ສ.ເກົາຫລີ ປະກາດໃຊ້ມາດຕະການຂວ້ຳບາດ ນາຍທະນາຄານ ສປປ ເກົາຫລີ 18 ຄົນ
ສ.ເກົາຫລີ ປະກາດໃຊ້ມາດຕະການຂວ້ຳບາດແຕ່ພຽງຝ່າຍດຽວ ເພື່ອລົງໂທດ ສປປ ເກົາຫລີ ເຊິ່ງເກີດຂຶ້ນພຽງ 1 ວັນກ່ອນປະທານາທິບໍດີ ໂດນັນ ທຣຳ ຂອງອາເມລິກາ ຈະເດີນທາງຢ້ຽມຢາມ ສ.ເກົາຫລີ.
ສຳນັກຂ່າວຍອນຮັບ ຂອງ ສ.ເກົາຫລີ ລາຍງານວ່າ: ກະຊວງຕ່າງປະເທດ ສ.ເກົາຫລີ ອອກຖະແຫລງການ ເຊິ່ງເຜີຍແຜ່ໃນເວັບໄຊລະບຸວ່າ: ນາຍທະນາຄານຊາວ ສປປ ເກົາຫລີ ທັງໝົດ 18 ຄົນ ທີ່ປະຕິບັດງານຢູ່ຈີນ, ຣັດເຊຍ ແລະ ລີບີ ເຊິ່ງຖືກສົງໄສວ່າ: ມີສ່ວນພົວພັນກັບການຈັດຫາເງິນທຶນໂຄງການພັດທະນາອາວຸດຂອງ ສປປ ເກົາຫລີ ໄດ້ຖືກຂຶ້ນບັນຊີດຳ. ບຸກຄົນທັງ 18 ຄົນດັ່ງກ່າວຖືກທາງການອາເມລິກາໃຊ້ມາດຕະການລົງໂທດຮຽບຮ້ອຍແລ້ວ ແລະ ການເຄື່ອນໄຫວຂອງ ສ.ເກົາຫລີ ຄັ້ງນີ້ເກີດຂຶ້ນພຽງ 1 ວັນກ່ອນປະທານາທິບໍດີ ທຣຳ ຈະເດີນທາງຢ້ຽມຢາມ ສ.ເກົາຫລີ. ມາດຕະການຫລ້າສຸດຂອງລັດຖະບານ ສ.ເກົາຫລີ ໃນຄັ້ງນີ້ ຈະຫ້າມບຸກຄົນ ແລະ ນິຕິບຸກຄົນ ສ.ເກົາຫລີ ຕິດຕໍ່ ແລະ ດຳເນີນທຸລະກິດໃດໆກັບຜູ້ທີ່ຖືກຂຶ້ນບັນຊີດຳ.
