ນາຍົກລັດຖະມົນຕີບັງກະລາເທດລາອອກ ກອງທັບປະກາດ ຕັ້ງລັດຖະບານຮັກສາການ

      ຜູ້ບັນຊາການກອງທັບບັງກະລາເທດປະກາດການຕັ້ງລັດຖະບານຊົ່ວຄາວ ເພື່ອຮັກສາສະຖຽນລະພາບຂອງປະເທດ ພາຍຫລັງນາຍົກລັດຖະມົນຕີ ນາງ ຊີກ ຮາສິນາ ລາອອກຈາກຕໍາແໜ່ງ ເຊິ່ງຜູກຂາດມາແຕ່ປີ 2009.

     ວັນທີ 5 ສິງຫາ, ສໍານັກຂ່າວຕ່າງປະເທດລາຍງານວ່າ: ພົນເອກ ວາເກີ ອຸຊ ຊາມັນ ປະທານຄະນະເສນາທິການທະຫານຮ່ວມບັງກະລາເທດ ຖະແຫລງຜ່ານສະຖານີໂທລະພາບແຫ່ງຊາດວ່າ: ກອງທັບຈະຈັດຕັ້ງລັດຖະບານຮັກສາການ ເນື່ອງຈາກນາຍົກລັດຖະມົນຕີ ນາງ ຊີກ ຮາສິນາ ລາອອກຈາກຕໍາແໜ່ງແລ້ວ ພາຍຫລັງຄອງອໍານາດມາ 15 ປີ.

     ທັງນີ້, ພົນເອກ ຊາມັນ ບໍ່ໄດ້ກ່າວຢ່າງຊັດເຈນວ່າຈະດໍາລົງຕໍາແໜ່ງຜູ້ນໍາລັດຖະບານຊົ່ວຄາວເອງ ຫລື ບໍ່, ແຕ່ກ່າວວ່າ: ຈະຫາລືກັບທຸກພາກສ່ວນ ຍົກເວັ້ນພັກສັນນິບາດອາວາມີຂອງນາງ ຮາສິນາ ແລະ ເນັ້ນວ່າ: ສິ່ງສໍາຄັນທີ່ສຸດໃນເວລານີ້ ຄືການຕ້ອງຢຸດຄວາມຮຸນແຮງໃຫ້ໄວທີ່ສຸດ ແລະ ສະແດງຄວາມຫວັງວ່າ ສະຖານະການຕໍ່ຈາກນີ້ຈະສະຫງົບຂຶ້ນ.

      ກອງທັບບັງກະລາເທດເຄີຍຈັດຕັ້ງລັດຖະບານຮັກສາການ ຫລື ລັດຖະບານຊົ່ວຄາວໃນປີ 2007 ເຊິ່ງລັດຖະບານຊຸດດັ່ງກ່າວຢູ່ໃນອໍານາດມາປະມານ 2 ປີ ເພື່ອຮັກສາຄວາມສະຫງົບຈາກວິກິດການເມືອງໃນເວລານັ້ນ.

     ຂະນະດຽວກັນ, ພົນເອກ ຊາມັນ ກ່າວວ່າ: ຈະດໍາເນີນຄະດີກັບທຸກຝ່າຍທີ່ກ່ຽວຂ້ອງຕໍ່ສະຖານະການຮຸນແຮງ ແລະ ການປະທ້ວງນອງເລືອດນັບແຕ່ເດືອນກໍລະກົດຜ່ານມາ ໂດຍມີສາເຫດມາຈາກການທີ່ຜູ້ປະທ້ວງ ເຊິ່ງສ່ວນຫລາຍເປັນນັກສຶກສາ ຮຽກຮ້ອງໃຫ້ຢຸດການສະຫງວນໂກຕ້າຕໍາແໜ່ງວຽກລັດຖະກອນໃຫ້ລູກຫລານຂອງຜູ້ທີ່ຮ່ວມຕໍ່ສູ້ ແລະ ເຄື່ອນໄຫວໃຫ້ບັງກະລາເທດເປັນເອກະລາດຈາກປາກິດສະຖານໃນປີ 1971.

      ການປະທ້ວງນັບແຕ່ເດືອນກໍລະກົດຈົນຮອດປັດຈຸບັນ ສົ່ງຜົນເຮັດໃຫ້ມີຜູ້ເສຍຊີວິດຫລາຍກວ່າ 300 ຄົນ ໃນຈໍານວນນີ້ລວມທັງຜູ້ເສຍຊີວິດຢ່າງໜ້ອຍ 94 ຄົນ ຈາກການປະທ້ວງໃນວັນທີ 4 ສິງຫາຜ່ານມາພຽງວັນດຽວ ເຊິ່ງມີຕໍາຫລວດຢ່າງໜ້ອຍ 14 ຄົນ.