ໄອວໍຣີໂຄສຢືນຢັນຜູ້ເສຍຊີວິດຈາກພະຍາດໝາກສຸກລີງ ຂໍທຸກຝ່າຍຢ່າແຕກຕື່ນ

     ໜ່ວຍງານສາທາລະນະສຸກຂອງໄອວໍຣີໂຄສ ເຊື່ອໝັ້ນວ່າຄວບຄຸມສະຖານະການໄດ້ ພາຍຫລັງພົບຜູ້ເສຍຊີວິດຈາກເຊື້ອໄວຣັສພະຍາດໝາກສຸກລີງ.

      ວັນທີ 21 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກໄອວໍຣີໂຄສ ລາຍງານສະຖານະການການແຜ່ລະບາດຂອງພະຍາດໝາກສຸກລີງ ຫລື Mpox ພາຍໃນປະເທດວ່າມີຜູ້ຕິດເຊື້ອສະສົມຢ່າງໜ້ອຍ 28 ຄົນ ແລະ ເສຍຊີວິດແລ້ວ 1 ຄົນ ນັບແຕ່ຕົ້ນປີນີ້.

      ທັງນີ້, ລັດຖະບານໄອວໍຣີໂຄສເນັ້ນວ່າ: ສະຖານະການທີ່ເກີດຂຶ້ນບໍ່ຄວນເປັນເລື່ອງທີ່ແຕກຕື່ນ ເນື່ອງຈາກບໍ່ແມ່ນການແຜ່ລະບາດເພີ່ມຂຶ້ນທີ່ໜ້າກັງວົນ. ເຖິງຢ່າງໃດກໍຕາມ, ໜ່ວຍງານທຸກແຫ່ງທີ່ກ່ຽວຂ້ອງຍົກລະດັບມາດຕະການເຝົ້າລະວັງ ແລະ ຄັດກອງພະຍາດ ທັງພາຍໃນຊຸມຊົນ ແລະ ຕາມຈຸດຜ່ານແດນລະຫວ່າງປະເທດແລ້ວ.

      ສະຖິຕິຜູ້ຕິດເຊື້ອສະສົມເພີ່ມຂຶ້ນຈາກ 6 ຄົນ ໃນການລາຍງານວັນທີ 1 ສິງຫາຜ່ານມາ ໂດຍຜູ້ຕິດເຊື້ອສ່ວນຫລາຍ ແລະ ຜູ້ເສຍຊີວິດຢູ່ນະຄອນຫລວງອາບີຈານ ເຊິ່ງເປັນເມືອງຫລວງຂອງເມືອງເສດຖະກິດຂອງໄອວໍຣີໂຄສ.