ສະພາແຫ່ງຊາດເຫັນດີໃຫ້ປັບປຸງກົດໝາຍວ່າດ້ວຍສັນຊາດລາວ
ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ໃນບ່າຍວັນທີ 1 ພະຈິກນີ້, ໄດ້ຕົກລົງເຫັນດີໃຫ້ມີການປັບປຸງກົດໝາຍວ່າດ້ວຍສັນຊາດລາວ ເພື່ອເຮັດໃຫ້ກົດໝາຍສະບັບດັ່ງກ່າວ ສອດຄ່ອງກັບສະພາບຄວາມເປັນຈິງ, ສອດຄ່ອງກັບລັດຖະທຳມະນູນ ແລະ ກົດໝາຍອື່ນໆໃນປັດຈຸບັນ, ກົດໝາຍດັ່ງກ່າວ ຖືກປະກາດໃຊ້ໃນປີ 1990 ແລະ ມີການ ປັບປຸງ 1 ຄັ້ງ ໃນປີ 2004 ເພື່ອໃຫ້ສອດຄ່ອງກັບສະພາບຕົວຈິງຕາມຍຸກສະໄໝ.
ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ໄດ້ສະເໜີຕໍ່ທີ່ປະຊຸມວ່າ: ກົດໝາຍສະບັບເກົ່າ ປະກອບມີ: 6 ໝວດ ແລະ 30 ມາດຕາ, ສ່ວນສະບັບປັບປຸງໃໝ່ນີ້ ປະກອບມີ: 10 ໝວດ ແລະ 52 ມາດຕາ, ເພື່ອເປັນການສ້າງຄວາມເຂັ້ມແຂງໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານສັນຊາດໃຫ້ເປັນເອກະພາບໃນຂອບເຂດທົ່ວປະເທດ, ເຮັດໃຫ້ຂອດການປະສານສົມທົບລະຫວ່າງຂະແໜງການທີ່ກ່ຽວຂ້ອງໄດ້ສະດວກຂຶ້ນ ແລະ ມີປະສິດທິພາບ. ນອກນີ້ ຍັງເປັນການຂະຫຍາຍຕາໜ່າງການບໍລິການທາງດ້ານກົດໝາຍກ່ຽວກັບວຽກງານສັນຊາດລາວລົງສູ່ຮາກຖານ, ດັ່ງນັ້ນ ເມື່ອກົດໝາຍສະບັບນີ້ ຖືກປະກາດໃຊ້ ຈະສາມາດຮັບປະກັນຄວາມສອດຄ່ອງກັບແນວທາງນະໂຍບາຍ, ລັດຖະທຳມະນູນ, ກົດໝາຍ, ແຜນຍຸດທະສາດ, ແຜນພັດທະນາເສດຖະກິດ-ສັງຄົມຂອງຊາດ; ສາມາດຮັບປະກັນຄວາມໝັ້ນຄົງຂອງຊາດ, ຄວາມສະຫງົບ, ຄວາມປອດໄພ, ຄວາມເປັນລະບຽບຮຽບຮ້ອຍຂອງສັງຄົມ, ວັດທະນະທຳ ແລະ ຮີດຄອງປະເພນີອັນດີງາມຂອງຊາດລາວ; ສາມາດປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງລາວ ແລະ ຕ່າງປະເທດ ແລະ ຄົນບໍ່ມີສັນຊາດຕາມກົດໝາຍ; ສາມາດໃຫ້ການບໍລິການແກ່ສັງຄົມ ແລະ ການເກັບຄ່າທຳນຽມ ແລະ ການບໍລິການເຂົ້າງົບປະມານຂອງລັດ; ສາມາດຮັບປະກັນຄວາມເຂົ້າໃຈເປັນເອກະພາບ, ວ່ອງໄວ, ໂປ່ງໃສ, ສະດວກ, ຖືກຕ້ອງ ແລະ ຍຸຕິທຳ.
