ຮອງນາຍົກ ເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 9 ຢູ່ຊຽງໃໝ່ ປະເທດໄທ
ວັນທີ 16 ສິງຫາ 2024, ທ່ານ ສະເຫລີມໄຊ ກົມມະສິດ, ຮອງ ນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 9 ຢູ່ຊຽງໃໝ່ ປະເທດໄທ ພາຍໃຕ້ຫົວຂໍ້: ກ້າວໄປສູ່ອະນາຄົດຮ່ວມກັນຢ່າງຍືນຍົງ ແລະ ປອດໄພຍິ່ງຂຶ້ນໃນພາກ ພື້ນແມ່ນ້ຳຂອງ-ແມ່ນ້ຳລ້ານຊ້າງ (Towards the shared future of a safer and sustainable Mekong-Lancang Region), ເປັນປະທານຮ່ວມຂອງ ທ່ານ ຫວາງ ອີ້, ຫົວໜ້າຫ້ອງການຄະນະກໍາມະການກິດຈະການຕ່າງປະເທດສູນກາງພັກຄອມມູນິດຈີນ, ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ແລະ ທ່ານ ນ. ເອກສິຣິ ປິນທະຣຸຈິ, ຫົວໜ້າຫ້ອງການກະຊວງການຕ່າງປະເທດໄທ.
ກອງປະຊຸມໄດ້ຕີລາຄາ ແລະ ທົບທວນຄືນຜົນຂອງການຮ່ວມມືໃນຕະຫຼອດໄລຍະ 8 ປີຜ່ານມາ ໂດຍເຫັນວ່າຂອບການຮ່ວມມືດັ່ງກ່າວ ໄດ້ມີການຂະຫຍາຍຕົວຢ່າງວ່ອງໄວ ແລະ ນໍາເອົາຜົນປະໂຫຍດອັນເປັນຮູບປະທໍາມາສູ່ພາກພື້ນແມ່ນໍ້າຂອງ ໂດຍສະເພາະການຈັດຕັ້ງຜັນຂະຫຍາຍຜົນຂອງກອງປະຊຸມຜູ້ນໍາແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 4, ກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 8 ແລະ ແຜນປະຕິບັດງານ 5 ປີ (2023-2027) ພາຍໃຕ້ 3 ເສົາຄໍ້າ (ການ ເມືອງ-ຄວາມໝັ້ນຄົງ, ການພັດທະນາແບບຍືນຍົງ ແລະ ການ ແລກປ່ຽນວັດທະນະທໍາ-ສັງຄົມ) ແລະ 5 ຂົງເຂດບູລິມະສິດ (ການເຊື່ອມຈອດ, ການຄຸ້ມຄອງຊັບພະຍາກອນນ້ຳ, ການຄ້າຂ້າມຊາຍແດນການສ້າງຂີດຄວາມອາດສາມາດໃນການຜະລິດ ແລະ ກະສິກຳ ແລະ ລຶບລ້າງຄວາມທຸກຍາກ) ໂດຍຜ່ານການປະຕິບັດບັນດາກິດຈະກຳ ແລະ ໂຄງການກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ ອັນໄດ້ນໍາຜົນປະໂຫຍດຕົວຈິງມາສູ່ປະເທດສະມາຊິກ ກໍ່ຄືພາກພື້ນແມ່ນ້ຳຂອງ.
ນັບແຕ່ປີ 2017 ເປັນຕົ້ນມາ ກອງທຶນດັ່ງກ່າວໄດ້ປະກອບສ່ວນສໍາຄັນເຂົ້າໃນບັນດາໂຄງການເພື່ອການພັດທະນາເສດຖະກິດ-ສັງຄົມ ຢູ່ພາກພື້ນແມ່ນໍ້າຂອງ. ໃນນັ້ນ, ສປປ ລາວ ໄດ້ຮັບໂຄງການດັ່ງກ່າວ ທັງໝົດ 90 ໂຄງການ ລວມມູນຄ່າ 23,925,900 ລ້ານໂດລາສະຫະລັດ. ພ້ອມນີ້, ກອງປະຊຸມຍັງໄດ້ຮັບຮອງເອົາເອກະສານສໍາຄັນ ຈໍານວນ 4 ສະບັບ ຄື:
– ບົດຖະແຫລງຂ່າວຮ່ວມກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 9;
– ຂໍ້ລິເລີ່ມອາກາດບໍລິສຸດແມ່ນ້ຳຂອງ-ແມ່ນ້ຳລ້ານຊ້າງ;
– ລິເລີ່ມການຮ່ວມມືດ້ານຊັບພະຍາກອນນ້ຳແມ່ນ້ຳຂອງ-ແມ່ນ້ຳລ້ານຊ້າງ;
-ຖະແຫລງການຮ່ວມວ່າດ້ວຍການເພີ່ມທະວີການຮ່ວມມືຕ້ານອາດຊະຍາກຳຂ້າມແດນພາຍໃຕ້ຂອບການຮ່ວມມືແມ່ນໍ້າຂອງ-ແມ່ນ້ຳລ້ານຊ້າງ.
