ສປປ ລາວ ແລະ ສ. ເກົາຫລີ ຈັດກອງປະຊຸມເວທີພົບປະພາກທຸລະກິດແມ່ນໍ້າຂອງ-ສ.ເກົາຫລີ ຄັ້ງທີ 12
ວັນທີ 20 ສິງຫາ 2024, ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສ. ເກົາຫລີ ໄດ້ເປັນເຈົ້າພາບຮ່ວມຈັດກອງປະຊຸມເວທີພົບປະພາກທຸລະກິດແມ່ນໍ້າຂອງ-ສ.ເກົາຫລີິ ຄັ້ງທີ 12 ທີ່ ໂຮງແຮມ ຄຣາວພຣາຊາ (Crowne Plaza), ນະຄອນຫລວງວຽງຈັນ ພາຍໃຕ້ຫົວຂໍ້: “ການສ້າງຄວາມອາດສາມາດຂອງບັນດາຫົວໜ່ວຍວິສາຫະກິດຂະໜາດນ້ອຍ ແລະ ກາງ ເພື່ອສົ່ງເສີມການເຊື່ອມໂຍງໃນພາກພື້່ນແມ່ນ້ຳຂອງ – Capacity Building of SMEs to Enhance Connectivity in the Mekong Region”, ໂດຍການເປັນປະທານຮ່ວມກ່າວເປີດກອງປະຊຸມຂອງ ທ່ານ ບຸນເຫລືອ ພັນດານຸວົງ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ Chung Byung-won ຮອງລັດຖະມົນຕີກະຊວງການຕ່າງປະເທດ ແຫ່ງ ສ.ເກົາຫລີ, ມີບັນດາຜູ້ຕາງໜ້າພາກລັດ ແລະ ພາກເອກະຊົນ ຈາກບັນດາປະເທດສະມາຊິກແມ່ນໍ້າຂອງ ກຳປູເຈຍ, ລາວ, ມຽນມາ, ໄທ, ຫວຽດນາມ ແລະ ສ. ເກົາຫລີ ເຂົ້າຮ່ວມທັງໝົດ 140 ທ່ານ.
ຈຸດປະສົງຂອງກອງປະຊຸມເວທີພົບປະພາກທຸລະກິດແມ່ນໍ້າຂອງ-ສ.ເກົາຫລີ ຄັ້ງນີ້ ແມ່ນເພື່ອເປີດໂອກາດໃຫ້ພາກລັດ ແລະ ພາກເອກະຊົນ ຂອງບັນດາປະເທດແມ່ນໍ້າຂອງ-ສ.ເກົາຫລີ ໄດ້ພົບປະປຶກສາຫາລື ແລກປ່ຽນບົດຮຽນ ແລະ ຂໍ້ມູນຂ່າວສານ ໃນການແກ້ໄຂຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ເພື່ອພັດທະນາຄວາມອາດສາມາດຂອງບັນດາວິສາຫະກິດຂະໜາດນ້ອຍ ແລະ ກາງ (SMEs) ຈາກປະເທດສະມາຊິກແມ່ນ້ຳຂອງໃນການຂະຫຍາຍດ້ານການຕະຫລາດ, ການເຊື່ອມໂຍງທາງດ້ານການຄ້າ ແລະ ສ້າງເຄື່ອຂ່າຍລະຫວ່າງພາກທຸລະກິດໃນພາກພື້ນແມ່ນໍ້າຂອງ ກັບ ສ. ເກົາຫລີ. ກອງປະຊຸມຄັ້ງນີ້ ໄດ້ແບ່ງວາລະປຶກສາຫາລືອອກເປັນ 2 ຫົວຂໍ້ສຳຄັນຄື: 1) ສະພາບການດຳເນີນທຸລະກິດໃນປັດຈຸບັນ ຂອງ ວິສາຫະກິດຂະຫນາດນ້ອຍ ແລະ ກາງ ໃນພາກພື້ນແມ່ນໍ້າຂອງ ແລະ ສ. ເກົາຫລີ ແລະ ທິດທາງໃນການເພີ່ມທະວີການເຊື່ອມຈອດ. 2) ສົ່ງເສີມຄວາມອາດສາມາດຂອງວິສາຫະກິດຂະຫນາດນ້ອຍ ແລະ ກາງ ໂດຍຜ່ານກົນໄກການຮ່ວມມືແມ່ນໍ້າຂອງ-ສ.ເກົາຫລີ.
ຄ່ຽງຄູ່ກັບພາກປຶກສາຫາລືດ້ານວິຊາການ, ໃນຕອນບ່າຍຂອງວັນດຽວກັນ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ສ. ເກົາຫລີ ໄດ້ຮ່ວມກັນຈັດການພົບປະພາກທຸລະກິດ (1:1 Business Meeting) ເພື່ອເປີດໂອກາດໃຫ້ບັນດາພາກທຸລະກິດ ຈາກປະເທດສະມາຊິກແມ່ນ້ຳຂອງ ແລະ ສ. ເກົາຫລີ ໄດ້ຮ່ວມກັນຊອກຫາຊ່ອງທາງຮ່ວມທຸລະກິດ ໂດຍສະເພາະ ດ້ານການນຳເຂົ້າ ແລະ ສົ່ງອອກສິນຄ້າ ໃນການຂະຫຍາຍຕະຫລາດຢູ່ພາກພື້ນ.
ຂອບການຮ່ວມມືແມ່ນໍ້າຂອງ-ສ.ເກົາຫລີ ສ້າງຕັ້ງຂຶ້ນໃນປີ 2011 ໂດຍມີເປົ້າໝາຍເພື່ອຮັດແໜ້ນການຮ່ວມມືໃນການພັດທະນາດ້ານເສດຖະກິດ ແລະ ສັງຄົມ ລະຫວ່າງ ພາກພື້ນແມ່ນໍ້າຂອງ ແລະ ສ. ເກົາຫລີ, ໂດຍແນໃສ່ການຮ່ວມກັນສ້າງຄວາມຈະເລີນຮຸ່ງເຮືອງ ແລະ ຫລຸດຜ່ອນຄວາມແຕກໂຕນກັນທາງດ້ານການພັດທະນາ ລະຫວ່າງ ບັນດາປະເທດແມ່ນໍ້າຂອງ ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນ ບົນພື້ນຖານ 3 ເສົ້້າຄໍ້າ (ເພື່ອປະຊາຊົນ, ເພື່ອຄວາມຈະເລີນຮຸ່ງເຮືອງ ແເລະ ເພື່ອຄວາມສະຫງົບສຸກ) ແລະ 7 ຂົງເຂດບູລິມະສິດ (ວັດທະນະທໍາ ແລະ ການທ່ອງທ່ຽວ; ການພັດທະນາ ຊັບພະຍາກອນມະນຸດ; ກະສິກໍາ ແລະ ພັດທະນາຊົນນະບົດ; ພັດທະນາພື້ນຖານໂຄງລ່າງ; ຂໍ້ມູນຂ່າວສານ ແລະ ເຕັກໂນໂລຊີ; ສິ່ງແວດລ້ອມ ແລະ ສິ່ງທ້າທາຍແບບໃໝ່).
