ຜູ້ນຳພັກ-ລັດ ແລະ ຊາວພຸດລາວຮ່ວມໃສ່ບາດບຸນນະມັດສະການພະທາດຫລວງດ້ວຍບັນຍາກາດຟົດຟື້ນ
ເຊົ້າວັນທີ 3 ພະຈິກນີ້, ເຊິ່ງກົງກັບມື້ຂຶ້ນ 15 ຄໍ່າເດືອນ 12 ເພັງ, ບັນດາຜູ້ນຳພັກ-ລັດ ເຊິ່ງນຳໂດຍທ່ານເລຂາທິການໃຫຍ່, ປະທານປະເທດ ບຸນຍັງ ວໍລະຈິດ, ທ່ານຮອງປະທານປະເທດ ພັນຄຳ ວິພາວັນ, ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍການນຳຂັ້ນສູງພັກ-ລັດອີກຫລາຍທ່ານ ແລະ ຊາວພຸດລາວໃນນະຄອນຫລວງວຽງຈັນ ກໍຄືແຂວງຕ່າງໆໄດ້ຮ່ວມພິທີທຳບຸນໃສ່ບາດໃນມື້ສຸດທ້າຍຂອງງານບຸນນະມັດສະການພະທາດຫລວງປີນີ້ ດ້ວຍບັນຍາກາດອັນຟົດຟື້ນຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດ.
ພິທີດັ່ງກ່າວໄດ້ມີຂຶ້ນຢູ່ໃນກົມມະລຽນອ້ອມຮອບພະທາດຫລວງ ລວມໄປເຖິງບໍລິເວນເດີ່ນດ້ານນອກຂອງພະທາດກໍມີມວນຊົນຫລາຍໝື່ນຄົນໄດ້ມາໃສ່ບາດຖວາຍສັງຄະທານແດ່ພະສົງທີ່ມາຈາກເຂດແຂວງຕ່າງໆໃນທົ່ວປະເທດ ແລະ ຕ່າງປະເທດນັບເປັນຈຳນວນຫລາຍພັນອົງທີ່ມາຮ່ວມນະມັດສະການ ແລະ ກາບໄຫວ້ພະທາດຫລວງທີ່ສັກສິດເປັນມິ່ງຂວັນຂອງຊາດລາວ ເຊິ່ງໜຶ່ງປີມີຄັ້ງໜຶ່ງ, ເພື່ອອຸທິດເຖິງດວງວິນຍານຂອງບັນພະບູລຸດ ແລະ ປະຊາຊົນລາວທີ່ມີຄຸນງາມຄວາມດີ ແລະ ຜົນງານອັນລ້ຳຄ່າໃນການອຸທິດເຫື່ອແຮງ ແລະ ສະຕິປັນຍາຂອງຕົນເຂົ້າໃນການສ້າງ ແລະ ປະຕິສັງຂອນອົງພະທາດຫລວງຈົນສຳເລັດໃນປີ ຄສ 1566 ແລະ ມາຮອດປັດຈຸບັນ ອົງພະທາດຫລວງວຽງຈັນໄດ້ກາຍເປັນມິ່ງຂວັນ ແລະ ມໍລະດົກອັນລ້ຳຄ່າທີ່ຊາວລາວທົ່ວທັງປະເທດໄດ້ພ້ອມພາກັນສັກກາລະບູຊາ, ກາບໄຫວ້ສືບທອດກັນມາຮອດເທົ່າທຸກວັນນີ້.
ໃນຕອນບ່າຍຂອງວັນດຽວກັນ, ຍັງໄດ້ຈັດຕັ້ງການແຂ່ງຂັນຕີຄີອັນເປັນປະເພນີທີ່ເຄີຍເຮັດມາພາຍຫລັງມື້ສຸດທ້າຍຂອງງານບຸນດັ່ງກ່າວລະຫວ່າງຝ່າຍປະຊາຊົນ ແລະ ຝ່າຍລັດຖະບານ ຢູ່ທີ່ເດີ່ນດ້ານໜ້າພະທາດຫລວງ ເພື່ອຮັດແໜ້ນຄວາມສາມັກຄີ ແລະ ທັງເປັນການປະຕິບັດຕາມຮີດ 12 ຄອງ 14 ທີ່ບັນພະບູລຸດລາວໄດ້ກຳນົດໄວ້ໃຫ້ຕິດພັນກັບບຸນນະມັດສະການພະທາດຫລວງ ແລະ ໃນຕອນຄໍ່າຂອງມື້ດຽວກັນ ກໍມີພິທີສູດປະລິຕະມຸງຄຸນ, ວຽນທຽນ ແລະ ຈູດບັ້ງໄຟດອກ ເພື່ອສັກກາລະບູຊາພະທາດຫລວງໃຫ້ມີຄວາມຮຸ່ງເຮືອງສວຍງາມຢູ່ຄູ່ປະຊາຊົນ ແລະ ຊາດລາວຕະຫລອດຊົ່ວກາລະນານ.
