ອິດສະລາແອນເຫັນພ້ອມກັບມາຮ່ວມເຈລະຈາຫາທາງຢຸດຍິງຢູ່ກາຊາ

     ລັດຖະບານອິດສະລາແອນຢືນຢັນ ກຽມກັບເຂົ້າຮ່ວມການເຈລະຈາເລື່ອງເຂດກາຊາກັບກຸ່ມຮາມັດຜ່ານຄົນກາງ ຄືກາຕາ, ອີຢິບ ແລະ ອາເມລິກາ ໃນອາທິດໜ້າ.

     ວັນທີ 9 ສິງຫາ, ສໍານັກຂ່າວຕ່າງປະເທດລາຍງານວ່າ: ທໍານຽບນາຍົກລັດຖະມົນຕີອິດສະລາແອນອອກຖະແຫລງການຢືນຢັນການກຽມກັບເຂົ້າຮ່ວມການເຈລະຈາກັບກຸ່ມຮາມັດຜ່ານປະເທດຜູ້ໄກ່ເກ່ຍ ຄືກາຕາ, ອີຢິບ ແລະ ອາເມລິກາ ໃນວັນທີ 15 ສິງຫານີ້ ໂດຍກອງປະຊຸມອາດເກີດຂຶ້ນຢູ່ນະຄອນຫລວງໂດຮາ ຫລື ນະຄອນຫລວງໄຄໂຣ.

     ຂະນະທີ່ແຫລ່ງຂ່າວໃນລັດຖະບານອິດສະລາແອນກ່າວວ່າ: ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນເປີດກວ້າງສະເໝີຕໍ່ການເຈລະຈາ ແລະ ຢືນຢັນວ່າ: ບໍ່ເຄີຍເປັນຝ່າຍສ້າງອຸປະສັກໃຫ້ແກ່ການຫາລືໃນໄລຍະເວລາຜ່ານມາ.

     ການເຄື່ອນໄຫວຄັ້ງນີ້ເກີດຂຶ້ນພາຍໃນໄລຍະເວລາພຽງບໍ່ເທົ່າໃດວັນ ພາຍຫລັງກຸ່ມຮາມັດປະກາດແຕ່ງຕັ້ງທ່ານ ຢາຢາ ຊິນວາ ຜູ້ນໍາກຸ່ມຮາມັດຢູ່ເຂດກາຊາ ໃຫ້ດໍາລົງຕໍາແໜ່ງຜູ້ນໍາສູງສຸດຝ່າຍການເມືອງຄົນໃໝ່ ແທນທ່ານ ອິສມາອິລ ຮານິເຢ ເຊິ່ງເສຍຊີວິດຈາກການຖືກລອບສັງຫານ ຢູ່ນະຄອນຫລວງເຕຫະຣານ ເມືອງຫລວງຂອງອີຣານ ໃນອາທິດຜ່ານມາ.

      ຈົນຮອດຕອນນີ້, ອິດສະລາແອນຍັງບໍ່ເຄີຍມີຄວາມເຫັນຢ່າງເປັນທາງການຕໍ່ການເສຍຊີວິດຂອງທ່ານ ຮານິເຢ, ແຕ່ທ່ານ ອາລີ ບາເກຣີ ຮັກສາການລັດຖະມົນຕີກະຊວງການຕ່າງປະເທດອີຣານ ກ່າວວ່າ: ອິດສະລາແອນກໍາລັງເຮັດຜິດໃນທາງຍຸດທະສາດ ເນື່ອງຈາກການເສຍຊີວິດຂອງທ່ານ ຮານິເຢ ໃນລັກສະນະນີ້ຈະຍິ່ງເຮັດໃຫ້ຄວາມຂັດແຍ່ງຢູ່ພາກພື້ນລຸກລາມຂະຫຍາຍວົງກວ້າງ.

      ເຖິງຢ່າງໃດກໍຕາມ, ທ່ານ ເນທັນຢາຮູ ກ່າວວ່າ: ອິດສະລາແອນ ມີຄວາມພ້ອມສູງສຸດຕໍ່ເຫດການທຸກຮູບແບບ ບໍ່ວ່າຈະເປັນທາງບຸກ ຫລື ທາງຮັບ. ພ້ອມກ່າວວ່າ: ໃຜຈະໂຈມຕີອິດສະລາແອນຈະຖືກໂຈມຕີກັບ.