ມຽນມາຕໍ່ອາຍຸສະຖານະການສຸກເສີນຮອບທີ 6 ອີກ 6 ເດືອນ ອ້າງຮັກສາສະຖຽນລະພາບ-ກຽມການເລືອກຕັ້ງ
ສື່ຂອງທາງການມຽນມາລາຍງານວ່າ: ພົນເອກອາວຸໂສ ມິນ ອ່ອງ ຫລ່າຍ ຜູ້ນໍາລັດຖະບານທະຫານມຽນມາ ໄດ້ຂະຫຍາຍໄລຍະເວລາປະກາດສະຖານະການສຸກເສີນອອກໄປອີກ 6 ເດືອນ ໂດຍອ້າງເຫດຜົນເພື່ອຕ້ອງການເວລາເພີ່ມຕື່ມໃນການຮັກສາສະຖຽນລະພາບ ແລະ ຄວາມໝັ້ນຄົງຂອງປະເທດ ແລະ ກຽມພ້ອມສໍາລັບການຈັດການເລືອກຕັ້ງທີ່ສົມບູນ ແລະ ຖືກຕ້ອງ ເຊິ່ງຄາດວ່າອາດຈະມີຂຶ້ນໃນປີ 2025.
ການຂະຫຍາຍໄລຍະເວລາສະຖານະການສຸກເສີນດັ່ງກ່າວມີຂຶ້ນລະຫວ່າງກອງປະຊຸມສະມາຊິກສະພາຄວາມໝັ້ນຄົງ ແລະ ການປ້ອງກັນປະເທດ (National Defense and Security Council: NDSC) ວັນທີ 31 ກໍລະກົດ ໂດຍຖືເປັນຄັ້ງທີ 6 ນັບແຕ່ກອງທັບມຽນມາກໍ່ລັດຖະປະຫານໂຄ່ນລົ້ມລັດຖະບານພົນລະເຮືອນໃນເດືອນກຸມພາ 2021.
ພົນເອກອາວຸໂສ ມິນ ອ່ອງ ຫລ່າຍ ກ່າວໃນກອງປະຊຸມວ່າ: ນັບແຕ່ເຂົ້າກຸມອໍານາດ ລັດຖະບານຂອງທ່ານມີແຜນຈັດການເລືອກຕັ້ງທົ່ວປະເທດໃໝ່ພາຍຫລັງປະກາດສະຖານະການສຸກເສີນໄລຍະເວລາ 2 ປີສິ້ນສຸດລົງ, ແຕ່ອ້າງວ່າການກຽມການເລືອກຕັ້ງຖືກຂັດຂວາງດ້ວຍຄວາມບໍ່ສະຫງົບທີ່ເກີດຂຶ້ນ ແລະ ຊີ້ເຖິງຄວາມຈໍາເປັນໃນການພະຍາຍາມຟື້ນຟູສະຖຽນລະພາບ ແລະ ຄວາມໝັ້ນຄົງຈາກ “ການກໍ່ການຮ້າຍ” ໂດຍຝ່າຍຕໍ່ຕ້ານ ລວມທັງລັດຖະບານເອກະພາບແຫ່ງຊາດ (National Unity Government: NUG), ກອງກໍາລັງປ້ອງກັນປະຊາຊົນ (PDF) ແລະ ກອງກໍາລັງຊາດພັນຕິດອາວຸດ.
ຂະນະທີ່ທ່ານເນັ້ນວ່າ: ສິ່ງທີ່ຈໍາເປັນສໍາລັບການເລືອກຕັ້ງຄືການສໍາຫລວດສໍາມະໂນຄົວທົ່ວປະເທດ ເພື່ອໃຫ້ແນ່ໃຈວ່າລາຍຊື່ຜູ້ມີສິດລົງຄະແນນເລືອກຕັ້ງນັ້ນຈະຖືກຕ້ອງ.
ທັງນີ້, ລັດຖະທໍາມະນູນມຽນມາກໍານົດໃຫ້ຕ້ອງຈັດການເລືອກຕັ້ງພາຍໃນ 6 ເດືອນ ຫລັງຈາກຍົກເລີກປະກາດສະຖານະການສຸກເສີນ ໂດຍການຂະຫຍາຍໄລຍະເວລາດັ່ງກ່າວສົ່ງຜົນເຮັດໃຫ້ກອງທັບມຽນມາຍັງຂະຫຍາຍການໃຊ້ອໍານາດນອກລັດຖະທໍາມະນູນ ທ່າມກາງຄວາມຂັດແຍ່ງ ແລະ ການສູ້ຮົບລະຫວ່າງກອງທັບມຽນມາກັບກຸ່ມຊາດພັນຕິດອາວຸດ ເຊິ່ງຍັງດໍາເນີນຢູ່ໃນຫລາຍພື້ນທີ່ຂອງປະເທດ.
ອ້າງອີງ:
- https://www.aljazeera.com/news/2024/7/31/myanmar-military-government-extends-state-of-emergency-by-six-months
- https://www.rfa.org/english/news/myanmar/junta-emergency-extension-07312024152952.html
- https://www.irrawaddy.com/news/politics/myanmars-dictator-extends-emergency-rule-again-citing-election-preparations.html
