ໂຮງໄຟຟ້າຢູ່ອິນເດຍລະເບີດ ມີຜູ້ເສຍຊີວິດ 16 ຄົນ
ເກີດເຫດລະເບີດພາຍໃນໂຮງໄຟຟ້າໃນລັດອຸຕໍປະເທດ ທາງເໜືອຂອງອິນເດຍ ສົ່ງຜົນໃຫ້ມີຜູ້ເສຍຊີວິດແລ້ວ 16 ຄົນ ແລະ ບາດເຈັບອີກຫລາຍສິບຄົນ ສາເຫດຍັງບໍ່ຮູ້ແນ່ນອນ.
ສຳນັກຂ່າວຕ່າງປະເທດລາຍງານຈາກເມືອງລັກເນົາ ລັດອຸຕໍປະເທດ ປະເທດອິນເດຍ ໃນວັນທີ 1 ພະຈິກວ່າ: ທ່ານ ອານັນ ກຸມານ ອະທິບໍດີຕຳຫລວດເມືອງລັກເນົາ ເມືອງຫລວງຂອງລັດອຸຕໍປະເທດ ທາງເໜືອຂອງອິນເດຍ ເປີດເຜີຍວ່າ: ເກີດເຫດລະເບີດຂຶ້ນຢູ່ໂຮງໄຟຟ້າພະລັງງານຖ່ານຫີນ ເຊິ່ງເປັນຂອງບໍລິສັດພະລັງງານຄວາມຮ້ອນແຫ່ງຊາດກິດຈະການຂອງລັດ ຢູ່ເມືອງອັນຊາຮາ ລັດອຸຕໍປະເທດ ໃນວັນທີ 1 ພະຈິກ ສົ່ງຜົນໃຫ້ມີກຳມະກອນຂອງໂຮງໄຟຟ້າເສຍຊີວິດຢ່າງໜ້ອຍ 16 ຄົນ, ແຕ່ຕົວເລກຜູ້ເສຍຊີວິດອາດຈະສູງກວ່ານີ້ ເພາະຍັງມີບາດເຈັບສາຫັດອີກປະມານ 40-50 ຄົນ ສາເຫດຍັງບໍ່ຮູ້ແນ່ນອນ.
ບໍລິສັດພະລັງງານຄວາມຮ້ອນແຫ່ງຊາດ ຖະແຫລງອີກວ່າ: ໄດ້ສັ່ງປະຕິບັດການກູ້ໄພຫລັງເກີດອຸປະຕິເຫດແບບບໍ່ຄາດຄິດຢູ່ໂຮງງານກ່ຽວກັບໝໍ້ນ້ຳ ເຊິ່ງຕັ້ງຢູ່ໃນເຂດເຣ ບາເຣລີ ເມືອງອັນຊາຮາ.
ທ່ານ ໂຢດີ ອາທິຕະຍານາດ ເຈົ້າຄອງລັດອຸຕໍປະເທດ ຖະແຫລງວ່າ: ທ່ານຂໍສະແດງຄວາມເສຍໃຈໄປຫາຄອບຄົວຂອງຜູ້ເສຍຊີວິດ ແລະ ບາດເຈັບ ພ້ອມກັບສະເໜີສິນນ້ຳໃຈໃຫ້ຜູ້ເຄາະຮ້າຍຄົນລະ 200.000 ຣູປີ (3.096 ໂດລາສະຫະລັດ).
