ອິນໂດເນເຊຍແກ້ໄຂກົດໝາຍ ຫ້າມບຸກຄົນອາຍຸຕໍ່າກວ່າ 21 ປີຊື້ຢາສູບ
ວັນທີ 1 ສິງຫາ, ສໍານັກຂ່າວຕ່າງປະເທດລາຍງານວ່າ: ອິນໂດເນເຊຍປັບເກນອາຍຸຂັ້ນຕໍ່າສໍາລັບການຊື້ຢາສູບຈາກ 18 ປີເປັນ 21 ປີ ເພື່ອຄວບຄຸມພຶດຕິກໍາການສູບຢາທີ່ເປັນອັນຕະລາຍໃນປະເທດ ເຊິ່ງມີອັດຕາການສູບຢາສູງທີ່ສຸດແຫ່ງໜຶ່ງຂອງໂລກ.
ຜົນສໍາຫລວດໃນປີ 2021 ໂດຍອົງການອະນາໄມໂລກ (WHO) ລະບຸວ່າ: ມີຜູ້ໃຫຍ່ທີ່ສູບຢາປະມານ 70 ລ້ານຄົນຢູ່ອິນໂດເນເຊຍ ຈາກປະຊາກອນທັງໝົດ 270 ລ້ານຄົນ ແລະ ປະເທດແຫ່ງນີ້ເປັນໜຶ່ງໃນຜູ້ຜະລິດຢາສູບໃຫຍ່ທີ່ສຸດຂອງໂລກ.
ໃນກົດໝາຍສະບັບໃໝ່ ເຊິ່ງລົງນາມໃຫ້ມີຜົນບັງຄັບໃຊ້ແລ້ວ ໂດຍປະທານາທິບໍດີ ໂຈໂຄ ວິໂດໂດ ຜູ້ນໍາອິນໂດເນເຊຍ ອາຍຸຂັ້ນຕໍ່າສໍາລັບຜູ້ທີ່ຕ້ອງການຊື້ຢາສູບໄດ້ຖືກປັບເປັນ 21 ປີ ແລະ ມີກໍານົດຫ້າມຂາຍຢາສູບ 1 ຊອງ ເຊິ່ງເປັນທາງເລືອກລາຄາຖືກທີ່ພົບໄດ້ທົ່ວໄປໃນຮ້ານຄ້າແຄມທາງ ໂດຍມີຈຸດມຸ້ງໝາຍເພື່ອຫລຸດອັດຕາການສູບຢາ ແລະ ປ້ອງກັນຜູ້ສູບຢານັບແຕ່ອາຍຸຍັງນ້ອຍ ແລະ ມີຜົນບັງຄັບໃຊ້ທັນທີ.
ກະແຊວງສາທາລະນະສຸກອິນໂດເນເຊຍເປີດເຜີຍໃນຜົນສໍາຫລວດປີ 2023 ວ່າ: ຜູ້ສູບຢາ 7.4% ຈາກທັງໝົດ 70 ລ້ານຄົນ ມີອາຍຸລະຫວ່າງ 10-18 ປີ ແລະ ຜູ້ມີອາຍຸລະຫວ່າງ 15-19 ປີ ເປັນກຸ່ມທີ່ສູບຢາຫລາຍທີ່ສຸດ.
