕໍ່ສະຖານະໜີ້ສິນຂອງ ສປປ ລາວ ດີຂຶ້ນ.
