ພາກເໜືອຂອງຫວຽດນາມຜະເຊີນນໍ້າຖ້ວມໜັກ ມີຜູ້ເສຍຊີວິດແລ້ວ 10 ກວ່າຄົນ
August 2, 2024 - 2:45 PM
ວັນທີ 2 ສິງຫາ 2024, ສື່ທ້ອງຖິ່ນຂອງຫວຽດນາມລາຍງານວ່າ: ພາກເໜືອຂອງປະເທດ ລວມທັງພື້ນທີ່ບາງສ່ວນຂອງນະຄອນຫລວງຮ່າໂນ້ຍ ຖືກນໍ້າຖ້ວມຢ່າງໜັກ ເນື່ອງມາຈາກອິດທິພົນຂອງພາຍຸເຂດຮ້ອນພະພິຣຸນ, ທາງດ້າານກົມອຸຕຸນິຍົມວິທະຍາແຫ່ງຊາດຂອງຫວຽດນາມລາຍງານວ່າ: ສະຖານະການຈະເລີ່ມດີຂຶ້ນນັບແຕ່ທ້າຍອາທິດນີ້ເປັນຕົ້ນໄປ.
ເທດສະບານນະຄອນຫລວງຮ່າໂນ້ຍໄດ້ອົບພະຍົບປະຊາຊົນຫລາຍພັນຄົນຢູ່ບາງເຂດ ເນື່ອງຈາກຝົນຕົກໜັກພາຍໃນໄລຍະເວລາອັນສັ້ນ ແຕ່ສົ່ງຜົນເຮັດໃຫ້ເກີດນໍ້າຖ້ວມກະທັນຫັນ ແລະ ມີດິນເຈື່ອນໃນບາງພື້ນທີ່ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 3 ຄົນ.
ຂະນະທີ່ຕົ້ນອາທິດຜ່ານມາ ມີລາຍງານຜູ້ເສຍຊີວິດຢ່າງໜ້ອຍ 7 ຄົນ ຈາກເຫດດິນເຈື່ອນ ແລະ ນໍ້າຖ້ວມກະທັນຫັນຢູ່ຫລາຍແຂວງທາງພາກເໜືອຂອງປະເທດ.
