ຄະນະປະຈຳສະພາແຫ່ງຊາດ ແລະ ຄະນະລັດຖະບານ ປະຊຸມຮ່ວມ ຄັ້ງທີ 1 ປະຈຳປີ 2024
ວັນທີ 13 ສິງຫາ 2024 ຄະນະປະຈຳສະພາແຫ່ງຊາດ ແລະ ຄະນະລັດຖະບານ (ຄລບ) ຈັດກອງປະຊຸມຮ່ວມ ຄັ້ງທີ 1 ປະຈຳປີ 2024 ໂດຍການເປັນປະທານຮ່ວມຂອງ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານຄະນະປະ ຈຳສະພາແຫ່ງຊາດ ແລະ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ, ມີບັນດາທ່ານຮອງປະທານ ຄະນະປະຈຳສະພາແຫ່ງຊາດ(ຄປຈສພຊ), ຮອງນາ ຍົກລັດຖະມົນຕີ, ກຳມະການຄະນະປະຈຳສະພາແຫ່ງຊາດ, ສະມາຊິກລັດຖະບານ, ປະທານອົງການກວດສອບແຫ່ງລັດ, ຮອງປະທານອົງການກວດກາແຫ່ງລັດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊສົມພອນ ພົມວິຫານ ມີຄຳເຫັນວ່າ: ສະພາແຫ່ງຊາດ, ລັດຖະບານ, ອົງການກວດ ກາແຫ່ງລັດ ແລະ ອົງການກວດສອບແຫ່ງລັດ ມີບົດບາດສຳຄັນໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໃຫ້ເປັນອັນລະອຽດເຂົ້າໃນການສ້າງ ແລະ ປັບປຸງກົດໝາຍ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ການຕິດຕາມການກວດກາຄວາມຮັບຜິດຊອບຂອງການ ຈັດຕັ້ງ ແລະ ບຸກຄົນ, ການຢັ້ງຢືນຄວາມຖືກຕ້ອງສອດຄ່ອງກັບກົດໝາຍ, ລະບຽບການ ແລະ ວຽກງານສຳຄັນອື່ນໆ ແນໃສ່ສ້າງລັດຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ ເຮັດໃຫ້ເສດຖະກິດ-ສັງຄົມມີຄວາມເຂັ້ມແຂງ, ແກ້ໄຂປາກົດການຫຍໍ້ທໍ້ໃນສັງຄົມ, ການລະເມີດກົດໝາຍໃຫ້ຫລຸດໜ້ອຍລົງ, ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງເປັນບັນຫາເຄັ່ງຮ້ອນຂອງສັງຄົມ ເປັນຕົ້ນ ບັນຫາເງິນກີບອ່ອນຄ່າ, ອັດຕາແລກປ່ຽນເໜັງຕີງແຮງ, ການຄຸ້ມຄອງສິນຄ້າທີ່ພາຍໃນສາມາດຜະລິດໄດ້, ຊຸກຍູ້ການຜະລິດເປັນສິນຄ້າໃຫ້ຂະຫຍາຍຕົວ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ; ຕະຫລອດໄລຍະເວລາທີ່ຜ່ານມາ ລັດຖະບານກໍໄດ້ມີຄວາມພະຍາຍາມສູງໃນການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ໂດຍສະເພາະ ມະຕິວ່າດ້ວຍການຮັບ ຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານ-ເງິນຕາແຫ່ງລັດ ໄດ້ຮັບຜົນສຳເລັດເປັນກ້າວໆ, ຫລາຍບັນຫາໄດ້ຮັບການປັບປຸງແກ້ໄຂ ເຮັດໃຫ້ພໍ່ແມ່ປະຊາຊົນຍັງສືບຕໍ່ມີຄວາມເຊື່ອໝັ້ນ ແລະ ໄວ້ວາງໃຈຕໍ່ການນຳພາຂອງພັກ-ລັດເຮົາ. ພ້ອມນີ້, ທ່ານຍັງໄດ້ສະເໜີໃຫ້ຜູ້ເຂົ້າຮ່ວມກອງປະຊຸມ ເອົາໃຈໃສ່ລາຍງານບັນຫາຕ່າງໆ ໂດຍສະເພາະແມ່ນການກໍານົດກົນໄກ, ວິທີການທີ່ຈະແກ້ໄຂໃນຕໍ່ໜ້າໃຫ້ລະອຽດ, ຊັດເຈນ, ສອດຄ່ອງກັບສະພາບຄວາມເປັນຈິງ, ຍົກໃຫ້ເຫັນຢ່າງຄົບຖ້ວນບັນຫາທີ່ເກີດຂຶ້ນ ແລະ ສຸມໃສ່ຄົ້ນຄວ້າ, ປະກອບຄຳຄິດຄຳເຫັນ ເພື່ອສະເໜີວິທີແກ້ໄຂ ເພື່ອປຶກສາຫາລືໃຫ້ມີຄວາມເປັນເອ ກະພາບ ແລະ ເຮັດໃຫ້ຜົນການຕົກລົງຂອງກອງປະຊຸມ ເປັນບ່ອນອີງໃຫ້ບັນດາອົງການຈັດຕັ້ງລັດທຸກຂັ້ນ ນຳໄປຈັດຕັ້ງປະຕິບັດໃຫ້ໄດ້ຮັບຜົນສຳເລັດ ຢ່າງມີປະສິດທິພາບສູງຂຶ້ນເລື້ອຍໆ, ປະກອບສ່ວນນຳເອົາປະເທດເຮົາກ້າວຂຶ້ນຢ່າງໜັກແໜ້ນ.
