ສິງກະໂປເພີ່ມຄາດຄະເນການເຕີບໃຫຍ່ເສດຖະກິດຂອງປະເທດປີນີ້

      ລັດຖະບານສິງກະໂປຍົກລະດັບທ່າອ່ຽງການເຕີບໃຫຍ່ທາງເສດຖະກິດຂອງປະເທດໃນປີນີ້ເປັນ 2%-3%.

      ວັນທີ 13 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງການຄ້າສິງກະໂປເພີ່ມທ່າອ່ຽງການເຕີບໃຫຍ່ທາງເສດຖະກິດຂອງປະເທດໃຫ້ຂຶ້ນມາຢູ່ 2.0%-3.0% ໃນປີນີ້ ຈາກກ່ອນໜ້ານັ້ນທີ່ເຄີຍລະບຸໄວ້ລະດັບ 1.0%-3.0%.

     ທັງນີ້, ເສດຖະກິດຂອງສິງກະໂປໃນໄຕມາດທີສອງຂອງປີນີ້ ຫລື ລະຫວ່າງເດືອນເມສາ-ມິຖຸນາຜ່ານມາ ຂະຫຍາຍຕົວ 2.9% ເມື່ອທຽບໃສ່ປີຕໍ່ປີ ດີກວ່າການຄາດຄະເນກ່ອນໜ້ານີ້ ເຊິ່ງລະບຸໄວ້ 2.7%. ສ່ວນເສດຖະກິດຂອງສິງກະໂປໃນໄຕມາດທໍາອິດຂອງປີນີ້ ຫລື ລະຫວ່າງເດືອນມັງກອນ-ມີນາຜ່ານມາ ຂະຫຍາຍຕົວ 3.0% ເມື່ອທຽບໃສ່ແບບລາຍປີ.

     ຂະນະດຽວກັນ, ລັດຖະບານສິງກະໂປຄາດຄະເນທິດທາງຂອງອຸປະສົງພາຍນອກອາດຈະມີການຫົດຢືດໃນປີນີ້. ເຖິງຢ່າງໃດກໍຕາມ, ຄວາມຂັດແຍ່ງທາງການຄ້າລະຫວ່າງຫລາຍປະເທດ ແລະ ຄວາມເຄັ່ງຕຶງດ້ານພູມສາດຍັງມີຄວາມຮຸນແຮງ. ອີກທັງເງື່ອນໄຂດ້ານນະໂຍບາຍການເງິນຂອງປະເທດທີ່ມີຂະໜາດເສດຖະກິດໃຫຍ່ຫລາຍແຫ່ງ ອາດຍັງເຮັດໃຫ້ເກີດສະພາບຜັນຜວນຂອງຕະຫລາດ ແລະ ສ້າງຊ່ອງຫວ່າງແອບແຝງຢູ່ໃນລະບົບການເງິນ ແລະ ການທະນາຄານ.