ນາຍົກໄທ ອອກມາດຕະການປ້ອງກັນແພລດຟອມຂາຍເຄື່ອງຂ້າມຊາດກະທົບໄທ ເນັ້ນຕ້ອງດູແລສົມດຸນຜົນປະໂຫຍດ

ວັນທີ 13 ສິງຫາ 2024, ທ່ານ ໄຊ ວັດຣົງ ໂຄສົກປະຈຳສຳນັກງານນາຍົກລັດຖະມົນຕີໄທ ໄດ້ຖະແຫລງຂ່າວຫລັງປະຊຸມຄະນະລັດຖະມົນຕີ ວ່າ: ທ່ານ ເສດຖາ ທະວີສິນ ນາຍົກລັດຖະມົນຕີໄທ ໄດ້ສັ່ງການໃຫ້ ທ່ານ ພູມທຳ ເວດຍະໄຊ ຮອງນາຍົກລັດຖະມົນຕີ ລັດຖະມົນຕີກະຊວງການຄ້າ ຮ່ວມກັບ ກະຊວງການເງິນ, ກະຊວງການຄ້າ, ກະຊວງກະສິກຳ ແລະ ສະຫະກອນ, ກະຊວງເຕັກໂນໂລຊີເພື່ອເສດຖະກິດ ແລະ ສັງຄົມ, ກະຊວງອຸດສາຫະກຳ, ກະຊວງສາທາລະນະສຸກ ແລະ ສຳນັກງານຕຳຫລວດແຫ່ງຊາດ ເພື່ອກຳນົດມາດຕະການທີ່ຊັດເຈນເປັນຮູບປະທຳໃນການບໍລິຫານຈັດການບໍ່ໃຫ້ການຄ້າອອນລາຍ ແລະ ອັອບລາຍ ຈາກແພລດຟອມຕ່າງປະເທດເຂົ້າກະທົບກັບທຸລະກິດໃນປະເທດໄທ.

ນາຍົກໄທ ມອບມາດຕະການໃຫ້ ທ່ານ ພູມທຳ ເວດຍະໄຊ ຮອງນາຍົກ ໄປດຳເນີນການ ຄື:

1. ກວດສອບການຈົດທະບຽນທຸລະກິດການ ແລະ ໃບອຸຍາດຕ່າງໆ ເພື່ອດຳເນີນການ ຖ້າຫາກຜູ້ໃດຄ້າຂາຍຜິດກົດໝາຍ ຫລື ເປັນທຸລະກິດສີເທົາ ຫລື ບໍ່ໄດ້ຮັບອະນຸຍາດໃນການຂຶ້ນທະບຽນ.

2. ກວດສອບຄຸນນະພາບສິນຄ້າໃຫ້ເປັນໄປຕາມມາດຕະຖານ ເຊັ່ນ: ມາດຕະຖານອາຫານແລະຢາ (ອຢ), ມາດຕະຖານຜະລິດຕະພັນອຸດສາຫະກຳ (ມອກ) ເພື່ອປົກປ້ອງຜູ້ບໍລິໂພກຄົນໄທ ໂດຍສຳນັກງານຄະນະກຳມະການຄຸ້ມຄອງຜູ້ບໍລິໂພກຈະຈະຮັບຜິດຊອບໃນສ່ວນນີ້ ແລະ ປະສານກັບໜ່ວຍງານຕ່າງໆ.

3. ກວດກາໃບອະນຸຍາດການນຳເຂົ້າສິນຄ້າຕ່າງໆ ຈາກຕ່າງປະເທດ ແລະ ການຊຳລະອາກອນຂາເຂົ້າວ່າເສຍພາສີເຂົ້າມາຫລືບໍ່.

4. ກວດໃບອະນຸຍາດການຕັ້ງໂຮງງານ ໂດຍໃຫ້ກົມໂຮງງານອຸດສາຫະກຳເປັນຜູ້ກວດສອບ.

ນາຍົກໄທເນັ້ນວ່າ ເຖິງແມ່ນວ່າຈະມີການກວດສອບ ແຕ່ຂໍໃຫ້ຮັກສາສົມດຸນການຄ້າໃຫ້ເປັນໄປຕາມຂໍ້ຕົກລົງທາງການຄ້າລະຫວ່າງປະເທດ ດູແລສົມດຸນຂອງຜົນປະໂຫຍດໃນການສ້າງຄວາມຍຸດຕິທຳໃຫ້ກັບນັກທຸລະກິດໄທ.

ຂ່າວ: THE STANDARD