ບົດຮຽນ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານ, ໃຜໄດ້ຍິນຂ່າວນີ້ກໍຕ້ອງຕົກໃຈ ຄືເວລາປະມານ 18:30 ໂມງ ຂອງວັນທີ 5 ພະຈິກນີ້ ໄດ້ເກີດບັນຫາໄຟຟ້າມອດຢູ່ໂຮງໝໍແມ່ ແລະ ເດັກແດງໜອງພະຍາ ນະຄອນຫລວງວຽງຈັນ ເຊິ່ງເປັນໂຮງໝໍທີ່ສ້າງຂຶ້ນໃໝ່ ແລະ ໃນຂະນະນັ້ນ ຈັກໄຟຟ້າສຳຮອງພັດເກີດການຂັດຂ້ອງຈົນແກ່ຍາວມາຮອດເວລາປະມານ 23 ໂມງເກືອບຈະທ່ຽງຄືນຈຶ່ງສາມາດສ້ອມແປງໄຟສຳຮອງດັ່ງກ່າວນັ້ນໄດ້, ໃນຂະນະຊ່ວງເວລາດັ່ງກ່າວ ແພດໝໍຈຳນວນໜຶ່ງກໍພະຍາຍາມຊ່ວຍຜູ້ປະສູດດ້ວຍແສງໄຟສາຍ ແລະ ມີເດັກແດງນັບເປັນ 10 ເຊິ່ງພວມນອນໃນຕູ້ອົບທີ່ຂາດກະແສໄຟຟ້ານັບເປັນຫລາຍຊົ່ວໂມງທ່າມກາງສຽງຮ້ອງໄຫ້ຂອງຜູ້ເປັນແມ່ ແລະ ຍາດຕິພີ່ນ້ອງຜູ້ມາເບິ່ງແຍງ, ແຕ່ໃນຂະນະດຽວກັນ ພະນັກງານແພດໝໍກໍຊ່ວຍຫຍັງບໍ່ໄດ້ ມີພຽງຄອຍຖ້າໜ່ວຍສ້ອມແປງໄຟຟ້າ ທຸກຢ່າງແມ່ນອາໄສແຕ່ບຸນ, ແທນທີ່ຜູ້ຮັບຜິດຊອບ ແລະ ໜ່ວຍງານກ່ຽວຂ້ອງຈະຮີບຮ້ອນຊອກລົດສຸກເສີນ ເພື່ອຍົກຍ້າຍຈຳນວນເຕົາອົບເດັກແດງໄປໂຮງໝໍອື່ນໆທີ່ມີຄວາມປອດໄພກໍບໍ່ມີເລີຍ, ທ່າມກາງຄວາມສ່ຽງໄພດັ່ງກ່າວແກ່ຍາວມານັບເປັນຫລາຍຊົ່ວໂມງຈຶ່ງສາມາດມີກະແສໄຟຟ້າມາຫລໍ່ລ້ຽງເອົາຊີວິດຂອງຈຳນວນເດັກແດງນັບເປັນສິບດັ່ງກ່າວກັບຄືນສູ່ສະພາບປົກກະຕິດ້ວຍຄວາມປອດໄພເປັນແຕ່ຈັ່ງບຸນ.
ໃນຈຸດນີ້ ຜູ້ຂຽນກໍຂໍໃຫ້ຂະແໜງກ່ຽວຂ້ອງລົງກວດກາເບິ່ງຄວາມເປັນຈິງຂອງເຫດຮ້າຍດັ່ງກ່າວວ່າເປັນຍ້ອນຫຍັງ ? ແລະ ຂຶ້ນກັບຄວາມຮັບຜິດຊອບຂອງຝ່າຍໃດ ເພື່ອຈະໄດ້ປັບປຸງແກ້ໄຂ ແນໃສ່ຍົກສູງຄຸນນະພາບການບໍລິການຂອງຂະແໜງສາທາຕາມນະໂຍບາຍ 5 ດີ 1 ພໍໃຈທີ່ລັດຖະມົນຕີກະຊວງດັ່ງກ່າວວາງອອກໃຫ້ເປັນຈິງເທື່ອລະກ້າວ ແລະ ສິ່ງສຳຄັນ ຖ້າເປັນໂຮງໝໍກໍໃຫ້ມີໄຟຟ້າສຸກເສີນທີ່ມີຄຸນນະພາບ ແລະ ມາດຕະຖານ.
