ກົດໝາຍກ່ຽວກັບຊີ້ນໝາເລີ່ມມີຜົນບັງຄັບໃຊ້ຢູ່ ສ.ເກົາຫລີ

     ສ.ເກົາຫລີ ເລີ່ມບັງຄັບໃຊ້ກົດໝາຍກ່ຽວກັບການຫ້າມຂ້າໝາເພື່ອການບໍລິໂພກທາງການຄ້າແລ້ວ.

     ວັນທີ 8 ສິງຫາ, ສໍານັກຂ່າວຕ່າງປະເທດລາຍງານວ່າ: ກົດໝາຍຫ້າມການເຮັດຟາມໝາເພື່ອການຂ້າ ແລະ ການຈັດຈໍາໜ່າຍຊີ້ນໝາເພື່ອບໍລິໂພກ ມີຜົນບັງຄັບໃຊ້ຢ່າງເປັນທາງການຢູ່ ສ.ເກົາຫລີ ໃນວັນທີ 7 ສິງຫາຜ່ານມາ.

     ຂະນະທີ່ລາຍງານໂດຍກະຊວງກະສິກໍາ, ອາຫານ ແລະ ກິດຈະການຊົນນະບົດຂອງ ສ.ເກົາຫລີ ລະບຸວ່າ: ມີກິດຈະການຟາມໝາ 5,625 ແຫ່ງໃນປະເທດໄດ້ຮັບຜົນກະທົບຈາກກົດໝາຍສະບັບໃໝ່ ແລະ ລັດຖະບານດໍາເນີນການຊົດເຊີຍຕາມຂັ້ນຕອນ ເຊິ່ງຈະມີການກໍານົດຈໍານວນເງິນຊ່ວຍເຫລືອອີກເທື່ອໜຶ່ງ. ສ່ວນຮ້ານອາຫານທີ່ຈໍາໜ່າຍຊີ້ນໝາ ແລະ ທຸລະກິດຈໍາໜ່າຍຊີ້ນໝາເພື່ອການບໍລິໂພກຈະໄດ້ຮັບຄ່າຊົດເຊີຍເຊັ່ນກັນ.

      ທັງນີ້, ສະພານິຕິບັນຍັດແຫ່ງຊາດ ສ.ເກົາຫລີ ມີມະຕິໃນເດືອນມັງກອນຜ່ານມາ ບັນຍັດກົດໝາຍຫ້າມການລ້ຽງ, ຂ້າ ແລະ ຈໍາໜ່າຍໝາເພື່ອບໍລິໂພກ ບຸກຄົນໃດຝ່າຝືນ ໂດຍຍັງເຮັດກິດຈະການກ່ຽວກັບການຜະລິດຊີ້ນໝາ ຕ້ອງມີໂທດຕິດຄຸກເປັນເວລາສູງສຸດ 3 ປີ ຫລື ປັບໄໝສູງສຸດ 30 ລ້ານວອນ.

     ສ່ວນບຸກຄົນໃດກໍຕາມທີ່ລ້ຽງໝາເພື່ອການຂ້າ ຫລື ຂາຍເພື່ອການຂ້າແລ້ວເອົາຊີ້ນມາບໍລິໂພກ ຕ້ອງມີໂທດຕິດຄຸກສູງສຸດ 2 ປີ ຫລື ປັບໄໝສູງສຸດ 20 ລ້ານວອນ.

     ການບໍລິໂພກຊີ້ນໝາມີມາຍາວນານນັບພັນປີຢູ່ ສ.ເກົາຫລີ ດ້ວຍຄວາມເຊື່ອກ່ຽວກັບການບໍາລຸງ ແລະ ເພື່ອຄວາມແຂງແຮງຂອງຮ່າງກາຍ. ອີກດ້ານໜຶ່ງ ມີລາຍງານວ່າ: ລາຄາຊີ້ນແກະດໍາໃນຕະຫລາດ ສ.ເກົາຫລີ ເພີ່ມສູງຂຶ້ນຫລາຍ ເນື່ອງຈາກປະຊາຊົນສະແຫວງຫາມາບໍລິໂພກແທນຊີ້ນໝາ ໂດຍລາຄາຂາຍສົ່ງກິໂລລະ 20,000 ວອນ ໃນເດືອນມິຖຸນາຜ່ານມາ ເພີ່ມຂຶ້ນຫລາຍກວ່າ 50% ເມື່ອທຽບໃສ່ໄລຍະເວລາດຽວກັນຂອງປີຜ່ານມາ.