ທະນາຄານກາງ ສະຫະລັດ ປະກາດຮັກສາດອກເບ້ຍໄວ້ຕາມເດີມ ແຕ່ຈະເລີ່ມຫລຸດເດືອນກັນຍາ 2024

ວັນທີ 1 ສິງຫາ 2024 ນີ້, ສຳນັກຂ່າວຕ່າງປະເທດລາຍງານວ່າ: ທະນາຄານກາງ ສະຫະລັດອາເມລິກາ (FED) ປະກາດວ່າຍັງຮັກສາອັດຕາດອກເບ້ຍໄວ້ທີ່ອັດຕາ 5.25 – 5.50% ແຕ່ສົ່ງສັນຍານວ່າຈະຫລຸດອັດຕາດອກເບ້ຍລົງໃນເດືອນກັນຍາໜ້ານີ້, ການຕັດສິນໃຈດັ່ງກ່າວ ເປັນໄປຕາມທີ່ຕະຫລາດຄາດວ່າ FED ຈະຍັງບໍ່ປັບຫລຸດອັດຕາດອກເບ້ຍໃນການປະຊຸມຄັ້ງນີ້.

ຖະແຫລງການຂອງ FED ລະບຸວ່າ: ຕົວຊີ້ວັດຫລ້າສຸດ ບົ່ງຊີ້ໃຫ້ເຫັນວ່າ ກິດຈະກຳທາງເສດຖະກິດຍັງຂະຫຍາຍຕົວໃນອັດຕາທີ່ໝັ້ນຄົງ, ການຈ້າງງານຍັງເພີ່ມຂຶ້ນແບບຄ່ອຍເປັນຄ່ອຍໄປ, ອັດຕາການວ່າງງານເພີ່ມຂຶ້ນແຕ່ຍັງຢູ່ໃນລະດັບຕ່ຳ, ອັດຕາເງິນເຟີ້ຄ່ອຍໆຫຼຸດລົງໃນໄລຍະປີທີ່ຜ່ານມາແຕ່ກໍຍັງສູງຂຶ້ນໃນໄລຍະບໍ່ເທົ່າໃດເດືອນຜ່ານມາ ເຊີ່ງມີຄວາມຄືບໜ້າເພີ່ມເຕີ່ມບາງດ້ານຕໍ່ການບັນລຸເປົ້າໝາຍເງິນເຟີ້ຂອງຄະນະກຳມະການຊຶ່ງຕັ້ງເປົ້າທີ່ອັດຕາ 2% .

ຄະນະກຳມະການກຳນົດນະໂຍບາຍການເງິນຂອງທະນາຄານກາງສະຫະລັດ (FMOC) ລະບຸວ່າ: (FED) ພະຍາຍາມທີ່ຈະບັນລຸເປົ້າໝາຍການຈ້າງງານ ແລະ ເງິນເຟີ້ສູງສຸດທີ່ອັດຕາ 2% ໃນໄລຍະຍາວ ໂດຍຄະນະກຳມະການມີຄວາມເຫັນວ່າ ຄວາມສ່ຽງຂອງການບັນລຸເປົ້າໝາຍການຈ້າງງານ ແລະ ອັດຕາເງິນເຟີ້ ໄດ້ຄ່ອຍໆສົມດຸນທີ່ດີຂຶ້ນ ທ່າອ່ຽງທາງດ້ານເສດຖະກິດມີຄວາມບໍ່ແນ່ນອນ ແລະ ຄະນະກຳມະ ການດັ່ງກ່າວໄດ້ຖືສຳຄັນກັບຄວາມສ່ຽງທັງສອງດ້ານຂອງພາລະກິດຄູ່ຂະໜານ, ໂດຍຄະນະກຳມະການໄດ້ຮັກສາອັດຕາດອກເບ້ຍຂ້າມຄືນໃນລະດັບ 5.25 – 5.50% ເຊິ່ງເປັນລະດັບອ້າງອີງ ແຕ່ໃນຂະນະດຽວກັນກໍ່ໄດ້ກຽມພ້ອມການສຳລັບການປັບຫລຸດອັດຕາດອກເບ້ຍໃນການປະຊຸມຄັ້ງຕໍ່ໄປ ທີ່ຈະຈັດຂຶ້ນລະຫວ່າງ 17-18 ກັນຍາປີນີ້.