ກວດພົບ 8 ບໍລິສັດ ແລະ ບຸກຄົນອີກ 2 ຄົນ ບຸກລຸກເນື້ອທີ່ດິນບໍ່ຖືກຕ້ອງ ລວມເນື້ອທີ່ຫລາຍກວ່າ 5,860 ເຮັກຕາ

ພົນໂທ ວັນທອງ ກອງມະນີ ເຈົ້າແຂວງອັດຕະປື ລາຍງານຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ອັດ ຕະປື ຊຸດທີ II ໃນວັນທີ 30 ກໍລະກົດ 2024 ວ່າ: ໄລຍະຜ່ານມາ ແຂວງອັດຕະປື ໄດ້ຖືເອົາການແກ້ໄຂບັນຫາການບຸກລຸກທີ່ດິນປ່າໄມ້ ຢູ່ເມືອງສະໜາມໄຊ ເປັນບູລິມະສິດທີໜຶ່ງ, ຜ່ານການຈັດຕັ້ງປະຕິບັດຂອງເຈົ້າໜ້າທີ່ທີ່ກ່ຽວຂ້ອງຂອງແຂວງ ໄດ້ກວດເຫັນການບຸກລຸກເນື້ອທີ່ດິນຂອງລັດ, ໂດຍສະເພາະເນື້ອທີ່ດິນໃນເຂດປ່າຜະລິດ ແລະ ປ່າປ້ອງກັນ ມີ 8 ບໍລິສັດ ແລະ ບຸກຄົນອີກ 2 ຄົນ ເຂົ້າໄປບຸກເບີກທີ່ບໍ່ຖືກຕ້ອງຕາມລະບຽບກົດໝາຍ ລວມເນື້ອທີ່ຫລາຍກວ່າ 5,860 ເຮັກຕາ. ປັດຈຸບັນ ອົງການປົກຄອງແຂວງ ໄດ້ແຕ່ງຕັ້ງຄະນະສະເພາະກິດລົງແກ້ໄຂ ແລະ ຜົນການແກ້ໄຂແມ່ນມີຄວາມຄືບໜ້າຫລາຍສົມຄວນ ເປັນຕົ້ນ: ໄດ້ໃຫ້ປະຊາຊົນອອກຈາກພື້ນທີ່, ລົງກວດກາ ແລະ ປັກຫລັກໝາຍເຂດພື້ນທີ່, ຄຸ້ມຄອງພື້ນທີ່ ທີ່ປະຊາຊົນອອກໄປ ເພື່ອບໍ່ໃຫ້ເຂົາເຈົ້າກັບມາບຸກລຸກຄືນ ແລະ ອື່ນໆ.

ໄລຍະຜ່ານມາອົງການປົກຄອງ ແຂວງອັດຕະປື ໄດ້ອອກຄຳສັ່ງຕ່າງໆ ເພື່ອເປັນການປົກປັກຮັກສາ ແລະ ຄຸ້ມຄອງຊັບພະຍາກອນທໍາມະຊາດ, ກ້າວໄປເຖິງເຮັດໃຫ້ການຄຸ້ມຄອງເສດຖະກິດ-ສັງຄົມຂອງແຂວງ ໃຫ້ເປັນລະບົບ, ສອດຄ່ອງຕາມລະບຽບກົດໝາຍ, ມີຄວາມສະຫງົບ ເປັນລະບຽບຮຽບຮ້ອຍ ແລະ ຂະຫຍາຍຕົວຕາມແຜນການທີ່ວ່າງໄວ້, ໃນນີ້ ໄດ້ອອກຄໍາສັ່ງວ່າດ້ວຍການຫ້າມຈັບຈອງ ແລະ ບຸກລຸກທີ່ດິນ ໂດຍບໍ່ໄດ້ຮັບການອະນຸຍາດ, ຄໍາສັ່ງ ວ່າດ້ວຍການຢຸດຕິການຂຸດຄົ້ນແຮ່ຄໍາຕົກຂ້ອນ, ຄໍາສັ່ງ ວ່າດ້ວຍການຢຸດຕິການສໍາຫລວດ, ຂຸດຄົ້ນໄມ້ ແລະ ທ້ອນໂຮມໄມ້, ຄໍາສັ່ງ ວ່າດ້ວຍການຄຸ້ມຄອງ ແລະ ເກັບກູ້ນໍາໃຊ້ເຄື່ອງປ່າຂອງດົງ, ຄໍາສັ່ງ ວ່າດ້ວຍການຕິດຕາມ, ກວດກາ ແລະ ໃຊ້ມາດຕະການຕໍ່ຜູ້ລະເມີດຈຳໜ່າຍ, ຊື້-ຂາຍ ສິນຄ້າເກືອດຫ້າມປະເພດຕ່າງໆ ແລະ ຄໍາສັ່ງ ວ່າດ້ວຍການເພີ່ມທະວີຄຸ້ມຄອງກິດຈະ ການແຮ່ທາດຢູ່ພາຍໃນ ແຂວງອັດຕະປື.

ທ່ານ ເຈົ້າແຂວງອັດຕະປື ໃຫ້ຮູ້ຕື່ມວ່າ: ໃນຕໍ່ໜ້ານີ້ ອົງການປົກຄອງແຂວງ ຈະສືບຕໍ່ແກ້ໄຂບັນຫາການບຸກລຸກທີ່ດິນປ່າໄມ້ ເຂດເມືອງສະໜາມໄຊ ຢ່າງແຂງແຮງ, ເດັດຂາດ ເຂັ້ມງວດຕາມລະບຽບກົດໝາຍ. ພ້ອມຈະສຸມໃສ່ຈັດສັນທີ່ດິນທຳການຜະລິດໃຫ້ປະຊາຊົນຄືນໃໝ່, ກຳນົດເຂດດິນສະຫງວນຂອງລັດເພື່ອຟື້ນຟູປ່າໄມ້, ເຂດເຊົ່າ-ສໍາປະທານໃຫ້ນັກລົງທຶນເພື່ອການພັດທະນາ ແລະ ຈັດສັນອາຊີບທີ່ໝັ້ນຄົງຍາວນານໃຫ້ແກ່ປະຊາຊົນ ເພື່ອແກ້ໄຂບັນຫາການເຄື່ອນຍ້າຍແຮງງານເລື່ອນລອຍ.

ຂ່າວ: ແຂວງອັດຕະປື