ປະເທດມຸດສະລິມຊຸກດັນ ສປຊ ປະນາມ ການລະເມີດສິດທິມະນຸດຢູ່ມຽນມາ
ປະເທດມຸດສະລິມ ນຳໂດຍອາຣັບບີ ຊາອຸດິດ ຕ້ອງການໃຫ້ສະຫະປະຊາຊາດອອກຖະແຫລງການປະນາມການລະເມີດສິດທິມະນຸດຢ່າງຮ້າຍແຮງຢູ່ມຽນມາ ແລະ ຮຽກຮ້ອງໃຫ້ກອງທັບຢຸດການປາບປາມຊາວໂຣຮິງຢາ.
ຮ່າງຂໍ້ມະຕິ ເຊິ່ງສະເໜີຕໍ່ກອງປະຊຸມຄະນະກຳມະການສິດທິມະນຸດແຫ່ງສະຫະປະຊາຊາດໃນອາທິດນີ້ລະບຸວ່າ: ປະເທດສະມາຊິກສະຫະປະຊາຊາດກັງວົນຕໍ່ສະຖານະການຄວາມຮຸນແຮງ ແລະ ການໃຊ້ກຳລັງແບບບໍ່ເໝາະສົມຂອງກອງກຳລັງມຽນມາຕໍ່ຊາວໂຣຮິງຢາ ເຊິ່ງຖືເປັນວິກິດການດ້ານຜູ້ລີ້ໄພຄັ້ງຮ້າຍແຮງທີ່ສຸດໃນຮອບຫລາຍທົດສະວັດ ໂດຍມີຊາວໂຣຮິງຢາປະມານ 600.000 ຄົນອົບພະຍົບຫລົບໜີການປາບປາມຂອງກອງທັບຢູ່ລັດຍະໄຂ່ນັບແຕ່ເດືອນສິງຫາຜ່ານມາ. ເຖິງຢ່າງໃດກໍຕາມ ຄາດວ່າກອງປະຊຸມຄະນະກຳມະການສິດທິມະນຸດຈະພິຈາລະນາຮ່າງຂໍ້ມະຕິດັ່ງກ່າວປະມານວັນທີ 14 ພະຈິກນີ້ ແລະ ຈະຫາລືໃນກອງປະຊຸມໃຫຍ່ອີກ 1 ເດືອນຕໍ່ມາ.
ຮ່າງຂໍ້ມະຕິຂອງອົງການການຮ່ວມມືອິດສະລາມ ຫລື OIC 57 ປະເທດ ເຮັດໃຫ້ມຽນມາກັບມາຖືກວິພາກວິຈານເລື່ອງການລະເມີດສິດທິມະນຸດຢູ່ກອງປະຊຸມ ສປຊ ອີກເທື່ອໜຶ່ງ, ຫລັງຍົກເວັ້ນໄປ 1 ປີ ໃນປີຜ່ານມາສະຫະພາບເອີຣົບ ຫລື EU ຕັດສິນໃຈບໍ່ຕຳໜິມຽນມາເລື່ອງສິດທິມະນຸດເປັນເທື່ອທຳອິດໃນຮອບ 15 ປີ, ພາຍຫລັງຍອມຮັບວ່າມີຄວາມຄືບໜ້າໃນການແກ້ໄຂບັນຫາພາຍໃຕ້ການນຳຂອງທ່ານນາງ ອອງຊານ ຊູຈີ.
