ບຸນຫໍ່ເຂົ້າປະດັບດິນ ແລະ ບຸນຊ່ວງເຮືອປະເພນີ ຢູ່ນະຄອນຫລວງພະບາງ ປີ 2024 ຈະມີເຮືອຊ່ວງເຂົ້າຮ່ວມຊ່ວງປະມານ 23 ລໍາ
ວັນທີ 21 ສິງຫາ 2024 ນີ້, ທ່ານ ວຽງທອງ ຫັດສະຈັນ ເຈົ້ານະຄອນ ຫລວງພະບາງ ໄດ້ຖະແຫລງຂ່າວຕໍ່ສື່ມວນຊົນວ່າ: ວັນບຸນຫໍ່ເຂົ້າປະດັບດິນ ຕິດພັນກັບບຸນຊ່ວງ ປີ 2024 ນີ້, ນະຄອນຫລວງພະບາງ ຈະເປີດກວ້າງບຸນເຮືອຊ່ວງປະເພນີ ແລະ ສີພາຍ ຢູ່ພາຍໃນປະເທດ ເຂົ້າຮ່ວມການຊ່ວງເຮືອຢູ່ທີ່ຍຶ່ງຄານ,ຈະຈັດງານໂດຍເນັ້ນເຖິງ ຄວາມເປັນວັດທະນະທຳ ແລະ ປະເພນີອັນດີງາມ ຄາດຄະເນຈະມີເຮືອເຂົ້າຮ່ວມປະມານ 23 ລໍາ, ທີ່ມາຈາກບັນດາບ້ານ ພາຍໃນນະຄອນຫລວງພະບາງ, ພະແນກການ-ອົງການ, ເມືອງພາຍໃນແຂວງ. ສຳລັບຕ່າງແຂວງ ຈະມີແຂວງໄຊຍະບູລີ, ນະຄອນຫລວງວຽງຈັນ ເຂົ້າຮ່ວມ.
ປັດຈຸບັນນີ້ ການກະກຽມວຽກງານແຕ່ລະດ້ານ ຖືວ່າໄດ້ຕິດພັນກັບການສ້າງຂະບວນການເພື່ອ ສະເຫລີມສະຫລອງປີທ່ອງທ່ຽວລາວ 2024 ເມື່ອນັກທ່ອງທ່ຽວໄດ້ເຂົ້າມາທ່ຽວຊົມຫລວງພະບາງ ໃນໄລຍະບຸນໃຫ້ມີຄວາມປະທັບໃຈ, ສ່ວນລາຍການເຄື່ອນໄຫວບຸນທາງຄະນະຮັບຜິດຊອບແມ່ນໄດ້ກຳນົດເອົາແຕ່ວັນທີ 24 ສິງຫາ – 2 ກັນຍາ 2024 ລວມມີງານຕະຫລາດນັດວາງສະແດງສິນຄ້າ ທີ່ເດີ່ນທາດຫລວງ, ຊ່ວງເຮືອທີ່ຍື່ງຄານ ບ້ານຫາດຮ່ຽນ, ຊ່ວງເຮືອທີ່ຍື່ງດົງ ບ້ານສັງຄະໂລກ, ມີການໂລະລາດ ຫລື ລົງຕະຫລາດນັດແບບມວນຊົນ ຕາມເສັ້ນທາງສີສະຫວ່າງວົງ ເລີ່ມແຕ່ສາມແຍກບ້ານຈູມຄ້ອງ (ຫໍພະບາງ) ຫາ ສາມແຍກພະແນກ ໂຍທາທິການ ແລະ ຂົນສົ່ງແຂວງ ຫລວງພະບາງ ແລະ ມີການໃສ່ບາດຢູ່ໜ້າວັດແສນສຸຂາຣາມ ໂດຍຈະມີການນຳຂັ້ນສູງເຂົ້າຮ່ວມນຳ.
ຮຽກຮ້ອງໃຫ້ປະຊາຊົນ, ພະນັກງານ, ທະຫານ, ຕຳຫລວດ, ຜູ້ປະກອບການທຸລະກິດ, ຜູ້ຈັດການ-ຜູ້ບໍລິການດ້ານຕ່າງໆ ຈົ່ງພ້ອມກັນເປັນເຈົ້າພາບ-ເປັນເຈົ້າການທີ່ດີ ເຮັດວຽກງານປ້ອງກັນຊາດ-ປ້ອງກັນ ຄວາມສະຫງົບ, ເປັນເຈົ້າການທາງດ້ານການບໍລິການ, ເປັນເຈົ້າການໃນການຮັກສາຄວາມສະອາດ ແລະມີສ່ວນ ຮ່ວມໃນການປະກອບສ່ວນ ທາງດ້ານເຮື່ອແຮງ ແລະວັດຖຸປັດໄຈ ເຂົ້າໃນການຈັດງານບຸນຫໍ່ເຂົ້າປະດັບດິນໃນຄັ້ງນີ້ໃຫ້ປະສົບຜົນ ສຳເລັດຢ່າງຈົບງາມ.
