ເມືອງລາຮໍຂອງປາກິດສະຖານ ຜະເຊີນຝົນຕົກໜັກເປັນປະຫວັດສາດ
ວັນທີ 2 ສິງຫາ, ສໍານັກຂ່າວຕ່າງປະເທດລາຍງານວ່າ: ກົມອຸຕຸນິຍົມວິທະຍາແຫ່ງຊາດປາກິດສະຖານ (PMD) ລະບຸວ່າ: ເມືອງລາຮໍ ທາງຕາເວັນອອກຂອງປະເທດ ມີປະລິມານຝົນເກືອບ 360 ມິນລີແມັດ ໃນເວລາ 3 ຊົ່ວໂມງ ເຊິ່ງທໍາລາຍສະຖິຕິເກົ່າໃນເດືອນກໍລະກົດ 1980 ເຊິ່ງບັນທຶກປະລິມານນໍ້າຝົນ 332 ມິນລີແມັດ ໃນໄລຍະເວລາດຽວກັນ.
ທັງນີ້, PMD ຄາດຄະເນວ່າ: ລະດູມໍລະສຸມຂອງປີນີ້ຈະມີຝົນຕົກໜັກກວ່າປົກກະຕິຢູ່ປາກິດສະຖານ. ຂະນະທີ່ຜູ້ຊ່ຽວຊານຫລາຍຄົນກ່າວວ່າ: ປາກິດສະຖານເປັນໜຶ່ງໃນປະເທດທີ່ມີຄວາມສ່ຽງຫລາຍທີ່ສຸດຕໍ່ສະພາບອາກາດ ອັນເກີດຈາກການປ່ຽນແປງສະພາບອາກາດ.
ສ່ວນສໍານັກງານບໍລິຫານແກ້ໄຂໄພພິບັດລະດັບແຄວ້ນ (PDMA) ລະບຸວ່າ: ໃນໄລຍະ 3 ວັນຜ່ານມາ ແຄວ້ນໄຄເບີປັກຕຸນຄວາ ທາງຕາເວັນຕົກສຽງເໜືອຂອງປາກິດສະຖານ ມີຜູ້ເສຍຊີວິດຈາກຝົນຕົກໜັກຢ່າງໜ້ອຍ 24 ຄົນ, ສ່ວນຕໍາຫລວດທ້ອງຖິ່ນລາຍງານວ່າ: ເມືອງລາຮໍຢູ່ແຄວ້ນປັນຈາບ ມີຜູ້ເສຍຊີວິດ 1 ຄົນ ຈາກໄຟຟ້າຊ໊ອດ.
ເຫດການຝົນຕົກໜັກ ເຮັດໃຫ້ໂຮງໝໍຂອງລັດ 2 ແຫ່ງ ຢູ່ເມືອງລາຮໍ ລາຍງານວ່າມີນໍ້າຖ້ວມຢູ່ຕຶກຄົນເຈັບ ແລະ ໄຟຟ້າດັບເປັນໄລຍະ. ອີກທັງຖະໜົນຫລາຍເສັ້ນຈົມຢູ່ໃຕ້ນໍ້າ ສົ່ງຜົນເຮັດໃຫ້ການຈະລາຈອນ ແລະ ທຸລະກິດເກີດການຊະງັກງັນ.
ເຖິງວ່າລະດູມໍລະສຸມມີຄວາມສໍາຄັນຕໍ່ຊາວກະສິກອນ, ແຕ່ຮູບແບບສະພາບອາກາດທີ່ປ່ຽນແປງ ເຊິ່ງນັກວິທະຍາສາດເຊື່ອວ່າເປັນຜົນກະທົບຈາກການປ່ຽນແປງສະພາບອາກາດ ເຮັດໃຫ້ຊີວິດ ແລະ ການເປັນຢູ່ຂອງຊາວປາກິດສະຖານຕົກຢູ່ໃນຄວາມສ່ຽງ ໂດຍໃນເດືອນເມສາຜ່ານມາ ຖືເປັນເດືອນທີ່ມີຝົນຕົກໜັກທີ່ສຸດສໍາລັບປາກິດສະຖານ ນັບແຕ່ປີ 1961 ລວມມີຜູ້ເສຍຊີວິດຈາກຟ້າຜ່າ ແລະ ເຫດການທີ່ກ່ຽວຂ້ອງກັບພາຍຸຢ່າງໜ້ອຍ 143 ຄົນ.