ໃນກອງປະຊຸມ, ໄດ້ຮັບຟັງບົດລາຍງານສະພາບການພັດທະນາ, ຄຸ້ມຄອງໂຄງການແຮ່ຫາຍາກ ແລະ ສະເໜີທິດທາງໃນຕໍ່ໜ້າ; ການກະກຽມການຮ່າງແຜນການລົງທຶນປີ 2025; ການແກ້ໄຂຜົນການກວດສອບ ແລະ ສະເໜີທິດທາງ ແລະ ມາດຕະການແກ້ໄຂຜົນການກວດສອບໃນຕໍ່ໜ້າ; ການກະ ກຽມການຮ່າງແຜນງົບປະມານປີ 2025; ດັດສົມລາຄານ້ຳມັນເຊື້ອໄຟ ຕາມມະຕິເລກທີ 103/ຄປຈ, ລົງວັນທີ 09/5/2022 ແລະ ມະຕິເລກທີ 168/ຄປຈ, ລົງວັນທີ 06/6/2022; ມາດຕະການໃນການສົ່ງເສີມການຜະລິດພາຍໃນ, ການຄຸ້ມຄອງລາຄາສິນຄ້າ, ການນຳເຂົ້າ(ຈຳກັດ)ສິນຄ້າຟຸມເຟືອຍ, ສິນຄ້າທີ່ພາຍໃນຜະລິດໄດ້ ແລະ ຄຸ້ມຄອງການສົ່ງອອກສິນຄ້າ; ບົດລາຍງານກ່ຽວກັບມາດຕະການໃນການນຳເຂົ້ານ້ຳມັນເຊື້ອໄຟ ແລະ ການສົ່ງເສີມການຜະລິດ-ປຸງແຕ່ງພາຍໃນ; ການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ, ການໂຄສະນາເຜີຍແຜ່ກົດໝາຍ; ການຕີລາຄາກົນໄກປະສານງານລະຫວ່າງສະ ພາແຫ່ງຊາດ ກັບ ລັດຖະບານ ແລະ ຂໍ້ສະເໜີ.
ພ້ອມກັນນັ້ນ, ກໍໄດ້ຮັບຟັງການປະກອບຄຳເຫັນຈາກຕາງໜ້າ ຄປຈສພຊ ຕໍ່ບັນດາບົດລາຍງານຂອງລັດຖະບານ ແລະ ການປະກອບຄຳເຫັນຈາກຕາງໜ້າ ຄລບ ຕໍ່ການຕີລາຄາກົນໄກປະສານງານລະ ຫວ່າງສະພາແຫ່ງຊາດກັບລັດຖະບານ. ຫລັງຈາກນັ້ນ, ຜູ້ເຂົ້າຮ່ວມກໍໄດ້ສຸມໃສ່ຄົ້ນຄວ້າ, ປຶກສາຫາລື ແລະ ປະກອບຄໍາເຫັນໃຫ້ມີຄວາມເປັນເອກະພາບ ຕໍ່ວິທີການແກ້ໄຂບັນຫາຕ່າງໆ ໂດຍສະເພາະການແກ້ໄຂບັນຫາເສດຖະກິດ-ການເງິນ ເພື່ອເຮັດໃຫ້ຄວາມຫຍຸ້ງຍາກທີ່ເກີດຂຶ້ນ ແລະ ແຜ່ລາມໃນສັງຄົມປັດຈຸບັນ ໄດ້ຮັບການປັບປຸງແກ້ໄຂຢ່າງມີປະສິດທິຜົນ ແນໃສ່ເຮັດໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງໃຫ້ນັບມື້ດີຂຶ້ນ.
