ບັງກະລາເທດປະທ້ວງນອງເລືອດໄລ່ລັດຖະບານ ວັນດຽວມີຜູ້ເສຍຊີວິດ 90 ກວ່າຄົນ
ມີຜູ້ເສຍຊີວິດບໍ່ຕໍ່າກວ່າ 90 ຄົນ ຈາກເຫດການປະທ້ວງຕໍ່ຕ້ານລັດຖະບານຮອບໃໝ່ຢູ່ບັງກະລາເທດ ເຊິ່ງມີສາເຫດມາຈາກການຮຽກຮ້ອງໃຫ້ຍຸບການແບ່ງໂກຕ້າວຽກລັດຖະກອນ.
ວັນທີ 5 ສິງຫາ, ສໍານັກຂ່າວຕ່າງປະເທດລາຍງານວ່າ: ສື່ທ້ອງຖິ່ນຫລາຍແຫ່ງຢູ່ບັງກະລາເທດລາຍງານໂດຍອ້າງຂໍ້ມູນດ້ານການສືບສວນສອບສວນວ່າ: ຈໍານວນຜູ້ເສຍຊີວິດຈາກການປະທ້ວງຕໍ່ຕ້ານລັດຖະບານຢູ່ບັງກະລາເທດເພີ່ມເປັນຫລາຍກວ່າ 90 ຄົນ ໃນຈໍານວນນີ້ລວມຕໍາຫລວດຢ່າງໜ້ອຍ 14 ຄົນ ແລະ ມີຜູ້ໄດ້ຮັບບາດເຈັບອີກຫລາຍຮ້ອຍຄົນ, ສະເພາະວັນທີ 4 ສິງຫາຜ່ານມາ ຈາກການທີ່ບັນດານັກສຶກສາຍົກລະດັບການປະທ້ວງຕໍ່ຕ້ານລັດຖະບານ ເປັນການສະແດງອາລະຍະຂັດຂືນທົ່ວປະເທດ ເພື່ອເພີ່ມແຮງກົດດັນໃຫ້ນາຍົກລັດຖະມົນຕີ ຊີກ ຮາສິນາ ລາອອກຈາກຕໍາແໜ່ງ.
ທັງນີ້, ຈໍານວນຜູ້ເສຍຊີວິດດັ່ງກ່າວເພີ່ມສະຖິຕິຜູ້ເສຍຊີວິດຈາກການປະທ້ວງເຊິ່ງເລີ່ມຂຶ້ນໃນເດືອນກໍລະກົດຜ່ານມາ ເຊິ່ງເປັນການຮຽກຮ້ອງການແກ້ໄຂການຈັດສັນໂກຕ້າຕໍາແໜ່ງວຽກລັດຖະກອນເພີ່ມເປັນຢ່າງໜ້ອຍ 283 ຄົນແລ້ວ.
ຂະນະທີ່ລັດຖະບານບັງກະລາເທດພະຍາຍາມຄວບຄຸມສະຖານະການ ດ້ວຍການປະກາດເຄີຟິວຄັ້ງໃໝ່ ຫລັງພາຍສອງອາທິດຜ່ານມາ ມີລາຍງານການການຈັບກຸມຜູ້ປະທ້ວງແລ້ວຫລາຍກວ່າ 10,000 ຄົນ, ສ່ວນທ່ານ ຮາສິນາ ຍື່ນຂໍ້ສະເໜີເຈລະຈາກັບແກນນໍາຜູ້ປະທ້ວງ ເຊິ່ງສ່ວນຫລາຍເປັນນັກສຶກສາ, ແຕ່ບໍ່ໄດ້ຮັບການຕອບສະໜອງ ໂດຍຜູ້ປະທ້ວງຍື່ນຄໍາຂາດວ່າ: ນາຍົກລັດຖະມົນຕີຕ້ອງລາອອກຈາກຕໍາແໜ່ງເທົ່ານັ້ນ.
ທ່ານ ໂຟເຄີ ເຕິກ ຂ້າຫລວງດ້ານສິດທິມະນຸດຂອງສະຫະປະຊາຊາດ (UN) ຮຽກຮ້ອງຄູ່ກໍລະນີທຸກຝ່າຍຖອຍຫ່າງຈາກການໃຊ້ຄວາມຮຸນແຮງຕໍ່ກັນ ແລະ ສະແດງຄວາມກັງວົນວ່າ: ການເດີນຂະບວນປະທ້ວງຄັ້ງໃໝ່ໃນວັນທີ 5 ສິງຫາ ຈະນໍາມາເຊິ່ງການສູນເສຍເປັນວົງກວ້າງອີກ.
ສານດີກາຂອງບັງກະລາເທດມີຄໍາພິພາກສາໃນທ້າຍເດືອນກໍລະກົດຜ່ານມາ ປັບໂກຕ້າການສະຫງວນຕໍາແໜ່ງວຽກລັດຖະກອນໄວ້ໃຫ້ລູກຫລານ ແລະ ທາຍາດຂອງວິລະບູລຸດສົງຄາມ ເຊິ່ງຮ່ວມສູ້ຮົບ ແລະ ຕໍ່ສູ້ ເພື່ອໃຫ້ບັງກະລາເທດເປັນເອກະລາດຈາກປາກິດສະຖານ ໃນປີ 1971 ຈາກເຄີຍສູງເຖິງ 30% ໃຫ້ຫລຸດລົງເຫລືອພຽງ 5%.
ຂະນະດຽວກັນ, ສານສູງສຸດຂອງບັງກະລາເທດກໍານົດໂກຕ້າວຽກລັດຖະກອນ 1% ສໍາລັບກຸ່ມຊາດພັນ ແລະ ອີກ 1% ສໍາລັບຜູ້ພິການ ແລະ ບຸກຄົນທີ່ເປັນເພດທາງເລືອກ, ສ່ວນອີກ 93% ໃຫ້ມາຈາກຜົນການທົດສອບ ແລະ ປະເມີນຕາມຄວາມຮູ້ຄວາມສາມາດຂອງແຕ່ລະບຸກຄົນ.
ເຖິງວ່າການກໍານົດໂກຕ້າໃໝ່ໂດຍສານດີກາຈະນໍາໄປສູ່ການເກີດການປ່ຽນແປງຕໍ່ຕະຫລາດແຮງງານຢູ່ບັງກະລາເທດ. ເຖິງຢ່າງໃດກໍຕາມ, ການເຄື່ອນໄຫວທີ່ເກີດຂຶ້ນຍັງບໍ່ສອດຄ່ອງຕໍ່ຂໍ້ຮຽກຮ້ອງຂອງຜູ້ປະທ້ວງ ເຊິ່ງຕ້ອງການໃຫ້ຢຸດການໃຊ້ນະໂຍບາຍເຫລົ່ານີ້ “ທີ່ເປັນການເລືອກປະຕິບັດຢ່າງຮ້າຍແຮງ”.
