ທ່ານ ທຣຳ ບອກບໍ່ທົນກັບ ສປປ ເກົາຫລີ ອີກແລ້ວ ຫລັງໄດ້ສຽງສະໜັບສະໜູນຈາກຍີ່ປຸ່ນ
ປະທານາທິບໍດີ ໂດນັນ ທຣຳ ຜູ້ນຳອາເມລິກາ ກ່າວໃນວັນທີ 6 ພະຈິກວ່າ: ເວລາສຳລັບການໃຊ້ວິທີອົດທົນກັບ ສປປ ເກົາຫລີ ນັ້ນສິ້ນສຸດແລ້ວ, ພາຍຫລັງຍີ່ປຸ່ນມີສຽງສະໜັບສະໜູນນະໂຍບາຍຂອງທ່ານທີ່ວ່າກຳລັງພິຈາລະນາທາງເລືອກທຸກທາງເພື່ອແກ້ໄຂບັນຫາ ສປປ ເກົາຫລີ.
ກ່ອນໜ້ານີ້ ປະທານາທິບໍດີ ທຣຳ ເຄີຍກ່າວວ່າ: ລັດຖະບານອາເມລິກາຊອກຫາທາງເລືອກອື່ນໆນອກຈາກໃຊ້ວິຖີທາງການທູດກັບໂຄງການອາວຸດນິວເຄຼຍຂອງ ສປປ ເກົາຫລີ ແລະ ອາດພິຈາລະນາເລື່ອງການໃຊ້ກຳລັງທະຫານເຂົ້າແຊກແຊງ. ຜູ້ນຳອາເມລິກາຖະແຫລງຕໍ່ສື່ມວນຊົນໃນມື້ທີສອງຂອງພາລະກິດຢ້ຽມຢາມອາຊີ ໂດຍມີບັນຫາ ສປປ ເກົາຫລີ ເປັນຫົວຂໍ້ສຳຄັນວ່າ: ໂຄງການນິວເຄຼຍ ສປປ ເກົາຫລີ ເປັນໄພຄຸກຄາມຕໍ່ໂລກສີວິໄລ ລວມທັງສັນຕິພາບ ແລະ ຄວາມໝັ້ນຄົງຂອງບັນດາປະເທດ. ທ່ານ ທຣຳ ຖະແຫລງຂ່າວຮ່ວມກັບນາຍົກລັດຖະມົນຕີ ຊິນໂຊ ອາເບະ ລະຫວ່າງຢ້ຽມຢາມຍີ່ປຸ່ນວ່າ: ຍຸກຂອງຄວາມອົດທົນໄດ້ສິ້ນສຸດລົງແລ້ວ. ຂະນະທີ່ທ່ານ ອາເບະ ສະໜັບສະໜູນການໃຊ້ໄມ້ແຂງຕໍ່ ສປປ ເກົາຫລີ ພາຍຫລັງ ສປປ ເກົາຫລີ ຍິງລູກສອນໄຟຂ້າມເກາະທາງເໜືອຂອງຍີ່ປຸ່ນ ແລະ ຂູ່ຈະຈົມລົງທະເລ ແລະ ກ່າວວ່າ: ຍີ່ປຸ່ນສະໜັບສະໜູນນະໂຍບາຍຂອງປະທານາທິບໍດີ ທຣຳ ມາຕະຫລອດ ແລະ ກ່າວວ່າ: ເປັນໄປໄດ້ທຸກທາງເລືອກໃນການແກ້ໄຂບັນຫາ ສປປ ເກົາຫລີ. ທ່ານ ອາເບະ ຖະແຫລງວ່າ: ຍີ່ປຸ່ນຈະອາຍັດຊັບສິນບຸກຄົນ ແລະ ນິຕິບຸກຄົນ ສປປ ເກົາຫລີ 35 ຄົນໃນມາດຕະການຂວ້ຳບາດຊຸດໃໝ່.
