ກໍາປູເຈຍພົບຜູ້ຕິດເຊື້ອໄວຣັສໄຂ້ຫວັດສັດປີກຄົນທີ 8 ໃນປີນີ້ ເປັນເດັກຜູ້ຊາຍຈາກແຂວງສວາຍຣຽງ
ວັນທີ 2 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກກໍາປູເຈຍອອກຖະແຫລງການ ຢືນຢັນການພົບເດັກນ້ອຍຜູ້ຊາຍອາຍຸ 4 ປີ ອາໄສຢູ່ແຂວງສວາຍຣຽງ ທາງຕາເວັນອອກສຽງໃຕ້ຂອງປະເທດ ມີຜົນກວດເຊື້ອໄວຣັສໄຂ້ຫວັດສັດປີກສາຍພັນ H5N1 ເປັນບວກ.
ຂະນະທີ່ຜົນການສອບສວນພະຍາດພົບວ່າ: ເດັກນ້ອຍຄົນດັ່ງກ່າວມີປະຫວັດສໍາຜັດສັດປີກທີ່ຕາຍຢູ່ເຮືອນ ແລະ ຄອບຄົວຂອງເດັກນ້ອຍຍັງນໍາເອົາຊາກສັດປີກມາປຸງແຕ່ງອາຫານ ພາຍໃນໄລຍະເວລາປະມານ 12 ວັນ ກ່ອນເດັກຄົນນີ້ບໍ່ສະບາຍ.
ເຖິງວ່າອາການຂອງຜູ້ຕິດເຊື້ອໃນຕອນນີ້ຖືວ່າດີຂຶ້ນເປັນລໍາດັບ, ແຕ່ຍັງຕ້ອງຢູ່ພາຍໃນການເບິ່ງແຍງຢ່າງໃກ້ຊິດຂອງຄະນະແພດໝໍ.
ທັງນີ້, ເດັກນ້ອຍອາຍຸ 4 ປີຄົນນີ້ ຖືເປັນຜູ້ຕິດເຊື້ອພະຍາດໄຂ້ຫວັດສັດປີກສະສົມຢ່າງໜ້ອຍເປັນຄົນທີ 8 ຂອງກໍາປູເຈຍແລ້ວໃນປີນີ້ ເຊິ່ງເປັນເດັກສູງເຖິງ 7 ຄົນ ແລະ ມີຜູ້ເສຍຊີວິດແລ້ວ 1 ຄົນ.
ນັບແຕ່ປີ 2003 ຈົນຮອດປັດຈຸບັນ ກໍາປູເຈຍມີຈໍານວນຜູ້ຕິດເຊື້ອໄວຣັສໄຂ້ຫວັດສັດປີກສະສົມໃນປະເທດຢ່າງໜ້ອຍ 70 ຄົນ ທຸກຄົນຕິດເຊື້ອສາຍພັນ H5N1 ແລະ ມີຜູ້ເສຍຊີວິດແລ້ວ 42 ຄົນ.
