ນ້ຳຖ້ວມໃຫຍ່ຢູ່ເມືອງໃນມົນທົນຫູໜານ ມີຜູ້ເສຍຊີວິດແລ້ວ 30 ກວ່າຄົນ
ວັນທີ 2 ສິງຫາ, ສື່ທ້ອງຖິ່ນຫລາຍແຫ່ງຂອງຈີນລາຍງານວ່າ: ເມືອງຈືຊິງ ໃນມົນທົນຫູໜານ ທາງຕອນກາງຂອງຈີນ ຜະເຊີນຝົນຕົກຢ່າງໜັກໃນບໍ່ເທົ່າໃດວັນຜ່ານມາ ເຊິ່ງເປັນອິດທິພົນຈາກພາຍຸແຄມີ ສົ່ງຜົນເຮັດໃຫ້ພື້ນທີ່ບາງສ່ວນຂອງເມືອງຈືຊິງ ມີປະລິມານນໍ້າຝົນສະສົມສູງເຖິງ 645 ມິນລີແມັດ ພາຍໃນໄລຍະເວລາພຽງ 24 ຊົ່ວໂມງ ຂອງວັນທີ 30 ກໍລະກົດຜ່ານມາ.
ທັງນີ້, ໜ່ວຍງານທີ່ກ່ຽວຂ້ອງອົບພະຍົບປະຊາຊົນໃນພື້ນທີ່ສ່ຽງ 11,000 ກວ່າຄົນ, ແຕ່ມີການຢືນຢັນຜູ້ເສຍຊີວິດແລ້ວຫລາຍກວ່າ 30 ຄົນ ແລະ ມີຜູ້ໄດ້ຮັບບາດເຈັບອີກຢ່າງໜ້ອຍ 35 ຄົນ.
ຂະນະທີ່, ທ່ານ ຫລີ່ ສຽງ ນາຍົກລັດຖະມົນຕີຈີນ ລົງພື້ນທີ່ບ້ານສອງແຫ່ງໃນເມືອງຈືຊິງ ເພື່ອສໍາຫລວດຄວາມເສຍຫາຍ ແລະ ສັງເກດການການປະຕິບັດງານຂອງໜ່ວຍກູ້ໄພ ໃນການໃຫ້ການຊ່ວຍເຫລືອປະຊາຊົນວ່າມີຄວາມຄືບໜ້າແນວໃດ.
ກົມອຸຕຸນິຍົມວິທະຍາແຫ່ງຊາດຈີນ ລາຍງານອຸນຫະພູມສະເລ່ຍຂອງປະເທດໃນເດືອນກໍລະກົດຜ່ານມາຢູ່ລະດັບ 23.21 ອົງສາ ທໍາລາຍສະຖິຕິອຸນຫະພູມສະເລ່ຍຂອງເດືອນກໍລະກົດ 2017 ເຊິ່ງວັດແທກໄດ້ 23.17 ອົງສາ ແລະ ອຸນຫະພູມສະເລ່ຍໃນເດືອນກໍລະກົດຜ່ານມາ ຖືເປັນສະຖິຕິສູງທີ່ສຸດນັບແຕ່ເລີ່ມມີການບັນທຶກຂໍ້ມູນຢ່າງເປັນທາງການໃນປີ 1961.
ປັດຈຸບັນ, ຈີນເປັນປະເທດຜູ້ປ່ອຍແກັສເຮືອນແກ້ວລາຍໃຫຍ່ທີ່ສຸດຂອງໂລກ ໂດຍມີເປົ້າໝາຍວ່າປະລິມານການປ່ອຍແກັສເຮືອນແກ້ວຈະຂຶ້ນເຖິງຈຸດສູງສຸດພາຍໃນປີ 2030 ກ່ອນຫລຸດລົງແລ້ວເຂົ້າສູ່ເປົ້າໝາຍການເປັນປະເທດປອດກາກບອນ ຫລື ກາກບອນເປັນສູນ ພາຍໃນປີ 2060.
