ກໍາປູເຈຍຄາດຄະເນເສດຖະກິດຂອງປະເທດປີນີ້ ຂະຫຍາຍຕົວໃນລະດັບ 6%

     ລັດຖະບານກໍາປູເຈຍເປີດເຜີຍລາຍງານເສດຖະກິດປະຈໍາໄລຍະກາງປີ ຄາດຄະເນການເຕີບໃຫຍ່ເສດຖະກິດຂອງປະເທດໃນປີນີ້ຢູ່ລະດັບ 6% ຫລຸດລົງເລັກໜ້ອຍຈາກທີ່ເຄີຍມີການວິເຄາະໄວ້ກ່ອນໜ້ານີ້ວ່າຈະຂະຫຍາຍຕົວໃນລະດັບ 6.6%.

     ວັນທີ 13 ສິງຫາ, ສໍານັກຂ່າວຕ່າງປະເທດລາຍງານວ່າ: ການປັບຕົວເລກດັ່ງກ່າວເປັນຜົນມາຈາກການຂະຫຍາຍຕົວຊ້າໃນພາກສ່ວນສໍາຄັນ ໂດຍສະເພາະການກໍ່ສ້າງ ແລະ ອະສັງຫາລິມະຊັບ. ຂະນະທີ່ເສດຖະກິດຂອງກໍາປູເຈຍຂັບເຄື່ອນຈາກການສົ່ງອອກເຄື່ອງນຸ່ງຫົ່ມ, ເກີບ ແລະ ສິນຄ້າການເດີນທາງ ລວມທັງການທ່ອງທ່ຽວ, ກະສິກໍາ, ການກໍ່ສ້າງ ແລະ ອະສັງຫາລິມະຊັບ.

     ກະຊວງເສດຖະກິດ ແລະ ການເງິນກໍາປູເຈຍ ລາຍງານວ່າ: ຂະແໜງອຸດສາຫະກໍາ ໂດຍສະເພາະເຄື່ອງນຸ່ງຫົ່ມ, ເກີບ ແລະ ສິນຄ້າການເດີນທາງ ລວມທັງການກໍ່ສ້າງ ຄາດວ່າຈະເຕີບໃຫຍ່ 7.9% ໃນປີນີ້. ຂະນະທີ່ຂະແໜງບໍລິການ ໂດຍສະເພາະການທ່ອງທ່ຽວ, ການຂົນສົ່ງ ແລະ ໂທລະຄົມມະນາຄົມ, ການຄ້າ ແລະ ອະສັງຫາລິມະຊັບ ຄາດວ່າຈະຂະຫຍາຍຕົວ 5.8% ແລະ ຂະແໜງກະສິກໍາ 0.7%.

     ລາຍງານລະບຸວ່າ: “ຂະແໜງການກໍ່ສ້າງຄາດວ່າຈະຟື້ນຕົວໃນອັດຕາຊ້າໆ 1.1%. ຂະນະທີ່ຂະແໜງອະສັງຫາລິມະຊັບຄາດວ່າຈະເຕີບໃຫຍ່ 1.2%”.

     ທ່ານ ໂຮ ອີ້ ຄໍ ຫົວໜ້ານັກເສດຖະສາດຂອງກົມວິໄຈເສດຖະກິດມະຫາພາກອາຊຽນ+3 (AVRO) ກ່າວວ່າ: ກໍາປູເຈຍເປັນໜຶ່ງໃນປະເທດທີ່ມີການເຕີບໃຫຍ່ໄວທີ່ສຸດໃນພາກພື້ນ “ຂະແໜງກໍ່ສ້າງອາດປະສົບອັດຕາການຟື້ນຕົວທີ່ຊ້າກວ່າ ແລະ ອາດຕໍ່າກວ່າລະດັບກ່ອນເກີດພະຍາດໂຄວິດ-19 ເນື່ອງຈາກຂະແໜງອະສັງຫາລິມະຊັບຂະຫຍາຍຕົວຊ້າເປັນເວລາດົນ”.

    ທັງນີ້, ການກະຕຸ້ນການລົງທຶນໃນໂຄງລ່າງພື້ນຖານຈະຊ່ວຍຊົດເຊີຍຄວາມອ່ອນແອຂອງຂະແໜງອະສັງຫາລິມະຊັບໄດ້ບາງສ່ວນ.