ປກສ-ສານປະຊາຊົນ-ໄອຍະການ ແລະ ຍຸຕິທຳ ຈັດກອງປະຊຸມການດຳເນີນຄະດີຕາມຂະບວນຍຸຕິທຳ ຄັ້ງທີ VII

ກອງປະຊຸມ 4 ພາກສ່ວນຄື: ປກສ-ສານປະຊາຊົນ-ໄອຍະການ ແລະ ຍຸຕິທຳ ກ່ຽວກັບການດຳເນີນຄະດີຕາມຂະບວນຍຸຕິທຳ ຄັ້ງທີ VII ໄດ້ຈັດຂຶ້ນ ໃນວັນທີ 21 ສິງຫາ 2024 ນີ້ ຢູ່ອົງການໄອຍະການປະຊາຊົນສູງສຸດ (ອອປສ) ຊຶ່ງ ທັງ 4 ພາກສ່ວນໄດ້ສະຫລຸບຕີລາຄາ ແລະ ປະກອບຄຳເຫັນຕໍ່ການຈັດຕັ້ງຜັນປະຕິບັດບົດບັນທຶກກອງປະຊຸມ 4 ພາກສ່ວນກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VI ນັບແຕ່ເດືອນກໍລະກົດ 2021 ເປັນຕົ້ນມາ ຊຶ່ງເຫັນໄດ້ວ່າມີຜົນສໍາເລັດຫລາຍດ້ານ ເປັນຕົ້ນ: ການປັບປຸງກົງຈັການຈັດຕັ້ງ, ສັບຊ້ອນພະນັກງານໃຫ້ແທດ ເໝາະກັບຕົວຈິງ, ສຶກສາອົບຮົມແນວຄິດ-ການເມືອງ, ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະໃຫ້ແກ່ສະມາຊິກພັກ, ພະນັກງານ-ລັດຖະກອນ, ຍົກສູງສະຕິເຄົາລົບ ແລະ ປະຕິບັດກົດໝາຍ ຕາມຂອບເຂດສິດ ແລະ ໜ້າທີ່ຂອງຕົນ ເປັນຢ່າງດີ; ສຸມໃສ່ໂຄສະນາເຜີຍແຜ່ກົດໝາຍ ແລະ ນິຕິກໍາທີ່ກ່ຽວຂ້ອງນັບແຕ່ຂັ້ນສູນກາງ ຮອດຂັ້ນທ້ອງຖິ່ນ, ປັບປຸງກົນໄກປະສານສົມທົບ ຊຶ່ງກັນ ແລະກັນ ແລະ ຮ່ວມກັບພາກສ່ວນອື່ນທີ່ກ່ຽວຂ້ອງ, ພ້ອມກັນປຶກສາຫາລື, ແລກປ່ຽນບົດຮຽນ ເພື່ອແກ້ໄຂຄະດີທີ່ມີຄວາມຫຍຸ້ງຍາກສັບສົນ ໃຫ້ມີຄວາມຖືກຕ້ອງ ແລະ ສອດຄ່ອງກັບກົດໝາຍ, ສ້າງຄວາມເຊື່ອໝັ້ນ ແລະ ໄວ້ວາງໃຈຈາກພັກ-ລັດ, ປະຊາຊົນລາວບັນດາເຜົ່າ ຕໍ່ການດໍາເນີນຄະດີຕາມຂະບວນຍຸຕິທໍາ ກໍຄື ລະບົບຍຸຕິທໍາ ຂອງ ສປປ ລາວ ຫລາຍຂຶ້ນ.

ກອງປະຊຸມ ໄດ້ຕົກລົງເປັນເອກະພາບໃນບັນຫາກົດໝາຍ ແລະ ການດຳເນີນຄະດີທັງໝົດບັນຫາທີ່ເປັນບັນຫາສະເພະຂອງແຕ່ລະພາກສ່ວນ ແລະ ບັນຫາລວມຂອງ 4 ພາກສ່ວນ ທີ່ຕ້ອງໄດ້ພ້ອມກັນປະຕິບັດໃນຕໍ່ໜ້າ ໂດຍກຳນົດເປັນບົດບັນທຶກຮ່ວມ 4 ພາກສ່ວນກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VII ແລະ ໄດ້ລົງນາມບົດບັນທຶກຮ່ວມກັນ ເພື່ອເປັນບ່ອນອີງໃນການປະສານງານ, ການແກ້ໄຂຄະດີໃຫ້ຖືກຕ້ອງ ແລະ ປະຕິບັດເປັນເອກະພາບ ນັບແຕ່ສູນກາງລົງຮອດທ້ອງຖິ່ນ.

ກອງປະຊຸມຄັ້ງນີ້,ໂດຍການເປັນປະທານຮ່ວມຂອງ ພົນເອກ ວິໄລ ຫລ້າຄໍາຟອງ ຮອງນາຍົກລັດຖະມົນ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທໍາ.