ຕໍາຫລວດອຸດົມໄຊມ້າງແຫລ່ງມົ້ວສຸມຢາເສບຕິດອັນຕະລາຍ
ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງອຸດົມໄຊໄດ້ນໍາກໍາລັງລົງມ້າງແຫລ່ງມົ້ວສຸມຢາເສບຕິດອັນຕະລາຍຢູ່ເຮືອນຫລັງໜຶ່ງເຂດບ້ານຫ້ວຍຕອງເມືອງໄຊ ແຂວງອຸດົມໄຊ ແລະ ພົບຂອງກາງຢາບ້າເກືອບ 7 ພັນເມັດ, ຝິ່ນ ແລະ ຝຸ່ນແປ້ງສີຂາວສ່ວນປະສົມຜະລິດຢາເສບຕິດອີກຈໍານວນໜຶ່ງຈຶ່ງໄດ້ຢືດໄວ້ເປັນຫລັກຖານເພື່ອດໍາເນີນຄະດີ ແລະ ຈັບຕົວເຈົ້າຂອງເຮືອນຊື່ທ້າວ ຕູວ້າ ອາຍຸ 35 ປີມາດຳເນີນຄະດີຕາມລະບຽບກົດໝາຍ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີວ່າທ້າວ ຕູວ້າ ໄດ້ໃຊ້ເຮືອນຂອງຕົນເປັນແຫລ່ງມົ້ວສຸມ ແລະ ຈຳໜ່າຍຢາເສບຕິດ, ອັນໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນເຂດເມືອງດັ່ງກ່າວ, ເພາະວ່າແຕ່ລະມື້ໄດ້ມີໄວລຸ້ນຈໍານວນຫລາຍໄດ້ມາມົ້ວສຸມ ແລະ ຊື້ຢາບ້ານໍາຜູ້ກ່ຽວເປັນປະຈຳ ແລະ ສ້າງຄວາມວິຕົກກັງວົນຢ້ານກົວໃຫ້ປະຊາຊົນໃນເຂດດັ່ງກ່າວ. ຈຶງໄດ້ນໍາກຳລັງລົງແກ້ໄຂຢ່າງທັນການ.
ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ຕູວ້າ ໄດ້ຮັບສາລະພາບວ່າ: ຢາເສບຕິດດັ່ງກ່າວແມ່ນຂອງຕົນແທ້, ເຊິ່ງໄດ້ຊື້ນຳຜູ້ຮ່ວມຂະບວນການດຽວກັນ ເພື່ອມາຂາຍໃຫ້ໄລລຸ້ນໃນເທສະບານເມືອງໄຊ, ພ້ອມນີ້, ເຈົ້າໜ້າທີ່ຈະຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດໍາເນີນຄະດີຕາມລະບຽບກົດໝາຍ.
